Earthquake: అనకాపల్లిలో భూ ప్రకంపనలు.. భయాందోళనలో రాంబిల్లి ప్రజలు..!

Earthquake: ఆంధ్రప్రదేశ్‌లోని అనకాపల్లి జిల్లాలో భూప్రకంపనలు చోటుచేసుకున్నాయి. జిల్లాలోని రాంబిల్లి మండలం మరియు పరిసర ప్రాంతాల్లో భూమి స్వల్పంగా కంపించడంతో స్థానికులు భయాందోళనకు గురయ్యారు. శుక్రవారం అర్ధరాత్రి దాటిన తర్వాత 12:05 గంటల సమయంలో ఈ ప్రకంపనలు సంభవించాయి. రిక్టర్ స్కేల్‌పై భూకంప తీవ్రత 3.7గా నమోదైనట్లు అధికారులు ప్రాథమికంగా నిర్ధారించారు.

నిద్రలో ఉన్న ప్రజలు ఒక్కసారిగా ప్రకంపనలు రావడంతో ఇళ్లలోంచి బయటకు పరుగులు తీశారు. అయితే, ఇప్పటివరకు ఎటువంటి ఆస్తి నష్టం లేదా ప్రాణనష్టం జరిగినట్లు సమాచారం లేదు.

స్థానిక అధికారులు మరియు జియోలాజికల్ సర్వే ఆఫ్ ఇండియా (GSI) బృందాలు ప్రకంపనలకు గల కారణాలను విశ్లేషిస్తున్నాయి. ఇలాంటి తక్కువ తీవ్రత గల ప్రకంపనలు సాధారణంగా ఆందోళన చెందాల్సిన విషయం కాదని, ప్రజలు అప్రమత్తంగా ఉండాలని అధికారులు సూచిస్తున్నారు.