Ambati Rambabu: అంబటి రాంబాబుకు మరో షాక్.. అనుమతి లేని దీక్షపై పోలీసుల కేసు నమోదు!

Ambati Rambabu: వైఎస్సార్ కాంగ్రెస్ పార్టీ సీనియర్ నేత, మాజీ మంత్రి అంబటి రాంబాబు చుట్టూ ఉచ్చు బిగుస్తోంది. ఇప్పటికే వరుస కేసులతో ఇబ్బందులు ఎదుర్కొంటున్న ఆయనపై తాజాగా గుంటూరులో మరో కేసు నమోదైంది. కలెక్టరేట్ వద్ద నిబంధనలకు విరుద్ధంగా నిరాహార దీక్ష చేపట్టారన్న ఆరోపణలపై నగరంపాలెం పోలీసులు ఈ చర్య తీసుకున్నారు.

ఇటీవల తన ఇంటిపై జరిగిన దాడికి నిరసనగా, బాధ్యులను వెంటనే అరెస్టు చేయాలని డిమాండ్ చేస్తూ అంబటి రాంబాబు గుంటూరు కలెక్టరేట్ వద్ద నిరాహార దీక్షకు దిగారు. అయితే, ఈ దీక్షకు ముందస్తు పోలీసు అనుమతి లేదని అధికారులు స్పష్టం చేశారు. బహిరంగ ప్రదేశంలో అనుమతి లేకుండా ఆందోళన నిర్వహించడం వల్ల భారీగా ట్రాఫిక్ జామ్ ఏర్పడిందని, ప్రజలకు తీవ్ర అంతరాయం కలిగిందని పోలీసులు వెల్లడించారు. ఈ క్రమంలోనే ఆయనపై కేసు నమోదు చేసినట్లు సమాచారం.

సత్తెనపల్లి లక్కీడ్రా కేసుతో పాటు ముఖ్యమంత్రి చంద్రబాబు నాయుడుపై అనుచిత వ్యాఖ్యలు చేసిన కేసుల్లో అంబటి రాంబాబు ఇప్పటికే 17 రోజుల పాటు రిమాండ్‌లో ఉన్నారు. ఇటీవలే బెయిల్‌పై విడుదలైన ఆయనకు, ఈ కొత్త కేసు మరో తలనొప్పిగా మారింది. ఈ తాజా పరిణామంపై అంబటి రాంబాబు ఎలా స్పందిస్తారో వేచి చూడాలి.