Weather Update: అలర్ట్.. తెలుగు రాష్ట్రాల్లో మరోసారి దంచికొట్టనున్న వానలు

Weather Update: బంగాళాఖాతంలో ఏర్పడిన ఉపరితల ఆవర్తనం అలాగే కర్ణాటక - తమిళనాడు ప్రాంతాల మీదుగా కొనసాగుతున్న ద్రోణి ప్రభావంతో తెలుగు రాష్ట్రాల వాతావరణంలో మార్పులు చోటుచేసుకున్నాయి. ఆంధ్రప్రదేశ్, తెలంగాణ వ్యాప్తంగా మంగళవారం వర్షాలు కురిసే అవకాశం ఉందని వాతావరణ శాఖ హెచ్చరించింది. ముఖ్యంగా సముద్ర తీర ప్రాంతాలు అలాగే కొన్ని జిల్లాల్లో తేలికపాటి నుంచి మోస్తరు వర్షాలు పడే సూచనలు ఉన్నాయి. నైరుతి రుతుపవనాల ఉపసంహరణ ప్రక్రియ కూడా కొనసాగుతుండటంతో వాతావరణం ఒక్కసారిగా చల్లబడింది.

ఆంధ్రప్రదేశ్‌లో తేలికపాటి నుంచి మోస్తరు వర్షాలు

ఏపీలోని పలు జిల్లాల్లో మంగళవారం వర్షాలు కురిసే అవకాశం ఉన్నట్లు రాష్ట్ర విపత్తు నిర్వహణ సంస్థ (APSDMA) వెల్లడించింది. మన్యం, అనకాపల్లి, కోనసీమ, అనంతపురం, శ్రీ సత్యసాయి, కడప జిల్లాల్లో అక్కడక్కడ తేలికపాటి నుంచి మోస్తరు వర్షాలు పడే ఛాన్స్ ఉంది. మిగిలిన ఉత్తరాంధ్ర అలాగే రాయలసీమ జిల్లాల్లో చెదురుమదురుగా వర్షాలు కురిసే అవకాశం ఉందని అధికారులు తెలిపారు. ప్రజలు తగిన జాగ్రత్తలు తీసుకోవాలని సూచించారు.

తెలంగాణలో ఉరుములు, మెరుపులతో కూడిన వానలు

తెలంగాణలోని పలు ప్రాంతాలలో కూడా వర్షాలు పడే అవకాశం ఉందని హైదరాబాద్ వాతావరణ కేంద్రం తెలిపింది. రాష్ట్రంలో కొన్ని చోట్ల ఉరుములు, మెరుపులతో కూడిన వర్షాలు కురిసే ఛాన్స్ ఉంది. అంతేకాకుండా గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశం ఉందని హెచ్చరించారు. అయితే సెప్టెంబర్ 29న తెలంగాణకు ఎలాంటి ప్రత్యేక భారీ వర్షాల హెచ్చరికలు లేవని స్పష్టం చేశారు.

గోదావరి వరద పరిస్థితిపై అధికారుల అప్రమత్తత

భారీ వర్షాల నేపథ్యంలో గోదావరి వరద పరిస్థితిపై ఏపీ విపత్తు నిర్వహణ సంస్థ అప్రమత్తత సూచనలు జారీ చేసింది. భద్రాచలంలో నీటిమట్టం 36.4 అడుగులు, కూనవరంలో 17.8 మీటర్లు, పోలవరంలో 11.7 మీటర్లుగా నమోదైంది. ధవళేశ్వరం కాటన్ బ్యారేజీ వద్దకు 9.71 లక్షల క్యూసెక్కుల నీరు నిలకడగా లోపలికి వచ్చి బయటకు ప్రవహిస్తోందని అధికారులు తెలిపారు. వరద పూర్తిగా తగ్గే వరకు ప్రజలు అప్రమత్తంగా ఉండాలని సూచించారు.

లోతట్టు ప్రాంతాల ప్రజలకు సూచనలు

నదులు, వాగులు ఉప్పొంగి ప్రవహిస్తున్న తరుణంలో ప్రజలు అత్యంత అప్రమత్తంగా ఉండాలని అధికారులు కోరారు. లోతట్టు ప్రాంతాల ప్రజలు సురక్షిత ప్రాంతాలకు వెళ్లాలని హెచ్చరించారు. ఉప్పొంగి ప్రవహిస్తున్న వాగులు, కల్వర్టులు అలాగే కాజ్‌వేల వద్ద ప్రమాదకర ప్రయాణాలు చేయవద్దని స్పష్టం చేశారు. రైతులు, ప్రయాణికులు వాతావరణ పరిస్థితులను గమనించి తగిన జాగ్రత్తలు పాటించాలి.

ప్రయాణికులు అప్రమత్తంగా ఉండాలని హెచ్చరిక

వాతావరణంలో వస్తున్న మార్పుల కారణంగా ప్రయాణికులు అప్రమత్తంగా ఉండాలని అధికారులు విజ్ఞప్తి చేశారు. ఈదురుగాలులు వీచే సమయంలో చెట్ల కింద నిలబడవద్దని సూచించారు. వర్షాల కారణంగా రోడ్లపై నీరు నిలిచే అవకాశం ఉన్నందున వాహనదారులు వేగం తగ్గించి జాగ్రత్తగా ప్రయాణించాలని కోరారు.