రూ. 10 లక్షలలోపే అదిరిపోయే ఆటోమేటిక్ కార్లు.. కిలోమీటరుకు రూపాయి ఖర్చు కూడా కాదు.!

Best Automatic Cars Under 10 Lakhs: నగరాల్లో పెరుగుతున్న ట్రాఫిక్ దృష్ట్యా ప్రస్తుతం ఆటోమేటిక్ కార్ల అవసరం పెరిగింది. సాధారణంగా బడ్జెట్ ఆటోమేటిక్ కార్లలో గేర్లు మారేటప్పుడు కుదుపులు (జెర్క్స్) రావడం సహజం. అయితే, ఎటువంటి కుదుపులు లేకుండా మృదువైన ప్రయాణాన్ని అందించే అత్యుత్తమ ఆటోమేటిక్ కార్లు ఇప్పుడు 10 లక్షల రూపాయలలోపు ధరలోనే అందుబాటులోకి వచ్చాయి.

స్మూత్ డ్రైవింగ్ కోసం సరైన సాంకేతికత..

మార్కెట్లో చౌకగా లభించే ఆటోమేటిక్ కార్లలో 'ఏఎమ్‌టి' సాంకేతికత ఉంటుంది. ఇందులో గేర్లు మారేటప్పుడు కుదుపులు అనిపిస్తుంటాయి. కానీ 'సీవీటీ' లేదా 'ఐవీటీ' వంటి అధునాతన టెక్నాలజీ ఉన్న కార్లు ఎంతో నిశ్శబ్దంగా, ఎంతో సునాయాసంగా ముందుకు సాగుతాయి. రూ. 10 లక్షల బడ్జెట్‌లో అటువంటి అనుభూతిని ఇచ్చే కార్లు ఇవే..

హ్యుందాయ్ ఐ20: ప్రీమియం హ్యాచ్‌బ్యాక్ సొగసు..

హ్యుందాయ్ ఐ20 తన స్టైలిష్ లుక్, ప్రీమియం ఫీచర్లకు ప్రసిద్ధి. దీని ధర సుమారు రూ. 5.99 లక్షల నుంచి ప్రారంభమవుతుంది. ముఖ్యంగా దీనిలోని 'ఐవీటీ' మోడల్స్ పది లక్షల లోపు లభిస్తాయి. నగర ట్రాఫిక్‌లో ఈ కారును నడపడం ఎంతో హాయిగా ఉంటుంది. గేర్లు మారుతున్నట్లు కూడా మీకు తెలియదు. అంతటి మృదువైన అనుభూతిని ఇది అందిస్తుంది.

హోండా అమేజ్: నమ్మకమైన సెడాన్..

తక్కువ ధరలో లభించే అత్యుత్తమ సెడాన్ కార్లలో హోండా అమేజ్ ఒకటి. ఇందులో 1.2 లీటర్ల పెట్రోల్ ఇంజిన్‌తో పాటు 'సీవీటీ' ఆటోమేటిక్ గేర్‌బాక్స్ అందుబాటులో ఉంది. దీని ప్రారంభ ధర రూ. 8.66 లక్షల (ఆటోమేటిక్) నుంచి ఉంటుంది. హోండా ఇంజిన్ విశ్వసనీయత, కుదుపులు లేని ప్రయాణం కోరుకునే వారికి ఇది సరైన ఎంపిక.

టాటా టియాగో ఈవీ: విద్యుత్ వేగం.. తక్కువ ఖర్చు..

ఖర్చు తక్కువగా ఉండాలి, ప్రయాణం సాఫీగా సాగాలని కోరుకుంటే టాటా టియాగో విద్యుత్ కారు (ఈవీ) ఉత్తమం. దీని ధర రూ. 10 లక్షల లోపే ఉంటుంది. విద్యుత్ కారు కావడం వల్ల ఇందులో గేర్ మార్చే ఇబ్బంది అసలే ఉండదు. ఒకసారి తొక్కగానే వేగాన్ని పుంజుకుంటుంది. దీనిని ఇంట్లోనే ఛార్జ్ చేసుకుంటే కిలోమీటరుకు అయ్యే ఖర్చు రూపాయి కంటే తక్కువే కావడం విశేషం.

టాటా పంచ్ ఈవీ: భద్రత, సౌలభ్యం..

చిన్న ఎస్‌యూవీలను ఇష్టపడే వారికి టాటా పంచ్ ఈవీ ఒక అద్భుతమైన అవకాశం. రూ. 10 లక్షల లోపు ధరలో దీని ప్రాథమిక మోడల్స్ అందుబాటులో ఉన్నాయి. ఇది కేవలం స్మూత్ డ్రైవింగ్ మాత్రమే కాకుండా, రోడ్లపై తిరుగుతున్నప్పుడు అధిక భద్రతను ఇస్తుంది. మధ్యతరగతి కుటుంబాలకు ఇది ఎంతో పొదుపైన, విలాసవంతమైన కారుగా నిలుస్తుంది.