AP: పోలీసింగ్‌లో ఆర్టిఫిషియల్ ఇంటెలిజెన్స్ వినియోగాన్ని విస్తరించాల సీఎం

AP: విజయవాడ వేదికగా నిర్వహించిన ఏపీ పోలీస్ రిట్రీట్-2026 ఫ్యూచర్ పోలీసింగ్ కాన్ఫరెన్స్ రాష్ట్ర పోలీసింగ్ వ్యవస్థలో రాబోయే మార్పులకు దిశానిర్దేశం చేసింది. మూడు రోజుల పాటు జరిగిన ఈ సమావేశంలో రాష్ట్రంలోని ఐపీఎస్ అధికారులు భవిష్యత్తులో పోలీసులకు ఎదురయ్యే సవాళ్లు, వాటిని అధిగమించేందుకు అనుసరించాల్సిన వ్యూహాలపై విస్తృతంగా చర్చించారు. టెక్నాలజీ ఆధారిత పోలీసింగ్, మహిళల భద్రత, సైబర్ నేరాల నియంత్రణ, డ్రగ్స్-గంజాయి నిర్మూలన, సోషల్ మీడియా దుష్ప్రచారం వంటి కీలక అంశాలపై రూపొందించిన ప్రజెంటేషన్లను ముఖ్యమంత్రి చంద్రబాబు నాయుడికి అధికారులు వివరించారు.

ఈ సందర్భంగా ముఖ్యమంత్రి చంద్రబాబు పోలీసింగ్ వ్యవస్థలో సమూల మార్పులు అవసరమని స్పష్టం చేశారు. 2001లోనే ఇదే తరహాలో ఫ్యూచర్ పోలీసింగ్‌పై వర్క్‌షాప్ నిర్వహించామని గుర్తు చేసిన ఆయన, గతంతో పోలిస్తే నేరాల స్వరూపం పూర్తిగా మారిపోయిందన్నారు. సోషల్ మీడియా వేదికగా అసత్య ప్రచారం, విద్వేషాన్ని రెచ్చగొట్టే ప్రయత్నాలు పెరుగుతున్నాయని, వాటిని సమర్థంగా ఎదుర్కొనే సామర్థ్యం పోలీసులకు ఉండాలని సూచించారు.

నేరాలను అరికట్టడం మాత్రమే కాకుండా, నేరస్తులకు వేగంగా శిక్షలు పడేలా దర్యాప్తు, సాక్ష్యాల సేకరణ, న్యాయపరమైన ప్రక్రియలను బలోపేతం చేయాల్సిన అవసరం ఉందన్నారు. ప్రజల్లో నమ్మకం పెంచే విధంగా "ఇన్విజిబుల్ పోలీస్ – విజిబుల్ పోలీసింగ్" విధానాన్ని అమలు చేయాలని సూచించారు. ప్రజలతో స్నేహపూర్వకంగా వ్యవహరిస్తూనే, నేరస్తుల విషయంలో మాత్రం కఠిన వైఖరి అవలంబించాలని స్పష్టం చేశారు.

టెక్నాలజీ వినియోగమే ఆధునిక పోలీసింగ్‌కు ప్రధాన ఆయుధమని పేర్కొన్న ముఖ్యమంత్రి, తిరుమల మెట్ల మార్గంలో అపహరణకు గురైన ఆంజనేయస్వామి విగ్రహాన్ని అత్యంత వేగంగా గుర్తించడాన్ని ఉదాహరణగా ప్రస్తావించారు. సాంకేతిక పరిజ్ఞానాన్ని సమర్థంగా వినియోగిస్తే క్లిష్టమైన కేసులను కూడా తక్కువ సమయంలో ఛేదించవచ్చని చెప్పారు. అలాగే, ఏదైనా సంఘటన జరిగినప్పుడు వెంటనే స్పందించకపోతే అపోహలు వ్యాపించి ప్రభుత్వ ప్రతిష్ఠ దెబ్బతింటుందని హెచ్చరించారు.

గంజాయి, డ్రగ్స్ నియంత్రణపై ప్రత్యేకంగా దృష్టి సారించిన చంద్రబాబు, ఈ మత్తు పదార్థాల వల్ల కుటుంబాలు నాశనం అవుతున్నాయని ఆందోళన వ్యక్తం చేశారు. గంజాయి మత్తులో జరిగే నేరాలను అరికట్టేందుకు కఠిన చర్యలతో పాటు ప్రజల్లో అవగాహన కార్యక్రమాలు కూడా విస్తృతంగా నిర్వహించాలని సూచించారు. రౌడీయిజం, ఫ్యాక్షనిజాన్ని గణనీయంగా నియంత్రించామని పేర్కొంటూ, ఇకపై సైబర్ నేరాలు, మహిళలపై నేరాలు, సోషల్ మీడియా దుష్ప్రచారాన్ని ప్రధాన సవాళ్లుగా చూడాలని చెప్పారు.

పోలీసింగ్‌లో కృత్రిమ మేధస్సు (AI) వినియోగాన్ని విస్తరించాల్సిన అవసరం ఉందని ముఖ్యమంత్రి స్పష్టం చేశారు. ప్రతి పోలీసు సిబ్బందికి డిజిటల్ లిటరసీ తప్పనిసరి కావాలని, అవసరమైన రంగాల్లో సర్టిఫికేషన్ కోర్సులు ప్రవేశపెట్టాలని సూచించారు. డాగ్ స్క్వాడ్, ఫోరెన్సిక్ విభాగాలను మరింత బలోపేతం చేయడంతో పాటు హెడ్ కానిస్టేబుళ్లు, ఏఎస్ఐల సేవలను కూడా పూర్తి స్థాయిలో వినియోగించుకోవాలని చెప్పారు.

పోలీసు ఉన్నతాధికారులు విశ్వవిద్యాలయాల ప్రొఫెసర్లు, నిపుణులతో నిరంతరం మమేకమై కొత్త సాంకేతిక పరిజ్ఞానం, ఆధునిక దర్యాప్తు పద్ధతులను నేర్చుకోవాలని సూచించారు.

మొత్తానికి, ఈ ఫ్యూచర్ పోలీసింగ్ కాన్ఫరెన్స్ ద్వారా టెక్నాలజీ ఆధారిత, ప్రజా కేంద్రిత, నైపుణ్యంతో కూడిన ఆధునిక పోలీసింగ్ వ్యవస్థ వైపు ఆంధ్రప్రదేశ్ అడుగులు వేస్తోందనే సంకేతాన్ని ముఖ్యమంత్రి చంద్రబాబు స్పష్టంగా ఇచ్చారు.