దేశంలో అత్యుత్తమ ట్విన్ సిలిండర్ బైకులు ఇవే.. ధర, ఫీచర్లు చూస్తే వావ్ అనాల్సిందే!

Best Twin Cylinder Bikes: భారతీయ మోటార్ సైకిల్ మార్కెట్‌లో ప్రస్తుతం ట్విన్ సిలిండర్ ఇంజిన్ల హవా నడుస్తోంది. ముఖ్యంగా రాయల్ ఎన్ఫీల్డ్ ఇంటర్‌సెప్టర్ 650, కాంటినెంటల్ జీటీ 650, కవాసకి నింజా 650 వంటి వాహనాలు తమకంటూ ఒక ప్రత్యేక గుర్తింపును సంపాదించుకున్నాయి. అయితే, మీరు క్లాసిక్ లుక్ కోరుకుంటున్నారా లేదా స్పోర్టీ వేగాన్ని ఇష్టపడుతున్నారా అనే దానిపై మీ ఎంపిక ఆధారపడి ఉంటుంది.

రాయల్ ఎన్ఫీల్డ్ ఇంటర్‌సెప్టర్ 650: పాతకాలపు క్లాసిక్ డిజైన్‌తో వచ్చే ఈ బైక్ ఓ ఫర్‌ఫెక్ట్ రెట్రో రోడ్‌స్టర్. దీనిలోని 648 సీసీ ఎయిర్-ఆయిల్ కూల్డ్ ఇంజిన్ 47 బీహెచ్‌పీ శక్తిని ఉత్పత్తి చేస్తుంది. నగర ట్రాఫిక్‌లోనైనా లేదా హైవేలపై వేగంగా వెళ్లడానికైనా ఇది చాలా సౌకర్యవంతంగా ఉంటుంది. దీని ఎక్స్-షోరూమ్ ధర సుమారు రూ. 3.32 లక్షల నుంచి రూ.3.66 లక్షల వరకు ఉంటుంది. లీటరుకు 23-25 కిలోమీటర్ల మైలేజీనిచ్చే ఈ వాహనం, రోజూవారీ ప్రయాణాలకు, వారాంతపు విహారయాత్రలకు ఉత్తమమైనది.

రాయల్ ఎన్ఫీల్డ్ కాంటినెంటల్ జీటీ 650: ఇది ఇంటర్‌సెప్టర్ మోడల్‌కు కొంచెం స్పోర్టీ రూపం అని చెప్పవచ్చు. దీని రూపం, కూర్చునే విధానం ఒక రేసింగ్ బైక్‌ను తలపిస్తుంది. యువతను ఆకర్షించే కేఫ్ రేసర్ డిజైన్ దీని ప్రత్యేకత. దీని ప్రారంభ ధర దాదాపు రూ. 3.53 లక్షల నుంచి మొదలవుతుంది. మీరు స్టైల్, థ్రిల్‌ను ఇష్టపడే వారైతే, ఈ వాహనం మీకు సరిగ్గా సరిపోతుంది. అయితే, సుదీర్ఘ ప్రయాణాల్లో ఇంటర్‌సెప్టర్ అంత సౌకర్యాన్ని ఇది ఇవ్వకపోవచ్చు.

కవాసకి నింజా 650: మీకు అపరిమితమైన వేగం, అత్యాధునిక సాంకేతికత కావాలంటే కవాసకి నింజా 650 కంటే మెరుగైనది మరొకటి లేదు. దీని 649 సీసీ లిక్విడ్ కూల్డ్ ఇంజిన్ ఏకంగా 68 పీఎస్ శక్తిని విడుదల చేస్తుంది. కేవలం కొన్ని సెకన్లలోనే 0 నుంచి 100 కిలోమీటర్ల వేగాన్ని అందుకోగలదు. దీని ధర రూ. 7.91 లక్షలుగా ఉంది. అధిక ధర అయినప్పటికీ, దీనిలోని టీఎఫ్టీ డిస్ప్లే, ట్రాక్షన్ కంట్రోల్, ప్రీమియం బ్రేకింగ్ సిస్టమ్ దీనిని ప్రత్యేకం చేస్తాయి.

మీ బడ్జెట్, సౌకర్యాన్ని బట్టి రాయల్ ఎన్ఫీల్డ్ ఇంటర్‌సెప్టర్ 650ని ఎంచుకోవచ్చు. రూపానికి ప్రాధాన్యత ఇచ్చేవారు కాంటినెంటల్ జీటీని, అత్యుత్తమ పనితీరు కావాలనుకునే వారు నింజా 650ని పరిశీలించవచ్చు. ఏది ఏమైనప్పటికీ, కొనుగోలు చేసే ముందు ఒకసారి టెస్ట్ రైడ్ చేయడం మర్చిపోకండి.