Tirumala  : తిరుమలలో అద్భుతం.. కొళాయి తెరిస్తే పాలు.. అసలు నిజం చెప్పిన టీటీడీ

Tirumala : కలియుగ దైవం శ్రీ వేంకటేశ్వర స్వామివారి దర్శనార్థం తిరుమలకు వచ్చే భక్తులు కొండపై ఉన్న ప్రముఖ దర్శనీయ ప్రాంతాలైన పాపనాశనం, ఆకాశగంగ, శిలాతోరణం, శ్రీవారి పాదాలు, జపాలి తీర్థం వంటి క్షేత్రాలను దర్శించుకుంటారు. ఈ క్రమంలో జపాలి తీర్థానికి వెళ్తున్న భక్తులకు ఒక ఆశ్చర్యకరమైన అనుభూతి ఎదురైంది. అక్కడ ఉన్న శ్రీ ఆంజనేయ స్వామి ఆలయ ప్రాంగణంలోని తాగునీటి కొళాయిల నుంచి నీరు పాలవలె తెల్లగా రావడం భక్తులను ఆశ్చర్యానికి గురిచేసింది.

సోషల్ మీడియాలో వైరల్.. భక్తుల్లో ఉత్కంఠ

కొళాయిల నుంచి వస్తున్న ఈ తెల్లని నీటిని చూసి భక్తులు ఆశ్చర్యపోయారు. చాలామంది ఆ నీటిని పట్టుకుని తాగుతూ ఫోటోలు, వీడియోలు తీసి సోషల్ మీడియాలో పోస్ట్ చేయడంతో అవి క్షణాల్లో వైరల్‌గా మారాయి. ఇది స్వామివారి మహత్యమా లేదా మరేదైనా శాస్త్రీయ కారణం ఉందా అన్న కోణంలో నెటిజన్లు, భక్తులు పెద్ద ఎత్తున చర్చించుకోవడం ప్రారంభించారు. నీరు ఫోర్సుగా కొళాయి నుంచి బయటకు వచ్చే క్రమంలో గాలి బుడగల వల్ల తెల్లగా రావడం సహజమే అయినా, స్వామివారి క్షేత్రం కావడంతో భక్తులు దీనికి భక్తిభావాన్ని జోడించి ప్రచారం చేశారు.

ల్యాబ్ పరీక్షలు చేయించిన టీటీడీ ఆరోగ్య విభాగం

సోషల్ మీడియాలో విపరీతంగా ప్రచారం సాగుతుండటంతో తిరుమల తిరుపతి దేవస్థానం (టీటీడీ) తక్షణమే స్పందించింది. టీటీడీ ఆరోగ్య విభాగం అధికారులు జపాలి తీర్థం వద్ద ఉన్న కొళాయిల నీటి నమూనాలను సేకరించి టీటీడీ ఫుడ్ అండ్ వాటర్ ఎనాలసిస్ ల్యాబ్‎కు పరీక్షల నిమిత్తం పంపించారు. ల్యాబ్ నిపుణులు నీటిని సమగ్రంగా పరిశీలించి, ఆ నీరు పూర్తిగా స్వచ్ఛమైనది, తాగడానికి అత్యంత సురక్షితమైనదని నిర్ధారించారు.

సైంటిఫిక్ క్లారిటీ ఇచ్చిన టీటీడీ

నీరు పాలలా తెల్లగా కనిపించడానికి గల శాస్త్రీయ కారణాన్ని టీటీడీ అధికారిక ప్రకటన ద్వారా వెల్లడించింది. అధిక వాటర్ ప్రెజర్ (నీటి ఒత్తిడి) కారణంగా నీటిలో సూక్ష్మ గాలి బుడగలు ఏర్పడటం వల్లే నీరు తాత్కాలికంగా తెల్లగా కనిపిస్తోందని స్పష్టం చేసింది. కొళాయి నుంచి నీరు వచ్చిన కొన్ని సెకన్లలోనే ఆ గాలి బుడగలు తొలిగిపోయి, నీరు మళ్లీ సహజ స్థితికి చేరుకుంటుందని తెలిపింది. నీటిలో ఎలాంటి దుర్వాసన, అడుగున పేరుకుపోయే అవశేషాలు లేదా ఇతర మలినాలు లేవని ల్యాబ్ నిపుణులు ధృవీకరించినట్లు వివరించింది.

అపోహలు నమ్మవద్దని భక్తులకు విజ్ఞప్తి

జపాలి తీర్థంలో వస్తున్న తాగునీటిపై ఎలాంటి అపోహలు పెట్టుకోవద్దని టీటీడీ భక్తులను కోరింది. సామాజిక మాధ్యమాల్లో చక్కర్లు కొడుతున్న అసత్య ప్రచారాలను, పుకార్లను భక్తులు ఎట్టిపరిస్థితుల్లోనూ నమ్మవద్దని విజ్ఞప్తి చేసింది. శ్రీవారి క్షేత్రంలో భక్తుల ఆరోగ్యాన్ని దృష్టిలో ఉంచుకుని నిరంతరం స్వచ్ఛమైన తాగునీటిని అందిస్తున్నామని, శాస్త్రీయ దృక్పథంతో నిజాన్ని అర్థం చేసుకోవాలని ప్రకటనలో పేర్కొంది.