Chandrababu: ‘స్వర్ణ కుప్పం’ అంటే ఇదే.. త్వరలో కుప్పంలో బంగారం ఉత్పత్తి: చంద్రబాబు

Chandrababu: చిత్తూరు జిల్లా కుప్పం నియోజకవర్గంలో రెండో రోజు పర్యటించిన ఆంధ్రప్రదేశ్ ముఖ్యమంత్రి నారా చంద్రబాబు నాయుడు రాయలసీమ ముఖచిత్రాన్ని మార్చేలా సరికొత్త కీలక ప్రకటన చేశారు. రాయలసీమ ప్రాంతంలో ఏకంగా రూ.లక్ష కోట్లతో హార్టికల్చర్‌ (ఉద్యానవన) హబ్‌ ఏర్పాటు చేస్తున్నట్లు ముఖ్యమంత్రి వెల్లడించారు. ఈ భారీ హబ్‌లో ప్రైవేటు రంగం వాటా రూ.60 వేల కోట్లు కాగా.. ప్రభుత్వం తరఫున రూ.40వేల కోట్ల పెట్టుబడి పెడుతున్నట్లు స్పష్టం చేశారు.

కుప్పం పర్యటనలో భాగంగా సీఎం చంద్రబాబు నాయుడు రూ.117 కోట్లతో నిర్మించనున్న అధునాతన బస్‌స్టేషన్‌, డిపో నిర్మాణాలకు భూమిపూజ మరియు శంకుస్థాపన చేశారు. నియోజకవర్గంలో మొత్తం రూ.9,320 కోట్లతో 30 ప్రాజెక్టులకు శంకుస్థాపనలు, ప్రారంభోత్సవాలు నిర్వహించారు. అనంతరం ఏర్పాటు చేసిన బహిరంగ సభలో ఆయన మాట్లాడుతూ.. కుప్పం చరిత్ర మార్చే కార్యక్రమాలకు శ్రీకారం చుట్టామని, ఈ అభివృద్ధి పనులు 'స్వర్ణ కుప్పానికి' నాంది పలుకుతాయన్నారు.

ముఖ్యమంత్రి ప్రసంగంలోని ముఖ్యాంశాలు:

ఉపాధి కల్పన - అడిడాస్ పరిశ్రమ: కుప్పం ప్రాంతానికి ప్రముఖ బ్రాండ్ అడిడాస్‌ (Adidas) పరిశ్రమ రాబోతోందని, దీని ద్వారా దాదాపు 20 వేల మందికి ఉపాధి అవకాశాలు లభిస్తాయని సీఎం తెలిపారు. డెయిరీ, ఫుడ్‌ ప్రాసెసింగ్‌, పౌల్ట్రీ పరిశ్రమల రాకతో కుప్పంలో రోజుకు 10 లక్షల లీటర్ల పాల ఉత్పత్తి స్థాయికి చేరుకుంటుందని ఆశాభావం వ్యక్తం చేశారు.

పెట్రోల్‌, డీజిల్‌ బాయ్‌కాట్‌ - ఈవీ విప్లవం: స్కూటర్లు, కార్లు, ట్రాక్టర్లు అన్నీ విద్యుత్‌తో నడిచే పరిస్థితులు రావాలని పిలుపునిచ్చారు. పెట్రోల్‌, డీజిల్‌ను బాయ్‌కాట్ చేసి ఎలక్ట్రిక్ వాహనాలు వాడుదామన్నారు. రాబోయే రోజుల్లో ఆర్టీసీ బస్సులకు అవసరమైన విద్యుత్‌ను సోలార్ ద్వారా ఆర్టీసీనే తయారు చేసుకునేలా ప్రణాళికలు ఉన్నట్లు చెప్పారు.

వాణిజ్య పంటలు - మైక్రో ఇరిగేషన్: కుప్పంలో సంప్రదాయ వ్యవసాయం వీడి పూర్తిగా సెరీ కల్చర్ (పట్టు పరిశ్రమ) మరియు వాణిజ్య పంటల దిశగా రైతులు అడుగులు వేయాలని కోరారు. మైక్రో ఇరిగేషన్‌ (బిందు సేద్యం) రాష్ట్రానికి శ్రీరామ రక్షగా మారిందన్నారు.

కుప్పంలో బంగారం ఉత్పత్తి: "స్వర్ణ కుప్పం కావాలనేది నా ఆకాంక్ష. త్వరలోనే కుప్పంలో బంగారం ఉత్పత్తి చేసి.. 'స్వర్ణ కుప్పం' అనే పేరును సార్థకం చేస్తాం" అని చంద్రబాబు ఆసక్తికర వ్యాఖ్యలు చేశారు.

ఇతర ప్రాంతాల నుంచి ప్రజలు ఉద్యోగాల కోసం కుప్పం రావాలే తప్ప.. ఇక్కడి నుంచి వలస వెళ్లే పరిస్థితులు రాకూడదనేదే తన లక్ష్యమని చంద్రబాబు స్పష్టం చేశారు. ప్రపంచవ్యాప్తంగా మారిన ఆహారపు అలవాట్లకు అనుగుణంగా రైతులు పంటలు పండించాలని, పర్యావరణాన్ని కాపాడుకుంటూనే మెడికల్ నాలెడ్జ్‌ను ప్రజల ఇళ్ల వద్దకు చేరుస్తామని ముఖ్యమంత్రి హామీ ఇచ్చారు.