Weather Update : ఆంధ్రప్రదేశ్ ప్రజలకు అలర్ట్.. ఈ జులై నెలలో వర్షాలు ఎలా ఉండబోతున్నాయంటే?

Weather Update : ఆంధ్రప్రదేశ్ రాష్ట్రంలో జులై నెల వాతావరణం ఎలా ఉండబోతుందనే దానిపై భారత వాతావరణ శాఖ కీలకమైన అంచనాలను వెల్లడించింది. ఐఎండీ నివేదిక ప్రకారం.. ఈ జులై నెలలో రాష్ట్రవ్యాప్తంగా సాధారణం లేదా సాధారణం కంటే తక్కువ వర్షపాతం నమోదయ్యే అవకాశాలు ఎక్కువగా ఉన్నాయి. ముఖ్యంగా ఏపీలోని చాలా ప్రాంతాల్లో వర్షాలు ఆశించిన స్థాయిలో కురవకపోవచ్చని వాతావరణ నిపుణులు సూచిస్తున్నారు. అయితే, రాయలసీమ ప్రాంతంతో పాటు కోస్తా తీరప్రాంతాల్లోని కొన్ని జిల్లాల్లో మాత్రం అక్కడక్కడా సాధారణ వర్షపాతం నమోదయ్యే వీలుంది. కానీ, రాష్ట్రంలోని మిగిలిన మెజారిటీ ప్రాంతాల్లో వర్షాలు తగ్గి, పొడి వాతావరణం ఏర్పడే సూచనలు స్పష్టంగా కనిపిస్తున్నాయి.

ఎండల తీవ్రత పెరిగే ఛాన్స్.. ఎల్ నినో పరిస్థితులపై నిపుణుల నిఘా

దేశంలోని పలు రాష్ట్రాల తరహాలోనే ఆంధ్రప్రదేశ్‌లో కూడా ఈ జులై నెలలో పగటి, రాత్రి ఉష్ణోగ్రతలు (గరిష్ట, కనిష్ట ఉష్ణోగ్రతలు) సాధారణం కంటే కాస్త ఎక్కువగా ఉండే అవకాశం ఉందని వాతావరణ శాఖ తెలిపింది. అయితే ఉష్ణోగ్రతల్లో ఖచ్చితంగా ఎంత మేర వ్యత్యాసం ఉంటుందనే సంఖ్యను నిపుణులు ఇంకా అధికారికంగా వెల్లడించలేదు. రాబోయే రోజుల్లో కొన్ని రోజులు సాధారణం కంటే ఎక్కువ వేడిగానూ, మరికొన్ని రోజులు కాస్త చల్లగానూ వాతావరణం మారుతుందని, ఉష్ణోగ్రతలు నిరంతరాయంగా ఒకేలా ఎక్కువగా ఉండవని ఐఎండీ అధికారులు స్పష్టం చేశారు. ప్రస్తుతం అందరి దృష్టి వర్షపాత సరళిపైనే ఉందని, రాబోయే ఆగస్టు, సెప్టెంబర్ నెలల్లో మరింత ప్రభావం చూపించబోయే ఎల్ నినో పరిస్థితులను నిపుణులు నిరంతరం పర్యవేక్షిస్తున్నారు.

జూన్ నెల వర్షాల లెక్కలు.. ఆ జిల్లాల్లో మాత్రం వానల లోటు!

వాతావరణ నిపుణులు ముందుగా అంచనా వేసినట్లుగానే గడిచిన జూన్ నెలలో ఆంధ్రప్రదేశ్ రాష్ట్రంలో సగటున సాధారణ స్థాయికి దగ్గరగా వర్షపాతం నమోదైంది. భారత వాతావరణ శాఖ విడుదల చేసిన అధికారిక గణాంకాల ప్రకారం, జూన్ 1 నుండి జూన్ 30 మధ్య కాలంలో రాష్ట్రంలోని అల్లూరి సీతారామరాజు జిల్లాలో అత్యధికంగా వర్షాలు కురిశాయి. అయితే, పార్వతీపురం మన్యం, శ్రీకాకుళం, అన్నమయ్య, పశ్చిమ గోదావరి వంటి జిల్లాల్లో మాత్రం జూన్ నెలలో వర్షపాతంలో తీవ్ర లోటు కనిపించింది. ఈ జిల్లాలు మినహా ఆంధ్రప్రదేశ్‌లోని మిగిలిన అన్ని జిల్లాల్లో జూన్ నెలలో సాధారణ లేదా సాధారణం కంటే ఎక్కువ వర్షపాతం రికార్డయింది.

జూలై 4 నుండి కోస్తాంధ్రాలో భారీ వర్షాలు కురిసే అవకాశం

ప్రస్తుతం ఏపీలో తేలికపాటి జల్లులు కురిసిన విశాఖపట్నం జిల్లా మినహా మిగిలిన అన్ని ప్రాంతాల్లో వాతావరణం చాలా వరకు పొడిగా ఉంది. అయితే, రాబోయే రెండు మూడు రోజుల్లో వాతావరణంలో మార్పులు రానున్నాయి. జూలై 3వ తేదీ వరకు రాష్ట్రంలోని పలు ప్రాంతాల్లో ఉరుములు, మెరుపులతో కూడిన తేలికపాటి నుండి మోస్తరు జల్లులు కురిసే అవకాశం ఉందని ఐఎండీ పేర్కొంది. ఆ తర్వాత, జూలై 4వ తేదీ నుండి కోస్తా ఆంధ్రప్రదేశ్‌లో వాతావరణం పూర్తిగా మారిపోయి, అక్కడక్కడా భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. ఈ నేపథ్యంలో తీరప్రాంత ప్రజలు, రైతులు అప్రమత్తంగా ఉండాలని అధికారులు సూచిస్తున్నారు.