Honda: హైబ్రిడ్ కార్లకు పెరుగుతున్న డిమాండ్.. పెట్రోల్ వేరియంట్‌ను నిలిపివేసిన హోండా

Honda: ప్రముఖ కార్ల తయారీ సంస్థ హోండా తన పాపులర్ ఎస్‌యూవీ CR-V విషయంలో కీలక నిర్ణయం తీసుకుంది. తర్వాతి తరం మోడల్‌ను పూర్తిగా హైబ్రిడ్ పవర్ట్రెయిన్‌తోనే తీసుకురానున్నట్లు ప్రకటించింది. దీంతో కొత్త CR-Vలో సాధారణ పెట్రోల్ ఇంజిన్ ఆప్షన్ ఉండదు. 2028 మోడల్‌గా రానున్న ఈ కారు 2027లో మార్కెట్లోకి వచ్చే అవకాశం ఉంది. కొత్త డిజైన్‌తో పాటు నెక్స్ట్ జనరేషన్ ప్లాట్‌ఫామ్, మోడ్రన్ హైబ్రిడ్ టెక్నాలజీని ఇందులో అందించనున్నారు. 2027లో CR-V తన 30వ వార్షికోత్సవాన్ని జరుపుకోనుండటం కూడా ఈ కొత్త మోడల్‌కు ప్రత్యేకతగా నిలవనుంది.

ఐదో తరం హైబ్రిడ్ టెక్నాలజీతో కొత్త CR-V

కొత్త హోండా CR-Vలో ఐదో తరం రెండు మోటార్ల హైబ్రిడ్ వ్యవస్థను ఉపయోగించనున్నారు. ప్రస్తుతం ఉన్న హైబ్రిడ్ టెక్నాలజీతో పోలిస్తే ఇందులో పనితీరు, ఇంధన సామర్థ్యం మెరుగుపడేలా మార్పులు చేశారు. ఇంజిన్ అత్యంత సమర్థంగా పనిచేసే పరిధిని పెంచడంతో పాటు, హైబ్రిడ్ యూనిట్ డ్రైవింగ్ సామర్థ్యాన్ని కూడా మెరుగుపరిచినట్లు హోండా వెల్లడించింది. కొత్త మోడల్‌లో ఇంధన సామర్థ్యం 10 శాతానికి పైగా పెరగాలని కంపెనీ లక్ష్యంగా పెట్టుకుంది. అంతేకాదు, కొత్తగా అభివృద్ధి చేసిన ఎలక్ట్రిక్ ఆల్ వీల్ డ్రైవ్ (AWD) వ్యవస్థను కూడా అందించనున్నారు. దీనివల్ల మోటార్ల నియంత్రణ మరింత కచ్చితంగా, వేగంగా ఉండనుంది.

పెట్రోల్ ఇంజిన్‌కు గుడ్‌బై.. ప్రస్తుతం ఎలా ఉందంటే?

ప్రస్తుతం అమెరికా మార్కెట్లో హోండా CR-V పెట్రోల్, హైబ్రిడ్ రెండు రకాల ఇంజిన్ ఆప్షన్లతో అందుబాటులో ఉంది. పెట్రోల్ వేరియంట్‌లో 1.5 లీటర్ టర్బోచార్జ్డ్ ఇంజిన్ ఉంటుంది. ఇది 190 హార్స్‌పవర్ శక్తిని, 243 ఎన్ఎం టార్క్‌ను ఉత్పత్తి చేస్తుంది. CVT గేర్‌బాక్స్‌తో ఈ ఇంజిన్ పనిచేస్తుంది. అయితే తర్వాతి తరం CR-Vలో ఈ సాధారణ పెట్రోల్ ఇంజిన్‌ను కొనసాగించబోమని హోండా స్పష్టం చేసింది. ప్రస్తుతం ఉన్న హైబ్రిడ్ మోడల్‌లో 2.0 లీటర్ పెట్రోల్ ఇంజిన్‌తో పాటు ఎలక్ట్రిక్ మోటార్ ఉంటాయి. ఈ వ్యవస్థ కలిపి 204 హార్స్‌పవర్ శక్తిని అందిస్తుంది. e-CVT ట్రాన్స్‌మిషన్‌తో ఇది పనిచేస్తుంది. కొత్త హైబ్రిడ్ వ్యవస్థకు సంబంధించిన పూర్తి పవర్ వివరాలను హోండా ఇంకా వెల్లడించలేదు.

అమెరికాలో 10 రెట్లు పెరిగిన హైబ్రిడ్ CR-V అమ్మకాలు

హోండా ఈ నిర్ణయం తీసుకోవడానికి అమెరికా మార్కెట్లో హైబ్రిడ్ కార్లకు పెరుగుతున్న ఆదరణ కూడా ఒక కారణం. 2020లో హైబ్రిడ్ మోడల్ పరిచయమైనప్పటి నుంచి CR-V హైబ్రిడ్ వార్షిక అమ్మకాలు దాదాపు 10 రెట్లు పెరిగాయి. ప్రస్తుతం అమెరికాలో CR-V అమ్మకాలలో హైబ్రిడ్ మోడళ్ల వాటా 50 శాతానికి పైగా ఉంది. 2024లో 2,03,424 హైబ్రిడ్ CR-V కార్లు అమ్ముడవగా, 2025లో ఈ సంఖ్య 2,18,088కు చేరింది. అమెరికాలో హోండా మొత్తం కార్ల అమ్మకాల్లో హైబ్రిడ్ మోడళ్ల వాటా కూడా దాదాపు 30 శాతంగా ఉంది. CR-V వరుసగా మూడో ఏడాది 4 లక్షలకు పైగా యూనిట్ల అమ్మకాలను నమోదు చేసే దిశగా వెళ్తోందని కంపెనీ తెలిపింది.

మరింత మెరుగైన డ్రైవింగ్ అనుభవం

కొత్త CR-Vలో హైబ్రిడ్ ఇంజిన్‌తో పాటు పూర్తిగా కొత్త ప్లాట్‌ఫామ్‌ను కూడా పరిచయం చేయనున్నారు. కారు బాడీ మరింత దృఢంగా ఉండేలా, అదే సమయంలో బరువు తగ్గేలా ఈ ప్లాట్‌ఫామ్‌ను రూపొందిస్తున్నట్లు హోండా వెల్లడించింది. మాడ్యులర్ నిర్మాణం వల్ల విడిభాగాలను ఇతర మోడళ్లతో పంచుకునే అవకాశం కూడా ఉంటుంది. ఉత్తర అమెరికా మార్కెట్‌లో 2030 నాటికి మరిన్ని హైబ్రిడ్ మోడళ్లను తీసుకురావాలని హోండా ప్రణాళికలు సిద్ధం చేస్తోంది. ఈ కొత్త CR-V ఆ ప్రణాళికలో తొలి ముఖ్యమైన మోడల్‌గా నిలవనుంది. అయితే ఈ 2028 CR-V అమెరికా మార్కెట్ కోసం ప్రకటించిన మోడల్. భారత్‌లో దీన్ని ఎప్పుడు తీసుకొస్తారనే విషయంపై హోండా ఇంకా ఎలాంటి ప్రకటన చేయలేదు.