ఉత్తరాంధ్రకు అలర్ట్.. రాబోయే 3 గంటల్లో పిడుగులతో కూడిన భారీ వర్షాలు

Weather Alert: ఉత్తరాంధ్ర జిల్లాల ప్రజలకు ఆంధ్రప్రదేశ్ రాష్ట్ర విపత్తుల నిర్వహణ సంస్థ కీలక హెచ్చరిక జారీ చేసింది. రాబోయే మూడు గంటల్లో శ్రీకాకుళం, విజయనగరం, మన్యం జిల్లాల్లో కొన్ని ప్రాంతాల్లో పిడుగులతో కూడిన మోస్తరు వర్షాలు కురిసే అవకాశం ఉందని అధికారులు తెలిపారు. వర్షాలతో పాటు గంటకు 50 నుంచి 60 కిలోమీటర్ల వేగంతో బలమైన ఈదురు గాలులు వీచే అవకాశముందని హెచ్చరించారు. ఈ నేపథ్యంలో ప్రజలు అప్రమత్తంగా ఉండాలని విపత్తుల నిర్వహణ సంస్థ సూచించింది.

ప్రస్తుతం వాతావరణంలో చోటుచేసుకుంటున్న మార్పుల కారణంగా ఉత్తరాంధ్రలో ఒక్కసారిగా వాతావరణం మారే పరిస్థితులు కనిపిస్తున్నాయి. ఉదయం ఎండ తీవ్రంగా ఉన్నా, మధ్యాహ్నం లేదా సాయంత్రానికి మేఘాలు కమ్ముకుని ఉరుములు, మెరుపులతో కూడిన వర్షాలు పడే అవకాశం ఉంది. ఇలాంటి పరిస్థితుల్లో పిడుగుపాటు ప్రమాదం ఎక్కువగా ఉంటుందని అధికారులు చెబుతున్నారు. ముఖ్యంగా బహిరంగ ప్రదేశాల్లో పనిచేసే రైతులు, కూలీలు, ప్రయాణికులు జాగ్రత్తగా ఉండాలని సూచిస్తున్నారు.

పిడుగులు పడే సమయంలో చెట్ల క్రింద నిలబడకూడదని అధికారులు స్పష్టంగా హెచ్చరిస్తున్నారు. చాలామంది వర్షం నుంచి తప్పించుకోవడానికి చెట్ల క్రిందకు వెళ్లడం చేస్తుంటారు. అయితే అదే సమయంలో పిడుగు చెట్టును తాకితే ప్రాణాపాయం ఏర్పడే అవకాశం ఉంటుంది. అలాగే విద్యుత్ స్తంభాలు, బహిరంగ ప్రదేశాల్లో ఉన్న ఇనుప వస్తువులు, నీటి ప్రాంతాల దగ్గర కూడా ఉండకూడదని సూచించారు.. వీలైనంత త్వరగా సురక్షితమైన భవనాల్లోకి వెళ్లాలని తెలిపారు.

ఆంధ్రప్రదేశ్ రాష్ట్ర విపత్తుల నిర్వహణ సంస్థ ఎండీ ప్రఖర్ జైన్ మాట్లాడుతూ, ప్రజలు అధికారిక హెచ్చరికలను నిర్లక్ష్యం చేయకుండా జాగ్రత్తలు తీసుకోవాలని కోరారు. వాతావరణ పరిస్థితులను ఎప్పటికప్పుడు గమనిస్తూ అత్యవసర పరిస్థితుల్లో స్థానిక అధికారులకు సమాచారం అందించాలని సూచించారు. చిన్న నిర్లక్ష్యం కూడా పెద్ద ప్రమాదానికి దారితీయవచ్చని, అప్రమత్తతే రక్షణ అని అధికారులు చెబుతున్నారు.