RK Roja: కూటమి ప్రభుత్వంపై ఆర్కే రోజా హాట్ కామెంట్స్.. అది మహానాడు కాదు ‘దగానాడు’..!

RK Roja: ఆంధ్రప్రదేశ్‌లో అధికారంలో ఉన్న తెలుగుదేశం-జనసేన-బీజేపీ కూటమి ప్రభుత్వంపై వైఎస్‌ఆర్‌ కాంగ్రెస్‌ పార్టీ సీనియర్‌ నేత, మాజీ మంత్రి ఆర్కే రోజా తీవ్రస్థాయిలో విమర్శలు గుప్పించారు. కూటమి ప్రభుత్వం అధికారంలోకి వచ్చి రెండేళ్లు పూర్తవుతున్నా, ఎన్నికల ముందు ప్రజలకు ఇచ్చిన హామీల్లో ఒక్కటీ సక్రమంగా అమలు చేయలేదని ఆమె ఆరోపించారు. ప్రస్తుతం జరుగుతున్న మహానాడు కార్యక్రమంపై ఆమె ఘాటు వ్యాఖ్యలు చేశారు.

ప్రస్తుతం జరుగుతున్న మహానాడు వేదికగా ప్రజా సమస్యలపై ఎలాంటి చర్చ జరగడం లేదని రోజా విమర్శించారు. "ఇది మహానాడు కాదు.. ప్రజలను వంచించే 'దగానాడు'. ఎన్నికల ముందు ప్రకటించిన సూపర్ సిక్స్, సూపర్ సెవెన్ హామీలు ప్రజలకు ఏ మేరకు ఉపయోగపడ్డాయో ఈ ప్రభుత్వం శ్వేతపత్రం విడుదల చేయాలి" అని రోజా డిమాండ్ చేశారు.

కూటమి ప్రభుత్వం తన వైఫల్యాలను కప్పిపుచ్చుకోవడానికి, ప్రజల దృష్టిని మళ్లించడానికి 'డైవర్షన్ పాలిటిక్స్' (మళ్లింపు రాజకీయాలు) చేస్తోందని, అందులో భాగంగానే వైసిపి నేతలను టార్గెట్ చేస్తూ భయభ్రాంతులకు గురిచేస్తున్నారని మండిపడ్డారు.

చంద్రబాబు నాయుడు నేతృత్వంలోని కూటమి ప్రభుత్వం చేసిన మోసాలను, వారి ‘మోసాల మానిఫెస్టో’ను ప్రజల్లోకి బలంగా తీసుకెళ్లేందుకు వైఎస్సార్ కాంగ్రెస్ పార్టీ ప్రత్యేక కార్యాచరణను సిద్ధం చేసిందని రోజా వెల్లడించారు. జూన్ 4 నుంచి రాష్ట్రవ్యాప్తంగా పార్టీ ఆధ్వర్యంలో విస్తృత స్థాయి కార్యక్రమాలు ప్రారంభం కానున్నాయని, కూటమి ప్రభుత్వ వైఫల్యాలను ప్రతి ఇంటికీ వెళ్లి వివరిస్తామని స్పష్టం చేశారు.

గత వైఎస్ జగన్ మోహన్ రెడ్డి ప్రభుత్వ హయాంలో జరిగిన అభివృద్ధి పనులను, ప్రాజెక్టులను ఈ ప్రభుత్వం తమ ఖాతాలో వేసుకునేందుకు ప్రయత్నిస్తోందని రోజా ఎద్దేవా చేశారు. "ఈ రెండేళ్ల కాలంలో మీరు కొత్తగా ప్రారంభించి, పూర్తి చేసిన ఒక్క ప్రాజెక్ట్ అయినా ఉందా?" అని ఆమె సవాల్ విసిరారు. విద్యాశాఖ మంత్రిగా నారా లోకేష్ బాధ్యతలు చేపట్టిన తర్వాత రాష్ట్ర విద్యా వ్యవస్థ పూర్తిగా దెబ్బతిన్నదని, అలాంటి వ్యక్తినే ఇప్పుడు పార్టీ అధ్యక్షుడిగా నియమించారని విమర్శించారు.

రాష్ట్రంలో మహిళలపై రోజురోజుకూ దాడులు పెరుగుతున్నా ప్రభుత్వం నిమ్మకు నీరెత్తినట్లు వ్యవహరిస్తోందని రోజా ఆవేదన వ్యక్తం చేశారు. మహిళలకు 33 శాతం రిజర్వేషన్ల గురించి ఇప్పుడు మాట్లాడుతున్న కూటమి నేతలు, గతంలో అధికారంలో ఉన్నప్పుడు ఎందుకు అమలు చేయలేదని ప్రశ్నించారు. నిజంగా చిత్తశుద్ధి ఉంటే అప్పుడే చేసి ఉండాలన్నారు. ప్రస్తుతం ప్రజలంతా ప్రభుత్వ తీరును నిశితంగా గమనిస్తున్నారని, రాబోయే రోజుల్లో కూటమి ప్రభుత్వానికి ప్రజలే సరైన బుద్ధి చెబుతారని రోజా హెచ్చరించారు.