Honda: బైక్ కొనాలని ఉందా?.. మార్కెట్‌ను షేక్ చేయడానికి వస్తున్న హోండా 4 కొత్త మోడళ్లు

Honda: భారత టూ వీలర్ దిగ్గజం హోండా మోటార్‌సైకిల్ అండ్ స్కూటర్ ఇండియా అభిమానులకు అదిరిపోయే తీపి కబురు అందిస్తోంది. మార్కెట్లోకి త్వరలోనే అడుగుపెట్టనున్న ADV160 మ్యాక్సీ స్కూటర్‌తో పాటు రెబెల్ 300, XR300L, XR300 ర్యాలీ బైక్‌లకు సంబంధించిన అనధికారిక బుకింగ్స్ దేశవ్యాప్తంగా ఉన్న హోండా బిగ్‌వింగ్ డీలర్‌షిప్‌లలో ప్రారంభమయ్యాయి. దేశంలోని వివిధ ప్రాంతాల్లో ఉన్న బిగ్‌వింగ్ డీలర్లు సోషల్ మీడియా వేదికగా ఈ కొత్త మోడళ్ల బుకింగ్స్ లేదా ఆసక్తి ఉన్న వినియోగదారుల వివరాలు సేకరిస్తున్నట్లు ప్రకటించాయి. ఈ ప్రచారం చూస్తుంటే హోండా తన నూతన వాహనాలను భారత రోడ్లపైకి తీసుకొచ్చేందుకు వేగంగా అడుగులు వేస్తున్నట్లు స్పష్టమవుతోంది. కంపెనీ ఇప్పటివరకు అధికారిక ధరలు, లాంచ్ తేదీ లేదా బుకింగ్ మొత్తాన్ని వెల్లడించలేదు. ఈ క్రమంలో డీలర్ల వద్ద లభించే అవకాశాన్ని కేవలం వినియోగదారుల ఆసక్తి అంచనా వేసే ప్రక్రియగానే చూడాల్సి ఉంటుంది.

భారత మార్కెట్లో హోండా నుంచి రాబోతున్న తొలి అడ్వెంచర్ స్టైల్ మ్యాక్సీ స్కూటర్‌గా ADV160 నిలవనుంది. ఇందులో 156.9cc లిక్విడ్-కూల్డ్ ఇంజిన్‌ను పొందుపరిచారు. ఈ వాహనం E85 ఫ్లెక్స్-ఫ్యూయెల్‌కు కూడా మద్దతు ఇస్తుంది. స్కూటర్‌లో 27 లీటర్ల విశాలమైన అండర్‌సీట్ స్టోరేజ్, TFT ఇన్‌స్ట్రుమెంట్ కన్సోల్, రోడ్‌సింక్ యాప్, టర్న్-బై-టర్న్ నావిగేషన్ వంటి అత్యాధునిక సదుపాయాలు ఉన్నాయి. రెండు చక్రాలకు డిస్క్ బ్రేకులు, సింగిల్-ఛానల్ ఏబీఎస్ భద్రతను ఇస్తాయి. భారత్‌లోనే దీనిని తయారు చేసేందుకు ప్లాన్ చేస్తుండటం వల్ల ధర అందుబాటులోనే ఉంటే అవకాశం ఉంది.

సాహస ప్రయాణాలు ఇష్టపడే వారి కోసం హోండా XR300L, XR300 ర్యాలీ మోడళ్లను తీర్చిదిద్దింది. ఈ రెండింటిలోనూ ఆయిల్ కూలర్‌తో కూడిన 293.5cc ఎయిర్-కూల్డ్ ఇంజిన్‌ను అందించారు. సాధారణ ప్రయాణాలతో పాటు కొండలు, రాళ్ల బాటల్లో ప్రయాణించడానికి XR300L మోడల్ ఉపయోగపడుతుంది. ఇందులో ప్రో-లింక్ రియర్ సస్పెన్షన్, స్విచబుల్ డ్యూయల్-ఛానల్ ఏబీఎస్ అమర్చారు. మరోవైపు XR300 ర్యాలీ మోడల్‌ను ప్రత్యేకమైన రేసింగ్ బాడీవర్క్, విండ్ ప్రొటెక్షన్, దూరప్రాంత ప్రయాణాలకు వీలుగా సుఖవంతమైన సీటింగ్ పొజిషన్‌తో డిజైన్ చేశారు.

యువతను ఆకట్టుకునేందుకు కంపెనీ రెబెల్ 300 పేరుతో ఎంట్రీ-లెవల్ క్రూజర్ బైక్‌ను తీసుకువస్తోంది. ఇందులో 286cc లిక్విడ్-కూల్డ్ సింగిల్-సిలిండర్ ఇంజిన్ ఉంటుంది. తక్కువ సీటు ఎత్తు, బాబర్ శైలి డిజైన్‌తో ఈ బైక్ రోడ్డుపై ప్రత్యేక ఆకర్షణగా నిలుస్తుంది. ఇది స్టాండర్డ్, ఈ-క్లచ్ వేరియంట్లలో లభించే వీలుంది. ఎల్‌ఈడీ ప్రొజెక్టర్ హెడ్‌ల్యాంప్, టీఎఫ్‌టీ డిస్‌ప్లే, రోడ్‌సింక్ కనెక్టివిటీ, డ్యూయల్-ఛానల్ ఏబీఎస్ వంటి అధునాతన హంగులు ఇందులో ఉన్నాయి. గత నెలలోనే హోండా ఈ కొత్త వాహనాలను ప్రదర్శించినప్పటికీ, దశలవారీగా భారత మార్కెట్లో విడుదల చేయనున్నట్లు ప్రకటించింది. కస్టమర్లు డీలర్ల వద్ద ముందస్తు సమాచారం తీసుకుంటూనే, అధికారిక ధరలు ప్రకటన వచ్చే వరకు వేచి చూడటం మంచిది.