కాన్వాయ్‌లు తగ్గించుకున్న సీఎం, డిప్యూటీ సీఎం.. దేశానికే ఆదర్శంగా ఏపీ మంత్రులు!

Andhra Pradesh: పశ్చిమాసియా సంక్షోభం వల్ల ఏర్పడిన చమురు కొరతను ఎదుర్కోవడానికి ఆంధ్రప్రదేశ్ ప్రభుత్వం నడుం బిగించింది. ప్రధాని మోదీ పిలుపుతో ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కల్యాణ్ తమ వాహన శ్రేణిని భారీగా తగ్గించుకొని పొదుపు మంత్రాన్ని పఠిస్తున్నారు. విలాసాలకు స్వస్తి పలికి, సామాన్యులకు భారం కలగకుండా మంత్రులంతా ఏకతాటిపైకి రావడం ఇప్పుడు రాష్ట్రవ్యాప్తంగా చర్చనీయాంశమైంది.

ముఖ్యమంత్రి నుంచి మొదలైన మార్పు

అంతర్జాతీయంగా ముడి చమురు ధరలు పెరుగుతున్న వేళ, దేశ ఆర్థిక ప్రయోజనాల దృష్ట్యా ఇంధన పొదుపు పాటించాలని ప్రధానమంత్రి నరేంద్ర మోదీ దేశ ప్రజలకు విజ్ఞప్తి చేశారు. ఆ పిలుపును కేవలం మాటలకే పరిమితం చేయకుండా, ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఆచరణలో చూపిస్తున్నారు. గతంలో 11 వాహనాలతో కళకళలాడే ముఖ్యమంత్రి కాన్వాయ్, ఇప్పుడు కేవలం నాలుగు వాహనాలకు పరిమితమైంది. గురువారం ఉదయం ఆయన కేవలం రెండు ఎన్ఎస్‌జీ భద్రత వాహనాలు, ఒక ఎస్కార్ట్ సాయంతో సచివాలయానికి చేరుకోవడం అందరినీ ఆశ్చర్యపరిచింది. ఉన్నతాధికారుల నుంచి క్షేత్రస్థాయి సిబ్బంది వరకు ఈ పొదుపు చర్యలు పాటించాలని ఆయన స్పష్టమైన ఆదేశాలు జారీ చేశారు.

అదే బాటలో పవన్ కల్యాణ్, లోకేశ్

ముఖ్యమంత్రితో పాటు ఉప ముఖ్యమంత్రి పవన్ కల్యాణ్ సైతం తన వాహన శ్రేణిని సగానికి తగ్గించుకున్నారు. అటు మంత్రి నారా లోకేశ్ కూడా తన కాన్వాయ్‌ను నాలుగు నుంచి రెండు వాహనాలకు కుదించారు. భద్రతా సిబ్బంది కోసం విడివిడిగా వాహనాలు వాడకుండా, వారందరి కోసం ఒకే ఒక మినీ వ్యాన్‌ను ఏర్పాటు చేసి ఇంధన వృధాను అరికట్టారు. ప్రభుత్వంలోని కీలక నేతలు ఇలా తమ భద్రత కంటే దేశ ప్రయోజనాలే ముఖ్యమని భావించడం అధికారుల్లోనూ కొత్త ఉత్సాహాన్ని నింపింది.

మంత్రుల అల్పాహార విందు.. సామాన్యుల్లా రాక

నేడు ముఖ్యమంత్రి క్యాంపు కార్యాలయంలో మంత్రి నారా లోకేశ్ ఏర్పాటు చేసిన అల్పాహార విందులో ఒక ఆసక్తికర దృశ్యం కనిపించింది. రాష్ట్ర మంత్రులు నిమ్మల రామానాయుడు, అనిత, పయ్యావుల కేశవ్, సవిత వంటి ప్రముఖులందరూ తమ భారీ ఎస్కార్ట్ వాహనాలను కార్యాలయాల వద్దే వదిలేశారు. వీరంతా తమ వ్యక్తిగత వాహనాల్లో ఒక్కొక్కరే కార్యాలయానికి చేరుకున్నారు. గతంలో ఐదు వాహనాలతో తిరిగే మంత్రి నారాయణ, నేడు తన కాన్వాయ్‌లో ఏకంగా 50 శాతం కోత విధించుకొని కేవలం రెండు వాహనాలతోనే వచ్చారు. మంత్రులు పార్థసారథి, కొల్లు రవీంద్ర, డోలా శ్రీబాల వీరాంజనేయ స్వామి సైతం తమ ప్రయాణాల్లో పొదుపు పాటిస్తూ తోటి వారికి స్ఫూర్తిగా నిలిచారు.

ప్రభుత్వమే స్వయంగా ఈ మార్పుకు శ్రీకారం చుట్టడం వల్ల సామాన్య ప్రజల్లో కూడా ఇంధన పొదుపుపై అవగాహన పెరుగుతుందని ప్రభుత్వం ఆశిస్తోంది. ఏపీ ప్రభుత్వం తీసుకున్న ఈ నిర్ణయం ఇప్పుడు దేశంలోని ఇతర రాష్ట్రాలకు కూడా మార్గదర్శకంగా నిలుస్తోంది.