AP Weather Update: చల్లని కబురు.. ఎండలకు బ్రేక్, ఐదు రోజులు వానలు.!
ఏపీలో మరో ఐదు రోజుల పాటు వర్షాలు, ఈదురుగాలులు వీచే అవకాశం. పలు ప్రాంతాల్లో వడగళ్ల వాన హెచ్చరికలు జారీ చేశాయి అధికారులు.
AP Weather Update
AP Weather Update: గత కొన్ని రోజులుగా ఎండల తీవ్రత, ఉక్కపోతతో ఇబ్బందులు పడుతున్న ప్రజలకు వాతావరణం ఊరట కలిగించే వార్త చెప్పింది. శుక్రవారం ఉత్తరాంధ్రలో పలు ప్రాంతాల్లో ఉరుములు, మెరుపులతో కూడిన భారీ వర్షం కురిసింది. కొన్ని చోట్ల వడగళ్ల వాన పడటంతో ఒక్కసారిగా వాతావరణం చల్లబడింది.
అయితే ఈ ఆకస్మిక వర్షాల కారణంగా విజయనగరం జిల్లాలో వాహనదారులు ప్రయాణాల్లో ఇబ్బందులు ఎదుర్కొన్నారు. రోడ్లపై నీరు నిలిచిపోవడంతో ట్రాఫిక్కు అంతరాయం ఏర్పడింది.
వాతావరణ శాఖ అధికారులు వెల్లడించిన వివరాల ప్రకారం, రాష్ట్రంలో రాబోయే మరో ఐదు రోజుల పాటు వర్షాలు కొనసాగే అవకాశం ఉంది. ముఖ్యంగా ఉత్తర, దక్షిణ కోస్తా ప్రాంతాల్లో గంటకు 45 నుంచి 55 కిలోమీటర్ల వేగంతో ఈదురుగాలులు వీచే అవకాశం ఉందని హెచ్చరించారు.
విజయనగరం, పార్వతీపురం జిల్లాల్లో అక్కడక్కడ వడగళ్ల వర్షాలు పడే అవకాశముండగా, ఉత్తర కోస్తా, దక్షిణ కోస్తా ప్రాంతాల్లో ఉరుములు, మెరుపులతో కూడిన వర్షాలు కురిసే సూచనలు ఉన్నాయి.
తీవ్రమైన ఎండల నేపథ్యంలో ఈ వర్షాలు కొంత ఉపశమనాన్ని ఇస్తున్నప్పటికీ, ఈదురుగాలులు, ఉరుముల సమయంలో ప్రజలు అప్రమత్తంగా ఉండాలని అధికారులు సూచించారు.
రికార్డు స్థాయిలో ఉష్ణోగ్రతలు
మరోవైపు వర్షాలు పడుతున్నా, రాష్ట్రంలో ఎండల తీవ్రత తగ్గడం లేదు. వాతావరణ కేంద్రం గణాంకాల ప్రకారం, మే 1న రాష్ట్రంలో గరిష్ట ఉష్ణోగ్రతలు నమోదయ్యాయి.
జంగమహేశ్వరపురం: 44.5 డిగ్రీల సెల్సియస్
గన్నవరం: 42.9 డిగ్రీల సెల్సియస్
అమరావతి: 42.8 డిగ్రీల సెల్సియస్
నందిగామ, నెల్లూరు: 42.6 డిగ్రీల సెల్సియస్
కర్నూలు: 41.4 డిగ్రీల సెల్సియస్
మొత్తంగా, వచ్చే ఐదు రోజుల పాటు వర్షాలు, ఈదురుగాలులతో వాతావరణం మారే అవకాశం ఉన్నందున ప్రజలు జాగ్రత్తగా ఉండాలని అధికారులు సూచిస్తున్నారు.