Vastu Tips: ఇంట్లో డ‌బ్బులు దాస్తున్నారా.? ఈ నాలుగు చోట్ల అస్స‌లు పెట్ట‌కండి!

Vastu Tips: ఇంట్లో డబ్బును దాచుకోవడం చాలామందికి అలవాటే. అయితే ఇంట్లో డబ్బును ఎక్కడ పడితే అక్కడ దాచడం మంచిది కాదని వాస్తుశాస్త్రం చెబుతోంది. డబ్బు, బంగారు నగలను లక్ష్మీదేవి స్వరూపంగా భావిస్తారు. అందుకే వాటిని శుభ్రమైన, సురక్షితమైన ప్రదేశంలో ఉంచాలని సూచిస్తారు.

డబ్బులు దాచుకోవడం శుభమా.. అశుభమా?

వాస్తుశాస్త్రం ప్రకారం ఇంట్లో డబ్బు లేదా విలువైన వస్తువులను సరైన ప్రదేశంలో భద్రపరచడం శుభంగా భావిస్తారు. అయితే అపరిశుభ్రంగా ఉండే ప్రదేశాలు, చీకటి మూలలు లేదా ఇంట్లో ప్రతికూలతకు సంబంధించిన ప్రదేశాల్లో డబ్బు దాచడం మంచిది కాదని చెబుతారు. ఇలాంటి చోట్ల డబ్బు ఉంచితే ఆర్థిక ఇబ్బందులు పెరిగే అవకాశం ఉందని వాస్తు నమ్మకాలు సూచిస్తున్నాయి. అందుకే డబ్బును దాచే ప్రదేశం శుభ్రంగా, చక్కగా ఉండేలా చూసుకోవడం మంచిది. అయితే వాస్తుశాస్త్రానికి సంబంధించిన ఈ విషయాలకు శాస్త్రీయ ఆధారాలు లేవని కూడా గుర్తుంచుకోవాలి.

వంటగది, ధాన్యం డబ్బాల్లో పెట్టకండి

చాలామంది ఇంట్లో ఎవరికీ తెలియకుండా డబ్బును దాచేందుకు బియ్యం, పిండి, పప్పులు పెట్టే డబ్బాలను ఉపయోగిస్తుంటారు. వంటగది సురక్షితమైన ప్రదేశంగా భావించి ఇలా చేయడం కనిపిస్తుంది. అయితే వాస్తు ప్రకారం వంటగదిలో డబ్బు దాచడం మంచిది కాదని చెబుతారు. వంటగది అగ్ని తత్వానికి సంబంధించిన ప్రదేశంగా భావిస్తారు.

ధాన్యాలు ఆహారానికి, సంపదకు ప్రతీకలుగా చూస్తారు. అందులో డబ్బును దాచడం వల్ల ఆర్థిక పరిస్థితిపై ప్రతికూల ప్రభావం పడుతుందని వాస్తు నమ్మకం. అందుకే బియ్యం, పిండి, పప్పుల డబ్బాల్లో నగదు లేదా నగలను దాచకుండా ఉండటం మంచిదని సూచిస్తారు.

ప్రధాన ద్వారం ఎదురుగా, దగ్గరలో పెట్టకండి

ఇంట్లోకి అడుగు పెట్టగానే కనిపించే ప్రదేశంలో డబ్బును దాచడం కూడా మంచిది కాదని వాస్తుశాస్త్రం చెబుతుంది. ముఖ్యంగా ప్రధాన ద్వారం ఎదురుగా ఉన్న కబోర్డులు, రహస్య అరలు లేదా ఇతర ప్రదేశాల్లో నగదు ఉంచకూడదని సూచిస్తారు. వాస్తు ప్రకారం ఇంటి ప్రధాన ద్వారం ద్వారా శక్తి ఇంట్లోకి ప్రవేశిస్తుంది. అందువల్ల ఆ ప్రాంతాన్ని ఎప్పుడూ శుభ్రంగా, ఖాళీగా ఉంచాలని భావిస్తారు. ప్రధాన ద్వారం దగ్గర డబ్బును దాచడం వల్ల ఇంట్లో సానుకూల శక్తి ప్రవాహానికి ఆటంకం కలుగుతుందని నమ్ముతారు.

మంచం కింద డబ్బులు దాచకండి

మ‌న‌లో కొంద‌రు మంచం కింద, పరుపు కింద లేదా మంచానికి ఉన్న స్టోరేజ్‌లో డబ్బు, బంగారు నగలను దాచుతుంటారు. అయితే వాస్తు ప్రకారం ఇది కూడా సరైన ప్రదేశం కాదని చెబుతారు. మంచం విశ్రాంతి, నిద్రకు సంబంధించిన ప్రదేశం. దాని కింద డబ్బు, విలువైన వస్తువులు ఉంచడం వల్ల ఇంట్లో ప్రశాంతత తగ్గుతుందని వాస్తు నమ్మకం. మానసిక ఒత్తిడి, నిద్రకు సంబంధించిన ఇబ్బందులు కూడా రావచ్చని కొందరు వాస్తు నిపుణులు చెబుతారు.

మెట్ల కింద, చీకటి లేదా అపరిశుభ్ర ప్రదేశాల్లో వద్దు

ఇంట్లో స్థలం తక్కువగా ఉన్నప్పుడు మెట్ల కింద ఉన్న ఖాళీ ప్రదేశాన్ని డబ్బు దాచేందుకు కొందరు ఉపయోగిస్తారు. అయితే వాస్తుశాస్త్రం ప్రకారం మెట్ల కింద డబ్బు దాచడం మంచిది కాదని చెబుతారు. ఆ ప్రదేశంలో ఎప్పుడూ రాకపోకలు, బరువు ఉండటం వల్ల ప్రతికూల ప్రభావం ఉంటుందని నమ్ముతారు.

అలాంటి చోట డబ్బు ఉంచితే ఆర్థికంగా ఎదుగుదల తగ్గుతుందని, అప్పులు పెరిగే పరిస్థితులు రావచ్చని వాస్తు విశ్వాసం. దీనితో పాటు ఇంట్లో చెత్త, దుమ్ము ఉండే ప్రదేశాలు, చీకటి మూలల్లో కూడా నగదు లేదా బంగారు నగలను దాచకపోవడం మంచిది. డబ్బును ఎక్కడ ఉంచినా ఆ ప్రదేశం శుభ్రంగా ఉండేలా చూసుకోవడం ముఖ్యం.