Weather Update : తెలుగు రాష్ట్రాల ప్రజలకు చల్లని కబురు.. రాబోయే 3 రోజుల్లో ఏపీ, తెలంగాణలో భారీ వర్షాలు

Weather Update : తీవ్రమైన ఎండలు, ఉక్కపోతతో అల్లాడిపోతున్న తెలుగు రాష్ట్రాల ప్రజలకు భారత వాతావరణ శాఖ అత్యంత చల్లని కబురు చెప్పింది. ఆంధ్రప్రదేశ్, తెలంగాణ రాష్ట్రాలలో రాబోయే మూడు రోజుల పాటు విస్తారంగా వర్షాలు కురిసే అవకాశం ఉందని వాతావరణ కేంద్రం హెచ్చరించింది. దీనికి ప్రధాన కారణం.. నైరుతి బంగాళాఖాతం, తమిళనాడు తీర ప్రాంతాలపై సముద్ర మట్టానికి దాదాపు 3.1 నుంచి 5.8 కిలోమీటర్ల ఎత్తులో ఒక స్థిరమైన ఉపరితల వాయు ప్రసరణ వ్యవస్థ విస్తరించి ఉండటమే. దీని ప్రభావంతో పాటు, నైరుతి రుతుపవనాలు అరేబియా సముద్రం, బంగాళాఖాతం, లక్షద్వీప్ ప్రాంతాల్లోకి మరింత వేగంగా విస్తరించడానికి అనుకూలమైన పరిస్థితులు ఏర్పడ్డాయి.

ఏపీ వ్యాప్తంగా రాబోయే మూడు రోజుల పాటు వాతావరణం చల్లబడనుంది. ఉత్తర కోస్తా ఆంధ్రప్రదేశ్, యానాం పరిసర ప్రాంతాలలో ఒకటి రెండు చోట్ల తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు పడే అవకాశం ఉంది. కొన్ని చోట్ల పిడుగులు పడే ప్రమాదం కూడా ఉందని, ప్రజలు అప్రమత్తంగా ఉండాలని అధికారులు హెచ్చరించారు. వర్షం పడే సమయంలో గంటకు ఏకంగా 50 నుంచి 60 కిలోమీటర్ల వేగంతో బలమైన ఈదురు గాలులు వీచే అవకాశం ఉంది. ఇటు దక్షిణ కోస్తా ఆంధ్రప్రదేశ్, రాయలసీమ జిల్లాల్లో కూడా ఇదే విధమైన వాతావరణం ఉంటుందని, అక్కడక్కడా చిరుజల్లులు కురుస్తాయని వాతావరణ శాఖ అంచనా వేసింది.

గడిచిన రెండు వారాలుగా ఆంధ్రప్రదేశ్‌లో సూర్యుడు తన ప్రతాపాన్ని చూపించాడు. అయితే, రాబోయే రెండు రోజుల్లో ఉష్ణోగ్రతలు పెద్దగా పెరగకపోగా, ఆదివారం నుండి క్రమంగా 2 నుంచి 3 డిగ్రీల వరకు తగ్గుముఖం పడతాయని భారత వాతావరణ శాఖ, ఏపీ రాష్ట్ర విపత్తు నిర్వహణ సంస్థ సంయుక్తంగా వెల్లడించాయి. అంతకుముందు శుక్రవారం నాడు రాష్ట్రంలోని 10 జిల్లాల్లోని 51 మండలాల్లో ఉష్ణోగ్రతలు 42 డిగ్రీల కంటే ఎక్కువగా నమోదయ్యాయి. ముఖ్యంగా నెల్లూరు జిల్లాలోని కొమ్మిపాడు వద్ద అత్యధికంగా 45 డిగ్రీల రికార్డు ఉష్ణోగ్రత నమోదైంది. ఆ తర్వాతి స్థానాల్లో తూర్పు గోదావరి జిల్లా దేవరపల్లి (44.6 డిగ్రీలు), పార్వతీపురం మన్యం జిల్లా భామిని (43.9 డిగ్రీలు), విజయనగరం జిల్లా రాజం (43.9 డిగ్రీలు) ఉన్నాయి.

నైరుతి రుతుపవనాలు బంగాళాఖాతంలోని మరిన్ని ప్రాంతాలకు వేగంగా విస్తరిస్తుండటంతో తెలంగాణలో కూడా వాతావరణం మారబోతోంది. రాష్ట్రంలోని పలు జిల్లాల్లో ఉరుములు, మెరుపులతో పాటు గంటకు 40 నుంచి 50 కిలోమీటర్ల వేగంతో వీచే ఈదురు గాలులతో కూడిన చిరుజల్లులు పడే అవకాశం ఉంది. తెలంగాణలో గరిష్ట ఉష్ణోగ్రతలు ప్రస్తుతానికి స్థిరంగానే కొనసాగే అవకాశం ఉన్నప్పటికీ, రాష్ట్రంలోని ఉత్తర, తూర్పు జిల్లాల్లోని కొన్ని ప్రాంతాలలో మాత్రం ఇంకా వడగాలుల ప్రభావం స్వల్పంగా ఉండే అవకాశం ఉందని వాతావరణ కేంద్రం స్పష్టం చేసింది.

ప్రస్తుతం నైరుతి రుతుపవనాలు లక్షద్వీప్, ఆగ్నేయ, నైరుతి అరేబియా సముద్రంతో పాటు మధ్య బంగాళాఖాతంలోని మిగతా ప్రాంతాలకు వేగంగా విస్తరిస్తున్నాయి. వచ్చే రెండు, మూడు రోజుల్లో ఇవి మరింత ముందుకు సాగడానికి వాతావరణం పూర్తిగా సహకరిస్తోంది. ఐఎండీ అంచనా ప్రకారం, ఈ రుతుపవనాలు మే 28 నుంచి జూన్ 3 మధ్య కాలంలో (మే 31 లేదా జూన్ 1వ తేదీ నాటికి) అధికారికంగా కేరళ తీరాన్ని తాకనున్నాయి. ఆ తర్వాత జూన్ 5 నుంచి జూన్ 10వ తేదీల మధ్య ఇవి ఆంధ్రప్రదేశ్‌లోకి, జూన్ 10వ తేదీ నాటికి తెలంగాణలోకి ప్రవేశించి తెలుగు రాష్ట్రాలను పూర్తిగా పలకరించనున్నాయి. దీనివల్ల జూన్ మొదటి వారం నుండి రెండు రాష్ట్రాల్లో వర్షాలు మరింత ఊపందుకోనున్నాయి.