Aprilia : ఏప్రిలియా సంచలనం.. ఇండియాలో మూడు పాపులర్ స్కూటర్లు బంద్.. కొత్త మోడల్ ఎంట్రీ

Aprilia : ప్రముఖ ఇటాలియన్ టూవీలర్ బ్రాండ్ ఏప్రిలియా భారత మార్కెట్లో తన వ్యూహాన్ని పూర్తిగా మార్చేస్తోంది. తన పోర్ట్‌ఫోలియోలో ఎంతో కాలంగా కొనసాగుతున్న మూడు ఐకానిక్ స్కూటర్లను కంపెనీ సైలెంటుగా పక్కన పెట్టేసింది. ఏప్రిలియా ఎస్ఆర్ 160తో పాటు మ్యాక్సీ స్కూటర్లు అయిన ఎస్ఎక్స్‌ఆర్ 125, ఎస్ఎక్స్‌ఆర్ 160 మోడళ్ల ఉత్పత్తిని నిలిపివేసింది. ప్రస్తుతం కంపెనీ తన పూర్తి ఫోకస్‌ను కొత్తగా లాంచ్ చేసిన మోడల్స్‌పైనే పెడుతోంది.

ఎస్‌ఆర్ 160 స్థానంలో పవర్‌ఫుల్ ఎస్‌ఆర్ 175

చాలా కాలంగా యువతను ఆకట్టుకున్న ఎస్‌ఆర్ 160 స్కూటర్ స్థానాన్ని ఇప్పుడు కొత్తగా వచ్చిన ఏప్రిలియా ఎస్‌ఆర్ 175 భర్తీ చేసింది. దీనిలో పాత మోడల్ కంటే ఎక్కువ పవర్, మెరుగైన ఫీచర్లు ఉన్నాయి. కొత్త ఎస్‌ఆర్ 175లో 174.7 సీసీ ఎయిర్-కూల్డ్ ఇంజిన్‌ను అమర్చారు. ఇది 12.9 హెచ్‌పీ పవర్ మరియు 14.14 ఎన్ఎమ్ టార్క్‌ను ఉత్పత్తి చేస్తుంది. పాత మోడల్‌తో పోలిస్తే ఇది నగరాల్లో ప్రయాణించడానికి మరింత శక్తివంతంగా ఉంటుంది. ముఖ్యంగా ఇందులోని ఫుల్ కలర్ టీఎఫ్‌టీ డిస్ప్లే రైడర్లకు సరికొత్త అనుభూతిని ఇస్తుంది.

మ్యాక్సీ స్కూటర్ల ప్రస్థానం ముగిసినట్లేనా?

ఎస్‌ఆర్ సిరీస్‌లో మార్పులు జరిగినప్పటికీ, మ్యాక్సీ స్కూటర్ ప్రియులకు మాత్రం ఇది చేదు వార్త అనే చెప్పాలి. ఎస్‌ఎక్స్‌ఆర్ 125, ఎస్‌ఎక్స్‌ఆర్ 160 మోడళ్లను తొలగించిన తర్వాత, వాటి స్థానంలో కంపెనీ ఇప్పటివరకు ఎలాంటి కొత్త మోడళ్లను ప్రకటించలేదు. ఈ మోడళ్లు చూడటానికి పెద్దగా, మ్యాక్సీ స్కూటర్ల ఫీల్‌ను ఇచ్చేవి. 12-అంగుళాల టైర్లతో సౌకర్యవంతమైన ప్రయాణాన్ని అందించే ఈ స్కూటర్లను ఎందుకు పక్కన పెట్టారనే దానిపై కంపెనీ నుండి ఇంకా అధికారిక స్పందన రాలేదు. ప్రస్తుతం కంపెనీ ప్రధానంగా స్పోర్టీ లుక్ ఉన్న ఎస్‌ఆర్ సిరీస్‌పైనే ఆధారపడుతోంది.

ప్రస్తుతం అందుబాటులో ఉన్న మోడళ్లు

ప్రస్తుతానికి ఏప్రిలియా ఇండియా రేంజ్ ఎస్‌ఆర్ 125, ఎస్‌ఆర్ 175 మోడళ్లపైనే నడుస్తోంది. ఎస్‌ఆర్ 125 ధర సుమారు 1.14 లక్షల రూపాయలుగా ఉండగా, కొత్తగా వచ్చిన ఎస్‌ఆర్ 175 ధర 1.21 లక్షల రూపాయల (ఎక్స్-షోరూమ్) వద్ద ప్రారంభమవుతోంది. మీరు గనుక పాత ఎస్‌ఎక్స్‌ఆర్ మోడళ్లను కొనుగోలు చేయాలనుకుంటే, స్టాక్ ఉన్న డీలర్ల వద్ద మాత్రమే ఇవి లభించే అవకాశం ఉంది. కొత్త మోడల్స్‌లో స్టైలింగ్ పాత వాటిలాగే ఉన్నప్పటికీ, టెక్నాలజీ పరంగా భారీ మార్పులు చేశారు.