Weather Update: తీవ్ర వాయుగుండం ఎఫెక్ట్.. తెలుగు రాష్ట్రాల్లో దంచికొడుతున్న వర్షాలు

Weather Update: గత రెండు రోజులుగా తెలుగు రాష్ట్రాలను వణికిస్తున్న వాయుగుండం ప్రభావం ఇంకా కొనసాగుతోంది. ఈ తీవ్ర వాయుగుండం బుధవారం రాత్రి శ్రీకాకుళం జిల్లాలోని రణస్థలం, ఎచ్చెర్ల, పోలాకి, గార, సంతబొమ్మాళి మండలాల మధ్య తీరం దాటినట్లు రియల్ టైమ్ గవర్నెన్స్ సొసైటీ (RTGS) అధికారికంగా ప్రకటించింది. దీని ప్రభావంతో నిశ్శబ్దంగా ఉన్న రుతుపవనాలు ఒక్కసారిగా చురుగ్గా మారాయి. ఆంధ్రప్రదేశ్, తెలంగాణ వ్యాప్తంగా వాతావరణంలో భారీ మార్పులు చోటుచేసుకుంటున్నాయి. తీరం దాటినప్పటికీ దీని ప్రభావం ఇంకా కొన్ని జిల్లాలపై తీవ్రంగా ఉండే అవకాశం ఉందని వాతావరణ శాఖ హెచ్చరించింది.

ఆంధ్రప్రదేశ్‌లో భారీ వర్షాలు

ఉత్తర కోస్తాంధ్ర జిల్లాలైన శ్రీకాకుళం, విజయనగరం, విశాఖపట్నం, అనకాపల్లి, అల్లూరి సీతారామరాజు జిల్లాల్లో ఆకాశం మేఘావృతమై ఉండి అక్కడక్కడా భారీ వర్షాలు కురుస్తున్నాయి. సముద్ర తీర ప్రాంతాల్లో గంటకు 30 నుంచి 40 కిలోమీటర్ల వేగంతో ఈదురుగాలులు వీచే సూచనలు కనిపిస్తున్నాయి. పరిస్థితి ఆందోళనకరంగా ఉన్నందున మత్స్యకారులు ఎవరూ సముద్రంలోకి వేటకు వెళ్లవద్దని విపత్తుల నిర్వహణ సంస్థ స్పష్టం చేసింది. ఇక దక్షిణ కోస్తాలో ఉక్కపోతతో పాటు సాయంత్రం వేళల్లో ఉరుములతో కూడిన జల్లులు పడే ఛాన్స్ ఉంది. రాయలసీమ ప్రాంతంలో మాత్రం పొడి వాతావరణంతో పాటు చెదురుమదురు వర్షాలు కురిసే అవకాశం ఉంది.

తెలంగాణలోనూ విస్తారంగా వర్షాలు

తెలంగాణ వ్యాప్తంగా పలు జిల్లాల్లో నేడు తేలికపాటి నుంచి మోస్తరు వర్షాలు కురిసే అవకాశం ఉందని హైదరాబాద్ వాతావరణ కేంద్రం తెలిపింది. ముఖ్యంగా ఉత్తర, తూర్పు తెలంగాణ జిల్లాలైన ఆదిలాబాద్, కొమరంభీమ్ ఆసిఫాబాద్, మంచిర్యాల, జయశంకర్ భూపాలపల్లి, ములుగు, భద్రాద్రి కొత్తగూడెం జిల్లాల్లో ఆకాశం మేఘావృతమై ఉరుములు, మెరుపులతో కూడిన వర్షాలు పడతాయని అంచనా వేస్తున్నారు. మధ్యాహ్నం తర్వాత వాతావరణం మారి వర్షాలు కురిసే అవకాశం ఉన్నందున, రైతులు వ్యవసాయ పనుల సమయంలో చెట్ల కింద లేదా విద్యుత్ స్తంభాల వద్ద ఆశ్రయం పొందవద్దని అధికారులు హెచ్చరించారు.

గ్రేటర్ హైదరాబాద్‌లో ఆహ్లాదకర వాతావరణం

రాజధాని హైదరాబాద్ నగరంలో నేడు ఆకాశం పాక్షికంగా మేఘావృతమై కనిపిస్తోంది. ఉదయం వేళ చల్లని గాలులతో ఆహ్లాదకర వాతావరణం నెలకొనగా, మధ్యాహ్న సమయానికి ఉష్ణోగ్రతలు 31 నుంచి 33 డిగ్రీల సెల్సియస్ మధ్య నమోదయ్యే అవకాశం ఉంది. అయితే సాయంత్రం లేదా రాత్రి వేళల్లో నగరంలోని శేరిలింగంపల్లి, కూకట్‌పల్లి, ఖైరతాబాద్, చార్మినార్, ఎల్బీనగర్, సికింద్రాబాద్ పరిసర ప్రాంతాల్లో తేలికపాటి నుంచి మోస్తరు వర్షాలు లేదా చిరుజల్లులు కురిసే సూచనలున్నాయి. వర్షాల కారణంగా రోడ్లపై నీరు నిలవకుండా జిహెచ్‌ఎంసి సిబ్బంది ముందస్తు చర్యలు చేపట్టారు. వాహనదారులు ట్రాఫిక్ రద్దీని దృష్టిలో ఉంచుకుని ప్రయాణాలు ప్లాన్ చేసుకోవాలని సూచించారు.