Visakhapatnam: గాజువాకలో టపాసుల షాపులో అగ్నిప్రమాదం.. భారీగా ఎగసిపడ్డ మంటలు!

Visakhapatnam: విశాఖపట్నంలోని ప్రముఖ వ్యాపార కేంద్రమైన కొత్త గాజువాకలో గురువారం భారీ అగ్నిప్రమాదం సంభవించింది. రద్దీగా ఉండే స్థానిక మార్కెట్ రోడ్డులోని ‘శివ ఫైర్‌వర్క్స్’ అనే బాణాసంచా దుకాణంలో ఒక్కసారిగా మంటలు చెలరేగాయి. దుకాణం నుంచి పెద్ద ఎత్తున మంటలు, దట్టమైన పొగ ఎగసిపడటంతో మార్కెట్‌కు వచ్చిన ప్రజలు, స్థానికులు తీవ్ర భయాందోళనలకు గురై పరుగులు తీశారు.

ప్రమాదంపై సమాచారం అందుకున్న వెంటనే అగ్నిమాపక సిబ్బంది ఫైర్ ఇంజన్లతో ఘటనా స్థలానికి చేరుకున్నారు. టపాసులు పేలుతుండటంతో అప్రమత్తమైన సిబ్బంది శ్రమించి మంటలను పూర్తిగా అదుపులోకి తెచ్చారు. రద్దీ సమయం కావడం, దానికి తోడు అగ్నిప్రమాదం జరగడంతో కొత్త గాజువాక మార్కెట్ రోడ్డులో భారీగా వాహనాలు నిలిచిపోయి కిలోమీటర్ల మేర ట్రాఫిక్ జామ్ అయ్యింది. పోలీసులు రంగంలోకి దిగి ట్రాఫిక్‌ను క్లియర్ చేశారు.

ఈ ప్రమాదంపై విశాఖ సౌత్ ఏసీపీ శ్రీనివాస్ స్పందిస్తూ కీలక వివరాలు వెల్లడించారు. ప్రమాదానికి గురైన ‘శివ ఫైర్‌వర్క్స్’ దుకాణానికి పోలీసు శాఖ నుంచి ఎలాంటి అనుమతులు లేవని ఏసీపీ స్పష్టం చేశారు. పోలీసుల అనుమతి నిరాకరించడంతో, సదరు షాపు యజమాని కోర్టును ఆశ్రయించి న్యాయస్థానం ద్వారా అనుమతి పత్రాలు తెచ్చుకుని వ్యాపారం నిర్వహిస్తున్నట్లు తెలిపారు.

జనావాసాలు ఎక్కువగా ఉండే ప్రాంతాల్లో, వ్యాపార కూడళ్ల మధ్య ఇలాంటి ప్రమాదకరమైన పేలుడు పదార్థాలు (బాణాసంచా) విక్రయించడం నిబంధనలకు విరుద్ధమని ఏసీపీ పేర్కొన్నారు. కోర్టు అనుమతులు ఉన్నప్పటికీ.. ప్రజల ప్రాణాలకు ముప్పు తెచ్చేలా వ్యవహరించినందున, ప్రమాదానికి కారణమైన షాపు యజమానిపై చట్టపరంగా కఠిన చర్యలు తీసుకుంటామని ఏసీపీ శ్రీనివాస్ స్పష్టం చేశారు.