Tirupati: తిరుపతి జిల్లాలో ఐదుగురి బలి.. మిస్టరీ వీడింది!

Tirupati: తిరుపతి జిల్లా నారాయణవనం మండలంలో ఒకే కుటుంబానికి చెందిన ఐదుగురు మృతి చెందిన ఘటన రాష్ట్రవ్యాప్తంగా కలకలం రేపింది. ఈ విషాద ఘటన వెనుక ఉన్న అసలు కారణాలను పోలీసులు ఛేదించారు. ఆన్‌లైన్ రమ్మీ వ్యసనం, దానివల్ల పెరిగిన అప్పులే ఈ ఘాతుకానికి మూలమని తేల్చారు.

వెంకటకృష్ణపాలెం పంచాయతీకి చెందిన మోహన్ అనే వ్యక్తి బుధవారం తన తల్లి చంద్రకళ (65), భార్య హరిత (33)ను అతి దారుణంగా ఇంట్లోనే హతమార్చాడు. అనంతరం తన ఇద్దరు పిల్లలు కౌశిక్ (14), హరిణి (12)తో కలిసి రైలు పట్టాల వద్దకు వెళ్లాడు. అక్కడ రైలు కింద పడి మోహన్ ఆత్మహత్య చేసుకోగా, తండ్రిని కాపాడే ప్రయత్నంలో ఇద్దరు పిల్లలు కూడా రైలు ఢీకొని ప్రాణాలు కోల్పోయారు.

పోలీసుల విచారణలో దిగ్భ్రాంతికరమైన విషయాలు వెలుగులోకి వచ్చాయి. ఆన్‌లైన్ రమ్మీకి బానిసైన మోహన్ ఇప్పటికే రెండు ప్లాట్లు, భార్య నగలను తాకట్టు పెట్టాడు. సుమారు రూ. 20 లక్షల విలువైన చీటీలు తీసినప్పటికీ అప్పులు తీరకపోవడంతో దంపతుల మధ్య తీవ్రస్థాయిలో గొడవలు జరిగాయి. తండ్రి మరణానంతరం వచ్చిన రైల్వే ఉద్యోగాన్ని కూడా మోహన్ మధ్యలోనే వదిలేశాడు.

మోహన్ బాధ్యతారాహిత్యంగా వ్యవహరించినప్పటికీ, భార్య హరిత బ్యూటీపార్లర్ మరియు టైలరింగ్ చేస్తూ కుటుంబాన్ని పోషించేది. ఆమె కష్టపడి కూడబెట్టిన సొమ్ముతో భర్తకు సిమెంటు దుకాణం కూడా పెట్టించింది. అయితే రమ్మీ వ్యసనం వల్ల అన్నీ కోల్పోయిన మోహన్, చివరికి క్షుద్రమైన ఆలోచనతో మొత్తం కుటుంబాన్ని బలి తీసుకున్నాడు.

గురువారం పుత్తూరు వైద్యవిధాన పరిషత్ ఆసుపత్రిలో ఐదు మృతదేహాలకు పోస్టుమార్టం నిర్వహించిన అనంతరం, స్వగ్రామంలో అంత్యక్రియలు పూర్తి చేశారు. పోలీసులు ఈ కేసును కుటుంబ కలహాలు మరియు మానసిక రుగ్మతల కోణంలోనూ విచారిస్తున్నారు.