Car Tips: ఎండలో పార్క్ చేసిన కారులో ఈ 5 వస్తువులు పెడుతున్నారా.? అగ్ని ప్ర‌మాదం జ‌ర‌గొచ్చు

Car Tips: వేసవి తీవ్రత రోజురోజుకూ పెరుగుతోంది. కొన్ని చోట్ల ఏకంగా ఉష్ణోగ్రతలు 48 డిగ్రీల సెల్సియస్‌ను దాటుతున్నాయి. ఇలాంటి సమయంలో చాలా మంది కారును ఎండలో పార్క్ చేసి తమ పనులకు వెళ్లిపోతుంటారు. అయితే కారులో కొన్ని వస్తువులను వదిలేయడం పెద్ద ప్రమాదాలకు దారితీయొచ్చని నిపుణులు చెబుతున్నారు.

మొబైల్ ఫోన్లు, పవర్ బ్యాంక్‌లు చాలా ప్రమాదకరం

ఈ రోజుల్లో ప్రతి ఒక్కరి వద్ద మొబైల్ ఫోన్, పవర్ బ్యాంక్, ల్యాప్‌టాప్ వంటి ఎలక్ట్రానిక్ పరికరాలు ఉంటాయి. వీటిలో లిథియం-అయాన్ బ్యాటరీలు ఉపయోగిస్తారు. అధిక ఉష్ణోగ్రతలో ఈ బ్యాటరీల్లో రసాయనిక చర్యలు వేగంగా జరుగుతాయి. దీంతో బ్యాటరీ ఉబ్బిపోవడం, పనిచేయకపోవడం లేదా తీవ్రమైన పరిస్థితుల్లో పేలిపోయే ప్రమాదం కూడా ఉంటుంది. ముఖ్యంగా డ్యాష్‌బోర్డ్‌పై మొబైల్ ఫోన్ ఉంచితే నేరుగా ఎండ తగలడం వల్ల ప్రమాదం మరింత పెరుగుతుంది. అందువల్ల ఎండలో కారును పార్క్ చేసే ముందు మొబైల్, పవర్ బ్యాంక్, ల్యాప్‌టాప్ వంటి పరికరాలను వెంట తీసుకెళ్లడం మంచిది.

ప్లాస్టిక్ వాటర్ బాటిల్ కూడా ప్రమాదానికి కారణం కావచ్చు

నీటి బాటిల్ వల్ల ప్రమాదమా అని చాలామంది ఆశ్చర్యపడవచ్చు. కానీ పారదర్శక ప్లాస్టిక్ బాటిల్‌లో ఉన్న నీరు సూర్యకిరణాలను లెన్స్‌లా ఒకేచోట కేంద్రీకరించే అవకాశం ఉంటుంది. దీంతో కారులోని సీటు లేదా ప్లాస్టిక్ భాగాలపై అధిక వేడి ఏర్పడి కాలిపోయే పరిస్థితి రావచ్చు. అలాగే ఎక్కువసేపు ఎండలో ఉన్న ప్లాస్టిక్ బాటిళ్ల నుంచి కొన్ని రసాయనాలు నీటిలో కలిసే అవకాశం ఉంది. అలాంటి నీటిని తాగడం ఆరోగ్యానికి కూడా మంచిది కాదు.

డ్యాష్‌బోర్డ్‌పై కళ్లద్దాలు ఉంచొద్దు

కారు నడుపుతున్నప్పుడు చాలామంది కళ్లద్దాలను తీసి డ్యాష్‌బోర్డ్‌పై పెడుతుంటారు. అయితే ఇది కూడా ప్రమాదకరమే. కళ్లద్దాల లెన్స్‌లు సూర్యరశ్మిని ఒకే బిందువుపై కేంద్రీకరించే అవకాశం ఉంటుంది. దీంతో ఆ ప్రాంతంలో ఉష్ణోగ్రత పెరిగి కారులోని వస్తువులు దెబ్బతినే ప్రమాదం ఉంటుంది. అంతేకాకుండా అధిక వేడి కారణంగా కళ్లద్దాల ఫ్రేమ్ వంకర తిరగడం లేదా దెబ్బ‌తినే అవ‌కాశాలు ఉంటాయి. కాబట్టి కళ్లద్దాలను ప్రత్యేక కేసులో భద్రపరచడం ఉత్తమం.

శానిటైజర్, డియోడరెంట్ కారులో ఉంచడం ప్రమాదకరం

కరోనా తర్వాత చాలా మంది కారులో హ్యాండ్ శానిటైజర్‌ను తప్పనిసరిగా ఉంచుతున్నారు. అయితే శానిటైజర్‌లో ఆల్కహాల్ ఎక్కువగా ఉంటుంది. ఇది సులభంగా మంటలు అంటుకునే స్వభావం కలిగి ఉంటుంది. అలాగే డియోడరెంట్‌లు, హెయిర్ స్ప్రేలు వంటి ఏరోసోల్ ఉత్పత్తుల్లో అధిక ఒత్తిడితో గ్యాస్ నింపి ఉంటుంది. కారు లోపలి ఉష్ణోగ్రత ఎక్కువైతే ఆ కంటైనర్లు పేలిపోయే ప్రమాదం ఉంది. అందువల్ల వేసవిలో ఈ వస్తువులను కారులో వదిలేయకుండా జాగ్రత్తపడాలి.

లైటర్‌ను కారులో వదిలేయడం పెద్ద ప్రమాదమే

సిగరెట్ లైటర్‌ను చాలామంది కారులో ఉంచుతుంటారు. కానీ వేసవిలో ఇది అత్యంత ప్రమాదకర వస్తువులలో ఒకటి. లైటర్‌లో మండే గ్యాస్ నిల్వ ఉంటుంది. అధిక వేడి కారణంగా లైటర్‌లో ఒత్తిడి పెరిగి అది పేలిపోయే అవకాశం ఉంటుంది. ఒక చిన్న పేలుడు కూడా కారులో మంటలు చెలరేగడానికి కారణమవుతుంది. అందుకే కారును ఎండలో పార్క్ చేసే సమయంలో లైటర్‌లను బయటకు తీసేయాలని నిపుణులు సూచిస్తున్నారు.