Safety Tips: కారులో మొబైల్ ఛార్జింగ్ పెడుతున్నారా? ఈ తప్పు చేస్తే భారీ మూల్యం చెల్లించుకోవాల్సిందే

Safety Tips: కారులో ప్రయాణిస్తున్నప్పుడు మొబైల్ ఛార్జ్ చేసుకోవడం ఎంతో సులువుగా అనిపిస్తుంది. సరైన అవగాహన లేకుండా చౌకబారు ఛార్జర్లు వాడటం, కారు ఆపిన తర్వాత కూడా ఫోన్ ఛార్జింగ్‌లోనే ఉంచడం వల్ల మీ ఖరీదైన ఫోన్‌తో పాటు కారు బ్యాటరీ కూడా పాడైపోయే తీవ్ర ప్రమాదం ఉంది. ప్రయాణాల్లో నేవిగేషన్ చూడటానికి, పాటలు వినడానికి ఫోన్ ఛార్జింగ్ ఎంతో అవసరం. ఈ క్రమంలో మార్కెట్లో దొరికే క్వాలిటీ లేని చౌకబారు కార్ ఛార్జర్లను కొనడం మొదటి పెద్ద పొరపాటు. క్వాలిటీ లేని ఛార్జర్లు వోల్టేజ్ హెచ్చుతగ్గులను తట్టుకోలేవు. విద్యుత్ ప్రవాహాన్ని సరిగ్గా నిరోధించలేకపోవడం వల్ల ఫోన్ విపరీతంగా వేడెక్కిపోతుంది. కారులోని ఎలక్ట్రికల్ వ్యవస్థలో షార్ట్ సర్క్యూట్ ఏర్పడి వైరింగ్ దెబ్బతినే ముప్పు కూడా ఉంది. బ్రాండెడ్, నమ్మకమైన కంపెనీల ఛార్జర్లను మాత్రమే వాడటం శ్రేయస్కరం.

కారు స్టార్ట్ చేయకముందే ఛార్జింగ్ పెట్టొద్దు

చాలామందికి కారులో కూర్చోగానే ముందుగా ఫోన్ ఛార్జింగ్ పెట్టే అలవాటు ఉంటుంది. కారు ఇంజిన్ స్టార్ట్ అయ్యే సమయంలో విద్యుత్ ప్రవాహంలో ఒక్కసారిగా తీవ్రమైన వ్యత్యాసం వస్తుంది. ఆ సమయంలో ఫోన్ ప్లగ్ ఇన్ చేసి ఉంటే వోల్టేజ్ ఫ్లక్చుయేషన్స్ వల్ల ఫోన్ అంతర్గత భాగాలపై అనవసరమైన ఒత్తిడి పడుతుంది. కారు స్టార్ట్ చేసి, ఇంజిన్ స్మూత్‌గా నడుస్తున్న సమయంలో మాత్రమే ఫోన్‌ను ఛార్జర్‌కు అనుసంధానించాలి.

ఎండలో ఛార్జింగ్.. ఫోన్ పేలిపోయే ప్రమాదం

వేసవి కాలంలో లేదా కారులో వేడి ఎక్కువగా ఉన్నప్పుడు తీవ్ర జాగ్రత్తలు అవసరం. ఛార్జింగ్ పెట్టిన ఫోన్‌పై నేరుగా ఎండ పడేలా డాష్‌బోర్డ్ లేదా విండ్‌షీల్డ్ వద్ద ఉంచకూడదు. ఒకవైపు ఛార్జింగ్ అవుతున్నప్పుడు వచ్చే వేడి, మరోవైపు సూర్యరశ్మి తోడై ఫోన్ ఓవర్ హీట్ అవుతుంది. బ్యాటరీ ఉబ్బిపోవడం లేదా పేలిపోయే ప్రమాదం ఎదురవుతుంది. ఫోన్‌ను ఎండ తగలని నీడ ప్రదేశంలో ఉంచాలి. ఫోన్ చాలా వేడిగా అనిపిస్తే వెంటనే ఛార్జింగ్ ఆపివేయడం మంచిది.

ఇంజిన్ ఆపివేశాక ఛార్జర్ తొలగించడం తప్పనిసరి

ప్రయాణం పూర్తయిన తర్వాత కారు ఇంజిన్ ఆపివేసినా కొన్ని కార్లలో ఛార్జింగ్ సాకెట్ పని చేస్తూనే ఉంటుంది. ఆ సమయంలో ఫోన్ లేదా ఛార్జర్ సాకెట్ లోనే ఉండిపోతే కారు బ్యాటరీ మెల్లగా ఖాళీ అయిపోతుంది. తదుపరి సారి మీరు కారు స్టార్ట్ చేయాలనుకున్నప్పుడు బ్యాటరీ డెడ్ అయి ఇబ్బందులు పడాల్సి వస్తుంది. గమ్యస్థానం చేరగానే ఛార్జర్‌ను సాకెట్ నుంచి వేరు చేయడం మంచి అలవాటు.

చిన్నపాటి జాగ్రత్తలు పాటిస్తే ప్రయాణాల్లో సాంకేతిక సమస్యలు రాకుండా కాపాడుకోవచ్చు. నాణ్యమైన ఛార్జర్లు వాడటం, సరైన సమయంలో ప్లగ్ ఇన్ చేయడం ద్వారా మీ మొబైల్, కారు రెండూ సురక్షితంగా ఉంటాయి.