Audi నుంచి 1001HP మాన్‌స్టర్.. 2.6 సెకన్లలో 100 స్పీడ్‌కు దూసుకెళ్లే సూపర్ కార్.!

Audi Nuvolari Revealed : ప్రముఖ లగ్జరీ కార్ల తయారీ సంస్థ 'ఆడి' (Audi) అంతర్జాతీయ ఆటోమొబైల్ మార్కెట్లోకి సరికొత్త విప్లవాత్మక సూపర్ కార్ 'నువోలారి' (Nuvolari) ని పరిచయం చేసింది. ఆడి బ్రాండ్ చరిత్రలోనే అత్యంత శక్తివంతమైన, అత్యంత వేగవంతమైన ప్రొడక్షన్ వాహనంగా ఇది సరికొత్త రికార్డు సృష్టించింది. ఇటలీకి చెందిన లెజెండరీ రేసింగ్ డ్రైవర్ టాజియో నువోలారి జ్ఞాపకార్థం ఈ మోడల్‌కు ఆ పేరు పెట్టారు. ప్రపంచవ్యాప్తంగా కేవలం 499 యూనిట్లను మాత్రమే పరిమితంగా ఉత్పత్తి చేయనున్న ఈ సరికొత్త సూపర్ కార్ డెలివరీలు 2027 ప్రథమార్ధంలో ప్రారంభం కానున్నాయి.

ఫార్ములా 1 టెక్నాలజీ.. కళ్లు చెదిరే పర్ఫార్మెన్స్

ఈ సూపర్ కార్ హృదయస్థానంలో సరికొత్త హై-పర్ఫార్మెన్స్ ప్లగ్-ఇన్ హైబ్రిడ్ పవర్‌ట్రైన్ అమర్చారు. ఇది 4.0 లీటర్ల ట్విన్-టర్బోచార్జ్డ్ V8 ఇంజన్‌తో పాటు మూడు యాక్సియల్-ఫ్లక్స్ ఎలక్ట్రిక్ మోటార్లు , 7.3 కిలోవాట్ అవర్ (kWh) లిథియం-అయాన్ బ్యాటరీ ప్యాక్‌తో పనిచేస్తుంది. కేవలం V8 ఇంజన్ మాత్రమే 800 హార్స్‌పవర్ (bhp) శక్తిని జనరేట్ చేస్తుండగా, హైబ్రిడ్ సిస్టమ్‌తో కలిపి ఈ కారు మొత్తం 1,001 హార్స్‌పవర్ ఉమ్మడి శక్తిని రోడ్డుపైకి విడుదల చేస్తుంది. ఇందులో రెండు ఎలక్ట్రిక్ మోటార్లు ముందు యాక్సిల్‌పై, మూడోది ఇంజన్ , ట్రాన్స్‌మిషన్ మధ్య అమర్చబడ్డాయి. ఎనిమిది స్పీడ్ల డ్యూయల్-క్లచ్ ఆటోమేటిక్ గేర్‌బాక్స్ , ఆడి లేటెస్ట్ క్వాట్రో ఆల్-వీల్-డ్రైవ్ సిస్టమ్ సాయంతో ఈ కారు కేవలం 2.6 సెకన్లలోనే 0 నుండి 100 కిలోమీటర్ల వేగాన్ని అందుకుంటుంది. అలాగే గంటకు 350 కిలోమీటర్ల కంటే ఎక్కువ టాప్ స్పీడ్‌తో దూసుకెళ్లగల సామర్థ్యం దీనికి ఉంది.

రోడ్డుపై ట్రాక్షన్ పెంచే ప్రిడిక్టివ్ రైడ్

ఫార్ములా 1 రేసింగ్ కార్ల నుంచి ప్రేరణ పొంది ఆడి ఈ కారులో 'క్వాట్రో ప్రిడిక్టివ్ రైడ్' అనే సరికొత్త టెక్నాలజీని ప్రవేశపెట్టింది. ఈ సిస్టమ్ వాహన స్టీరింగ్ యాంగిల్, యాక్సిలరేషన్ , రోడ్డుపై ఉన్న గ్రిప్ లెవెల్స్ వంటి డేటాను నిరంతరం విశ్లేషిస్తూ ఉంటుంది. దీని ఆధారంగా కారు వేగాన్ని, స్టెబిలిటీని , కార్నరింగ్ పర్ఫార్మెన్స్‌ను పెంచడానికి టార్క్ డిస్ట్రిబ్యూషన్‌ను ముందే అంచనా వేసి అడ్జస్ట్ చేస్తుంది. డ్రైవర్లు తమ మూడ్‌కు తగ్గట్టుగా ఈ-హైబ్రిడ్, బ్యాలెన్స్‌డ్, డైనమిక్ , డైనమిక్ ప్లస్ అనే నాలుగు డ్రైవింగ్ మోడ్స్ ఎంచుకోవచ్చు. ట్రాక్‌పై రేసింగ్ చేయాలనుకునే వారి కోసం ప్రత్యేకంగా 'ట్రాక్ మోడ్' కూడా ఇందులో ఇచ్చారు.

కార్బన్ ఫైబర్ బాడీ.. యాక్టివ్ ఏరోడైనమిక్స్

ఆడి తన ప్రొడక్షన్ వాహనాల్లో మొదటిసారిగా స్పేస్ ఫ్రేమ్ ఆర్కిటెక్చర్‌తో పాటు పూర్తి కార్బన్-ఫైబర్ బాడీని ఉపయోగించింది. కారు బరువును తగ్గించి, దృఢత్వాన్ని పెంచడానికి బాహ్య ప్యానెళ్లన్నింటినీ కార్బన్-ఫైబర్ రీఇన్‌ఫోర్స్డ్ పాలిమర్‌తో తయారు చేశారు. కారు వేగాన్ని నియంత్రించడంలో గాలి ఒత్తిడి (ఏరోడైనమిక్స్) కీలక పాత్ర పోషిస్తుంది. ఇందుకోసం ఈ కారులో యాక్టివ్ ఏరోడైనమిక్ ప్యాకేజీని ఇచ్చారు, దీని ద్వారా అవసరాన్ని బట్టి వెనుక వింగ్ క్లోజ్డ్, లో డౌన్‌ఫోర్స్ , హై డౌన్‌ఫోర్స్ సెట్టింగ్స్‌కు మారుతుంది. అత్యంత వేగంగా వెళ్లే సమయంలో ఈ వింగ్ ఫార్ములా 1 తరహా డ్రాగ్ రిడక్షన్ సిస్టమ్ (DRS) లాగా పనిచేస్తూ గాలిని చీల్చుకుంటూ స్ట్రెయిట్ లైన్ స్పీడ్‌ను గరిష్ట స్థాయికి తీసుకువెళుతుంది.

ఫార్ములా 1 తరహా బ్రేకింగ్ సిస్టమ్

ఈ కారులో సరికొత్త బ్రేక్-బై-వైర్ సిస్టమ్‌ను ఉపయోగించారు, ఇది హైడ్రాలిక్ , రీజెనరేటివ్ బ్రేకింగ్‌ను అద్భుతంగా మిళితం చేస్తుంది. కొత్త 'ఆడి సిరామిక్ ప్రో' బ్రేకింగ్ సిస్టమ్‌లో ముందు భాగంలో భారీ 420 మిమీ డిస్క్‌లు, 10-పిస్టన్ కాలిపర్స్ , వెనుక భాగంలో 410 మిమీ డిస్క్‌లు, ఫోర్-పిస్టన్ కాలిపర్స్ అమర్చారు. అత్యంత వేగంగా వెళ్తున్న కారుపై ఒక్కసారిగా బ్రేక్ వేసినప్పుడు ఇది దాదాపు 2.8 మెగావాట్ల ఎనర్జీని గ్రహించగలదు, ఇది ప్రస్తుతం ఆధునిక ఫార్ములా 1 రేసింగ్ కార్లలో ఉండే బ్రేకింగ్ పవర్ స్థాయికి సమానం.

అల్ట్రా మోడరన్ డిజైన్.. లగ్జరీ ఇంటీరియర్

ఆడి సంస్థ తన సరికొత్త డిజైన్ ఫిలాసఫీని ఈ నువోలారి ద్వారా ప్రపంచానికి పరిచయం చేసింది. మిడ్-ఇంజన్ లేఅవుట్‌తో వచ్చిన ఈ సూపర్ కార్ క్లీన్ సర్ఫేస్ , సరికొత్త టైటానియం పెయింట్ షేడ్‌తో చూడటానికి ఎంతో ఆకర్షణీయంగా కనిపిస్తుంది. లోపల క్యాబిన్ పూర్తిగా డ్రైవర్‌ను దృష్టిలో ఉంచుకుని మినిమలిస్ట్ డ్యాష్‌బోర్డ్‌తో డిజైన్ చేశారు. ప్రయాణంలో డ్రైవింగ్ అనుభూతిని మరింత పెంచడానికి తక్కువ బరువుండే కార్బన్-ఫైబర్ బకెట్ సీట్లు, అనోడైజ్డ్ అల్యూమినియం , ప్రీమియం మెటీరియల్స్ ఉపయోగించి ఇంటీరియర్‌ను అత్యంత విలాసవంతంగా తీర్చిదిద్దారు. ఆడి రేంజ్‌లోనే అత్యంత ఎక్స్‌ట్రీమ్ రోడ్ కార్‌గా నువోలారి సరికొత్త అధ్యాయాన్ని లిఖించబోతోంది.