Andhra: తిరుమలలో కాలీఫ్లవర్‌పై నిషేధం.. టీటీడీ కీలక నిర్ణయం!

Andhra: తిరుమల కొండపై కాలీఫ్లవర్ వంటకాలను టీటీడీ నిషేధించింది. ఇటీవల కాలీఫ్లవర్‌లో పురుగులు రావడాన్ని గుర్తించామని, భక్తుల ఆరోగ్యం దృష్ట్యా తాత్కాలికంగా దాని వినియోగాన్ని బ్యాన్ చేస్తున్నామని టీటీడీ ప్రకటించింది.

తిరుమలలో టీటీడీ పాలకమండలి భక్తుల ఆరోగ్యాన్ని దృష్టిలో ఉంచుకుని కీలకమైన నిర్ణయం తీసుకుంది. తిరుమల కొండపై విక్రయించే ఆహార పదార్థాలలో నాణ్యతను కాపాడేందుకు అధికారులు ఎప్పటికప్పుడు చర్యలు చేపడుతున్నారు. తాజాగా తిరుమల కొండపై కాలీఫ్లవర్ తో తయారు చేసే గోబీ వంటకాలను నిషేధిస్తున్నట్లు టీటీడీ అధికారికంగా ప్రకటించింది. పవిత్రమైన పుణ్యక్షేత్రానికి విచ్చేసే భక్తులకు ఎటువంటి ఆరోగ్య సమస్యలు తలెత్తకుండా ఉండేందుకే ఈ నిర్ణయం తీసుకున్నట్లు స్పష్టం చేశారు.

ఇలాంటి నిర్ణయం తీసుకోవడానికి ప్రధాన కారణం ఇటీవల కాలీఫ్లవర్ లో చిన్న చిన్న పురుగులు వస్తున్నట్లు అధికారులు గుర్తించడమే. కూరగాయలను శుభ్రం చేసే సమయంలో కొన్నిసార్లు పురుగులు పూర్తిగా తొలగిపోకపోవడం వల్ల భక్తుల ఆరోగ్యం ప్రమాదంలో పడే అవకాశం ఉందని నిపుణులు హెచ్చరించారు. భక్తుల ఆరోగ్యం పట్ల అత్యంత జాగ్రత్తగా వ్యవహరించే టీటీడీ, ఈ అంశాన్ని తీవ్రంగా పరిగణించింది. అందువల్ల తదుపరి ఆదేశాలు వచ్చే వరకు కొండపై కాలీఫ్లవర్ వినియోగాన్ని తాత్కాలికంగా బ్యాన్ చేస్తున్నట్లు ప్రకటన వెలువరించింది.

తిరుమలలోని అన్ని ఫాస్ట్ ఫుడ్ సెంటర్లు, హోటళ్లు అలాగే రెస్టారెంట్లలో ఈ నిబంధన కచ్చితంగా అమలవుతుందని అధికారులు తెలిపారు. ఇప్పటికే తిరుమలలోని ఫాస్ట్ ఫుడ్ సెంటర్లు, హోటళ్లు, రెస్టారెంట్లలో ఎలాంటి చైనీస్ వంటకాలను విక్రయించకూడదని నిషేధించిన సంగతి తెలిసిందే. ఆ నిబంధనల కొనసాగింపుగా ఇప్పుడు కాలీఫ్లవర్ వంటకాలను కూడా పూర్తిగా నిషేధించారు. నిబంధనలను ఉల్లంఘించే వారిపై కఠిన చర్యలు ఉంటాయని హెచ్చరికలు జారీ చేశారు.

భక్తులు ఆధ్యాత్మిక భావంతో పాటు పరిపూర్ణ ఆరోగ్యంతో తిరుమల యాత్రను ముగించుకోవాలని టీటీడీ ఈ చర్యలు చేపట్టింది. నాణ్యమైన, పరిశుభ్రమైన ఆహారాన్ని అందించడమే లక్ష్యంగా అధికారులు నిరంతరం తనిఖీలు నిర్వహిస్తున్నారు. టీటీడీ తీసుకున్న ఈ ఆరోగ్యకరమైన నిర్ణయం పట్ల భక్తులు హర్షం వ్యక్తం చేస్తున్నారు. తిరుమలకు వచ్చే భక్తులు ఈ నిబంధనలను గమనించి అధికారులకు సహకరించాలని విజ్ఞప్తి చేస్తున్నారు.