Car Insurance : మీ పాత కారులో E20 పెట్రోల్ పోస్తే, మీకు ఇన్సూరెన్స్ రాదా.?

మీరు ఏప్రిల్ 2023 కంటే ముందు కొనుగోలు చేసిన పాత కారును వాడుతున్నారా? అయితే పెట్రోల్ బంకుల్లో లభించే E20 ఇంధనం (20% ఇథనాల్, 80% పెట్రోల్ మిశ్రమం) విషయంలో మీరు చాలా జాగ్రత్తగా ఉండాలి. మీ కారు ఇంజిన్‌కు E20 ఇంధనం సపోర్ట్ చేయకపోయినా, దానిని ఉపయోగిస్తే.. భవిష్యత్తులో ఇంజిన్ దెబ్బతిన్నప్పుడు బీమా కంపెనీలు మీ క్లెయిమ్‌ను తిరస్కరించే ప్రమాదం ఉందని ప్రముఖ బీమా సంస్థ 'ఐసీఐసీఐ లాంబార్డ్' (ICICI Lombard) హెచ్చరించింది. వాహన తయారీదారు సిఫార్సు చేయని లేదా వాహనానికి సరిపడని ఇంధనాన్ని ఉపయోగించడాన్ని బీమా నిబంధనల ప్రకారం 'అనుచిత వినియోగం' లేదా 'నిర్లక్ష్యం'గా పరిగణిస్తారు. దీనివల్ల కాలక్రమేణా ఇంజిన్ పాడైతే ఇన్సూరెన్స్ కవరేజీ లభించడం కష్టమవుతుంది.

ఇథనాల్ మిశ్రమ ఇంధనం వల్ల పాత కార్లకు కలిగే హాని

ఇథనాల్‌కు సహజంగానే లోహాలను తుప్పు పట్టించే గుణం ఉంటుంది. E20 ఇంధనానికి అనుకూలంగా లేని పాత వాహనాలలో ఈ పెట్రోల్‌ను వాడటం వల్ల కారులోని ఇంధన పైపులు కాలక్రమేణా దెబ్బతింటాయి. అంతేకాకుండా ఇంజిన్ లోపల ఉండే రబ్బరు సీల్స్, ప్లాస్టిక్ భాగాలు కరిగిపోయే ప్రమాదం ఉంది. దీనివల్ల కాలక్రమేణా ఇంజిన్ లోపలి ముఖ్యమైన భాగాలు త్వరగా అరిగిపోతాయి. ఈ నష్టం వెంటనే బయటకు కనిపించకపోయినా, దీర్ఘకాలంలో ఇంజిన్‌ను పూర్తిగా నిర్వీర్యం చేస్తుంది.

ప్రభుత్వ నిబంధనలు - ఇన్సూరెన్స్ కంపెనీల రూల్స్

E20 ఇంధనాన్ని ఉపయోగించడం వల్ల మీ వాహన బీమా పాలసీ పూర్తిగా రద్దు కాదని ప్రభుత్వం స్పష్టం చేసినప్పటికీ, ఆ ఇంధనం వల్ల కలిగే ప్రతి నష్టానికి బీమా వర్తిస్తుందని దీని అర్థం కాదు. సాధారణ మోటార్ ఇన్సూరెన్స్ పాలసీలు సాధారణంగా ఇటువంటి పర్యవసాన నష్టాన్ని (అంటే ఒక తప్పుడు అలవాటు వల్ల కాలక్రమేణా నెమ్మదిగా సంభవించే నష్టం) కవర్ చేయవు. అందువల్ల మీ కారు E20 ఇంధనానికి అనుకూలంగా ఉందో లేదో తెలుసుకోవడానికి మీ కారు మాన్యువల్‌ను తనిఖీ చేయాలని లేదా డీలర్‌ను సంప్రదించాలని కంపెనీ సలహా ఇస్తోంది.

సోషల్ మీడియాలో కారు యజమానుల అసంతృప్తి

భారత ఆటోమొబైల్ పరిశ్రమ నిబంధనల ప్రకారం ఏప్రిల్ 2023 నుండి తయారవుతున్న వాహనాలను E20 ఇంధనానికి అనుకూలంగా మార్చి విక్రయిస్తున్నారు. అయితే అంతకు ముందు తయారైన లక్షలాది వాహనాలు దీనికి అనుకూలమైనవి కావు. ముఖ్యంగా యూరోపియన్ బ్రాండ్ల కార్లను వాడుతున్న చాలా మంది యజమానులు E20 పెట్రోల్ వల్ల తమ కార్ల ఇంజన్లు, ఎలక్ట్రానిక్ భాగాలలో సాంకేతిక సమస్యలు తలెత్తుతున్నాయని సోషల్ మీడియా వేదికగా ఆందోళన వ్యక్తం చేస్తున్నారు. కాబట్టి మీ వాహనం E20 ఇంధనం కోసం రూపొందించబడకపోతే, బంకుల్లో పెట్రోల్ పోయించేటప్పుడు కాస్త జాగ్రత్తగా వ్యవహరించడం ఉత్తమం. లేదంటే భారీ ఖర్చుతో కూడుకున్న ఇంజిన్ రిపేర్ల భారాన్ని ఇన్సూరెన్స్ సహాయం లేకుండా మీరే సొంతంగా భరించాల్సి రావచ్చు.