Eruvaka Purnima 2026: రైతు సుభిక్షంగా ఉంటేనే రాష్ట్రం బాగుంటుంది.. ఏరువాక పున్నమి వేళ సీఎం చంద్రబాబు సందేశం!

Eruvaka Purnima 2026: తెలుగు రైతు జీవితంలో వ్యవసాయానికి శ్రీకారం చుట్టే పవిత్రమైన రోజు... ఏరువాక పున్నమి. భూమిని తల్లిగా, ఎద్దులను కుటుంబ సభ్యులుగా భావించి పూజించే ఈ సంప్రదాయం మన సంస్కృతిలో ప్రత్యేక స్థానాన్ని సంపాదించుకుంది. ఈ సందర్భంగా ముఖ్యమంత్రి చంద్రబాబు నాయుడు రాష్ట్ర రైతాంగానికి శుభాకాంక్షలు తెలుపుతూ... వ్యవసాయ రంగాన్ని మరింత బలోపేతం చేయడానికి ప్రభుత్వం కట్టుబడి ఉందని స్పష్టం చేశారు.

జ్యేష్ఠ శుద్ధ పౌర్ణమి రోజున జరుపుకునే ఏరువాక పున్నమి రైతుకు కేవలం పండుగ మాత్రమే కాదు... కొత్త సాగు సీజన్‌కు శ్రీకారం. ఈ రోజు రైతులు తమ పొలాలను, నాగలిని, ఎద్దులను పూజించి ప్రకృతికి కృతజ్ఞతలు తెలుపుతారు. మంచి వర్షాలు కురిసి, పంటలు సమృద్ధిగా పండాలని కోరుకుంటారు. గ్రామీణ సంస్కృతిలో తరతరాలుగా కొనసాగుతున్న ఈ ఆచారం ప్రకృతి, వ్యవసాయం, పశుసంపద మధ్య ఉన్న విడదీయరాని బంధాన్ని గుర్తు చేస్తుంది.

ఈ సందర్భంగా ముఖ్యమంత్రి చంద్రబాబు నాయుడు రైతులకు ఏరువాక పున్నమి శుభాకాంక్షలు తెలిపారు. దేశానికి అన్నం పెడుతున్న అన్నదాతల కష్టానికి ప్రతి ఒక్కరూ గౌరవం ఇవ్వాలని అన్నారు. రైతు ఇంట పాడి పంటలతో సిరిసంపదలు వెల్లివిరియాలని ఆకాంక్షించారు. ప్రకృతిని పూజించే సంప్రదాయాలను ప్రతి ఒక్కరూ కొనసాగించాలని, అదే మన సంస్కృతికి బలం అని పేర్కొన్నారు.

ప్రకృతి వ్యవసాయాన్ని ప్రోత్సహించడం కాలానుగుణ అవసరమని సీఎం అభిప్రాయపడ్డారు. రసాయనాల వినియోగాన్ని తగ్గించి సహజసిద్ధమైన పద్ధతుల్లో సాగు చేస్తే భూమి సారవంతంగా ఉండటంతో పాటు ప్రజల ఆరోగ్యం కూడా మెరుగుపడుతుందని చెప్పారు. భూమిని, నీటిని, పర్యావరణాన్ని కాపాడే బాధ్యత రైతులతో పాటు సమాజం మొత్తం మీద ఉందని గుర్తు చేశారు.

వ్యవసాయ రంగానికి ప్రభుత్వం అండగా ఉంటుందని మరోసారి హామీ ఇచ్చిన సీఎం... "అన్నదాత సుఖీభవ"తో పాటు పీఎం కిసాన్ నిధులను రైతుల ఖాతాల్లో జమ చేసి వారికి ఆర్థిక భరోసా కల్పిస్తున్నామని తెలిపారు. విత్తనాలు, ఎరువులు, సాగునీరు, మార్కెటింగ్ వంటి అన్ని అంశాల్లో రైతులకు అవసరమైన సహకారం అందించేందుకు ప్రభుత్వం చర్యలు తీసుకుంటోందని చెప్పారు.

ఎల్ నినో ప్రభావం, మారుతున్న వాతావరణ పరిస్థితులు, అంతర్జాతీయ పరిణామాల వల్ల వ్యవసాయ రంగానికి సవాళ్లు ఎదురయ్యే అవకాశం ఉందని సీఎం పేర్కొన్నారు. అలాంటి పరిస్థితుల్లో రైతులు వ్యవసాయ శాఖ సూచనలు పాటిస్తూ శాస్త్రీయ పద్ధతుల్లో సాగు చేపట్టాలని సూచించారు. ఈ ఏరువాక పున్నమి రైతాంగంలో కొత్త ఆశలు నింపాలని, ప్రతి రైతు ఇంట ఆనందం వెల్లివిరియాలని ఆకాంక్షిస్తూ శుభాకాంక్షలు తెలిపారు.

భూమిని దేవతగా భావించి సాగుకు శ్రీకారం చుట్టే రైతు సంస్కృతికి ప్రతీకగా నిలిచే ఏరువాక పున్నమి... సంప్రదాయానికి, ప్రకృతికి, వ్యవసాయానికి మధ్య ఉన్న అనుబంధాన్ని మరోసారి గుర్తు చేస్తోంది. రైతు సంతోషంగా ఉంటేనే రాష్ట్రం సుభిక్షంగా ఉంటుందనే సందేశాన్ని ఈ పండుగ మరోసారి చాటిచెబుతోంది.