Tirumala : తిరుమల వెళ్లే భక్తులకు అదిరిపోయే గుడ్ న్యూస్.. ప్రతిరోజూ వెయ్యి మందికి ఉచిత దర్శనం

Tirumala : కలియుగ ప్రత్యక్ష దైవమైన వేంకటేశ్వర స్వామిని దర్శించుకోవడానికి దేశ విదేశాల నుంచి ప్రతిరోజూ లక్షలాది మంది భక్తులు తిరుమలకు వస్తుంటారు. అయితే క్యూలైన్లలో గంటల తరబడి నిలబడటం శారీరకంగా ఇబ్బందిగా మారే వయోవృద్ధులు, దివ్యాంగుల కోసం తిరుమల తిరుపతి దేవస్థానం (TTD) ఒక అద్భుతమైన సదుపాయాన్ని అందుబాటులోకి తెచ్చింది. ప్రతిరోజూ వెయ్యి మంది సీనియర్ సిటిజన్లు (60 ఏళ్లు దాటిన వారు), శారీరక వైకల్యం ఉన్నవారికి ఉచితంగా ప్రత్యేక దర్శనం కల్పిస్తున్నట్లు టీటీడీ పాలకమండలి అధికారికంగా ప్రకటించింది.

ఉచిత దర్శనంతో పాటు లడ్డూ కూడా ఫ్రీ

ఈ ప్రత్యేక కోటా కింద దర్శన భాగ్యం పొందే భక్తులకు టీటీడీ మరో బంపర్ ఆఫర్ ఇచ్చింది. సాధారణంగా భక్తులు కొనుగోలు చేసే రూ.50 విలువైన శ్రీవారి లడ్డూ ప్రసాదాన్ని ఈ కేటగిరీ కింద వచ్చే వయోవృద్ధులు, దివ్యాంగులకు పూర్తిగా ఉచితంగా అందించనున్నారు. తిరుమలలోని నంబి ఆలయం వద్ద ఏర్పాటు చేసిన ప్రత్యేక క్యూలైన్ ద్వారా భక్తులను అనుమతిస్తారు. ప్రతిరోజూ మధ్యాహ్నం 3:00 గంటలకు ఈ ప్రత్యేక దర్శన సమయం ప్రారంభమవుతుందని, దీనివల్ల ఎలాంటి తొక్కిసలాట లేకుండా ప్రశాంతంగా స్వామివారిని చూసుకోవచ్చని అధికారులు తెలిపారు.

ఆన్‌లైన్ ద్వారా ముందస్తు బుకింగ్ విధానం

ఈ ఉచిత ప్రత్యేక దర్శన సౌకర్యాన్ని పొందాలనుకునే భక్తులు ముందుగానే ప్లాన్ చేసుకోవాల్సి ఉంటుంది. ఇందుకోసం టీటీడీ ప్రతి నెలా ఆన్‌లైన్‌లో ప్రత్యేక కోటాను విడుదల చేస్తుంది. ప్రయాణానికి మూడు నెలల ముందే భక్తులు తమ ఆధార్ కార్డ్ లేదా వయసు, దివ్యాంగత్వానికి సంబంధించిన ధృవీకరణ పత్రాలను సమర్పించి ఆన్‌లైన్ లో టోకెన్లు బుక్ చేసుకోవచ్చు. ఈ విధంగా ముందస్తుగా టికెట్లు పొందిన వారు మాత్రమే తిరుమలలోని ప్రత్యేక క్యూలైన్ లోకి ప్రవేశించడానికి అర్హులు.

సోషల్ మీడియా వదంతులను నమ్మొద్దు

ఇటీవలి కాలంలో వయోవృద్ధుల దర్శన సమయాలు, నిబంధనలపై సోషల్ మీడియా వేదికల్లో రకరకాల తప్పుడు ప్రచారాలు, వదంతులు షేర్ అవుతున్నాయి. దీనిపై టీటీడీ తీవ్రంగా స్పందించింది. సామాజిక మాధ్యమాల్లో వచ్చే ఎలాంటి అన్-అఫీషియల్ వార్తలను భక్తులు నమ్మవద్దని విజ్ఞప్తి చేసింది. శ్రీవారి దర్శన సమాచారం, వసతి గదులు, ఇతర సేవల కోసం భక్తులు కేవలం టీటీడీ అధికారిక వెబ్‌సైట్లయిన www.tirumala.org లేదా https://ttdevastanams.ap.inను మాత్రమే సంప్రదించి సమాచారాన్ని ధృవీకరించుకోవాలని స్పష్టం చేసింది.

దళారుల మాయమాటలకు మోసపోకండి

తిరుమలలో స్వామివారి దర్శనం త్వరగా చేయిస్తామని, వసతి గదులు ఇప్పిస్తామని చెప్పే దళారులు, మధ్యవర్తుల పట్ల భక్తులు అత్యంత అప్రమత్తంగా ఉండాలని టీటీడీ హెచ్చరించింది. అమాయక భక్తుల వీక్‌నెస్‌ను ఆసరాగా చేసుకుని కొంతమంది దళారులు భారీగా డబ్బులు వసూలు చేస్తూ మోసాలకు పాల్పడుతున్నారు. ఇలాంటి వారిని పట్టుకునేందుకు తిరుమల నిఘా విభాగం ప్రత్యేక నిఘా ఉంచిందని.. ఎవరైనా టికెట్ల పేరుతో మిమ్మల్ని సంప్రదించి డబ్బులు అడిగితే వెంటనే టీటీడీ అధికారిక హెల్ప్‌లైన్ నెంబర్ 155257 కు కాల్ చేసి ఫిర్యాదు చేయాలని కోరారు. మోసాలకు పాల్పడే వారిపై కఠినమైన చట్టపరమైన చర్యలు ఉంటాయని హెచ్చరించారు.