YS Jagan: జగన్‌ అక్రమాస్తుల కేసులో బిగ్ ట్విస్ట్..!

YS Jagan: వైఎస్సార్ కాంగ్రెస్ పార్టీ అధినేత, మాజీ ముఖ్యమంత్రి వైఎస్‌ జగన్‌మోహన్‌రెడ్డి అక్రమాస్తుల కేసులో అత్యంత కీలక పరిణామం చోటుచేసుకుంది. ఇన్నాళ్లూ కేవలం సీబీఐ (CBI) దాఖలు చేసిన కేసులపైనే దృష్టి సారించిన నాంపల్లిలోని ప్రత్యేక సీబీఐ కోర్టు, ఇకపై ఎన్‌ఫోర్స్‌మెంట్ డైరెక్టరేట్ (ED) నమోదు చేసిన కేసులను కూడా రోజువారీ ప్రాతిపదికన విచారించాలని నిర్ణయించింది. ఈ మేరకు సోమవారం నుంచి రోజువారీ విచారణకు సిద్ధమై హాజరుకావాలని ఈడీ తరఫు న్యాయవాదులకు న్యాయస్థానం ఆదేశాలు జారీ చేసింది.

వైఎస్ జగన్‌కు సంబంధించిన అక్రమాస్తుల వ్యవహారంలో ఈడీ దాఖలు చేసిన 9 ఛార్జిషీట్లు పదేళ్లకు పైగా సీబీఐ కోర్టులో ప్రాథమిక దశలోనే పెండింగ్‌లో ఉన్నాయి. నిందితులు దాఖలు చేసిన డిశ్చార్జి పిటిషన్లు ఇంకా తేలకపోవడంతో విచారణ ముందుకు సాగలేదు.

ఈ కేసుల విచారణను వేగవంతం చేయాలని, రోజువారీ ప్రాతిపదికన విచారణ జరిపేలా సీబీఐ ప్రత్యేక కోర్టును ఆదేశించాలని కోరుతూ ఇటీవల ఈడీ అధికారులు తెలంగాణ హైకోర్టులో పిటిషన్ దాఖలు చేశారు.

సత్వర విచారణ అనేది రాజ్యాంగం కల్పించిన ప్రాథమిక హక్కు అని, తీవ్రమైన ఆర్థిక నేరాలకు సంబంధించిన కేసులను వేగంగా తేల్చాల్సి ఉందంటూ ఈడీ న్యాయస్థానం దృష్టికి తీసుకెళ్లింది.

హైకోర్టు ఆదేశాలు మరియు ఈడీ విజ్ఞప్తి నేపథ్యంతో పాటు నాంపల్లిలోని సీబీఐ ప్రత్యేక న్యాయస్థానం ఈ విచారణపై సంచలన నిర్ణయం తీసుకుంది. రాబోయే సోమవారం నుంచి ఈడీ నమోదు చేసిన మనీలాండరింగ్ కేసుల విచారణను రోజువారీగా చేపట్టాలని నిర్ణయించింది.

డిశ్చార్జి పిటిషన్లను వేగంగా పరిష్కరించి, కేసుల విచారణ ప్రక్రియను ముగించేలా ప్రణాళిక సిద్ధం చేసింది. ఈ నిర్ణయంతో పదేళ్లుగా సాగుతున్న జగన్ అక్రమాస్తుల కేసుల విచారణ తుది ఘట్టానికి చేరేందుకు శరవేగంగా అడుగులు పడుతున్నాయి.