Weather Update : బయటకు వెళ్లే ముందు జాగ్రత్త.. ఏపీ, తెలంగాణలో పిడుగులతో కూడిన భారీ వర్షాలు

Weather Update : తెలుగు రాష్ట్రాల ప్రజలకు వాతావరణ శాఖ కీలక సూచనలు జారీ చేసింది. ప్రస్తుతం నైరుతి రుతుపవనాలు చురుగ్గా కదులుతుండటంతో, గురువారం రోజున ఆంధ్రప్రదేశ్, తెలంగాణలలో మోస్తరు నుంచి భారీ వర్షాలు కురిసే అవకాశం ఉందని స్పష్టం చేసింది. పలు చోట్ల ఉరుములు, మెరుపులతో పాటు పిడుగులు పడే ప్రమాదం ఉందని, అలాగే గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉందని తెలిపింది. ఈ నేపథ్యంలో ప్రజలు తగిన జాగ్రత్తలు తీసుకోవాలని అధికారులు సూచిస్తున్నారు.

తెలంగాణలోని ఈ 9 జిల్లాలకు ఎల్లో అలర్ట్

భారత వాతావరణ శాఖ హైదరాబాద్ కేంద్రం తెలిపిన వివరాల ప్రకారం.. తెలంగాణలోని ఉత్తర, తూర్పు జిల్లాల్లో వర్షాల తీవ్రత ఎక్కువగా ఉండనుంది. ముఖ్యంగా ఆదిలాబాద్, కొమురం భీం ఆసిఫాబాద్, మంచిర్యాల, నిర్మల్, నిజామాబాద్, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం జిల్లాల్లో భారీ వర్షాలు కురిసే అవకాశం ఉందని పేర్కొన్నారు. ఈ జిల్లాల్లో సుమారు 64.5 మిమీ నుంచి 115.5 మిమీ వరకు వర్షపాతం నమోదయ్యే అవకాశం ఉండటంతో అధికారులు అప్రమత్తంగా ఉన్నారు. ఇక రాజధాని హైదరాబాద్, దాని చుట్టుపక్కల ప్రాంతాల్లో ఆకాశం మేఘావృతమై ఉండి, తేలికపాటి నుండి మోస్తరు జల్లులు పడే అవకాశం ఉంది.

ఆంధ్రప్రదేశ్‌లోని ఈ జిల్లాల్లో భారీ వర్ష సూచన

ఆంధ్రప్రదేశ్ రాష్ట్ర విపత్తుల నిర్వహణ సంస్థ (APSDMA) ప్రకారం.. కోస్తాంధ్ర, రాయలసీమ ప్రాంతాల్లోనూ వర్షాల ప్రభావం కనిపిస్తోంది. గురువారం రోజున శ్రీకాకుళం, విజయనగరం, అల్లూరి సీతారామరాజు, డాక్టర్ బి.ఆర్. అంబేడ్కర్ కోనసీమ, పశ్చిమ గోదావరి, ఏలూరు, కృష్ణా, ఎన్టీఆర్, గుంటూరు, బాపట్ల, మార్కాపురం జిల్లాల్లో భారీ వర్షాలు కురిసే అవకాశం ఉందని వెల్లడించారు. వీటితో పాటు పార్వతీపురం మన్యం, పోలవరం, తూర్పు గోదావరి, పల్నాడు, తిరుపతి జిల్లాల్లో అక్కడక్కడ తేలికపాటి నుంచి మోస్తరు వర్షాలు కురుస్తాయని తెలిపారు.

తీరప్రాంత ప్రజలు, రైతులకు హెచ్చరికలు

భారీ వర్షాలు, ఈదురుగాలుల నేపథ్యంలో ప్రజలు అనవసరంగా బయటకు రాకూడదని అధికారులు కోరారు. వర్షం కురిసే సమయంలో పెద్ద చెట్ల కింద, విద్యుత్ స్తంభాల వద్ద, పాత భవనాల సమీపంలో నిలబడకూడదని హెచ్చరించారు. పొలాల్లో పనిచేసే రైతులు, వ్యవసాయ కూలీలు ఉరుములు, మెరుపులు వస్తున్న సమయంలో సురక్షిత ప్రాంతాలకు వెళ్లాలని సూచించారు. సముద్రంలో గాలుల వేగం ఎక్కువగా ఉండే అవకాశం ఉన్నందున, తీర ప్రాంతాల్లోని జాలర్లు వేటకు వెళ్లకూడదని సముద్రతీర యంత్రాంగం ఆదేశాలు జారీ చేసింది.