Weather Update: తెలుగు రాష్ట్రాలకు వర్ష సూచన.. నేడు ఏ ఏ జిల్లాల్లో వర్షాలు పడనున్నాయంటే?

Weather Update: తెలుగు రాష్ట్రాల్లో రాబోయే వారం రోజుల పాటు వర్షాలు కురిసే అవకాశం ఉందని భారత వాతావరణ శాఖ (IMD) స్పష్టం చేసింది. బంగాళాఖాతంలో ఏర్పడిన ఉపరితల ఆవర్తనం ప్రభావంతో ఆంధ్రప్రదేశ్, తెలంగాణలోని పలు జిల్లాల్లో ఉరుములు, మెరుపులు, ఈదురుగాలులతో కూడిన వర్షాలు కురిసే అవకాశం ఉంది.

వాయవ్య బంగాళాఖాతంలో సముద్ర మట్టానికి 5.8 నుంచి 7.6 కిలోమీటర్ల ఎత్తులో ఉపరితల ఆవర్తనం కేంద్రీకృతమై ఉనట్లు వాతావరణ కేంద్రం వెల్లడించింది. దీని ప్రభావం వల్ల శనివారం నుంచి రాబోయే ఆరు నుంచి ఏడు రోజుల పాటు రెండు తెలుగు రాష్ట్రాల్లో మోస్తరు నుంచి భారీ వర్షాలు కురిసే వాతావరణం నెలకొంది. గాలులు గంటకు 30 నుంచి 50 కిలోమీటర్ల వేగంతో వీచే అవకాశం ఉన్నందున ప్రజలు అప్రమత్తంగా ఉండాలని అధికారులు హెచ్చరిస్తున్నారు.

ఆంధ్రప్రదేశ్‌లో వాతావరణ పరిస్థితులు

ఆంధ్రప్రదేశ్ రాష్ట్రంలో పొడి వాతావరణంతో పాటు పలు చోట్ల తేలికపాటి నుంచి మోస్తరు వర్షాలు పడే అవకాశం ఉంది.కోస్తాంధ్ర, యానాం, రాయలసీమ ప్రాంతాల్లోని కొన్ని జిల్లాల్లో ఆగస్టు 18 వరకు ఉరుములు, మెరుపులతో కూడిన వర్షాలు పడవచ్చు. గంటకు 40 నుంచి 50 కిలోమీటర్ల వేగంతో వేగవంతమైన గాలులు వీచే వీలున్నందున తీరప్రాంత ప్రజలు, రైతులు తగిన జాగ్రత్తలు తీసుకోవాలని సూచించారు.

తెలంగాణలో భారీ వర్షాల హెచ్చరిక

తెలంగాణలోని పలు జిల్లాల్లో శనివారం మోస్తరు నుంచి భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం తెలిపింది.ఆదిలాబాద్, ఆసిఫాబాద్, మంచిర్యాల, నిర్మల్, నిజామాబాద్, కామారెడ్డి, కరీంనగర్, సిరిసిల్ల, పెద్దపల్లి, జగిత్యాల జిల్లాల్లో ఉరుములతో కూడిన భారీ వర్షాలు పడే అవకాశం ఉంది. రాజధాని హైదరాబాద్ సహా ఇతర జిల్లాల్లో ఆకాశం మేఘావృతమై ఉండి తేలికపాటి నుంచి మోస్తరు జల్లులు పడవచ్చు. స్వాతంత్య్ర దినోత్సవ వేడుకలు, ప్రయాణాల నేపథ్యంలో బయటకు వెళ్లేవారు వాతావరణ పరిస్థితులను గమనించి బయలుదేరడం మంచిది.

బంగాళాఖాతంలో ఆవర్తన ప్రభావం కొనసాగుతున్నందున వచ్చే వారం రోజుల పాటు తెలుగు రాష్ట్రాల్లో వాతావరణం చల్లబడనుంది. భారీ వర్ష సూచన ఉన్న జిల్లాల ప్రజలు, ముఖ్యంగా లోతట్టు ప్రాంతాల నివాసితులు అప్రమత్తంగా ఉండాలని అధికారులు కోరుతున్నారు.