Honda: ఆటోమొబైల్ మార్కెట్లో హోండా సంచలనం.. భారత్‌లోకి మళ్లీ రానున్న పాపులర్ ఎస్‌యూవీ

Honda: జాపనీస్ కార్ల తయారీ దిగ్గజం హోండా భారతీయ మార్కెట్లో మరోసారి సంచలనం సృష్టించడానికి సిద్ధమవుతోంది. నివేదికల ప్రకారం కంపెనీ తన అత్యంత ప్రజాదరణ పొందిన ప్రీమియం ఎస్‌యూవీ CR-V మోడల్‌ను మళ్లీ భారత్‌కు తీసుకురానుంది. భవిష్యత్తులో ఇది కంపెనీకి చెందిన ఫ్లాగ్‌షిప్ ఎస్‌యూవీగా నిలవనుంది. గతంలో మంచి ఆదరణ దక్కించుకున్న ఈ వాహనం, సరికొత్త హంగులతో రీ-ఎంట్రీ ఇస్తుండటంతో ఆటోమొబైల్ రంగంలో భారీ చర్చ జరుగుతోంది.

2020లో నిలిచిపోయిన ప్రయాణం

హోండా సంస్థ తొలిసారిగా 2003లో సిఆర్-వి కారును భారత మార్కెట్లోకి పరిచయం చేసింది. ఆ తర్వాత కాలక్రమేణా పలు కొత్త జనరేషన్ మోడళ్లను తీసుకువచ్చింది. అయితే గ్రేటర్ నోయిడా ప్లాంట్‌లో ఉత్పత్తి నిలిచిపోవడంతో 2020లో ఈ కారు ప్రొడక్షన్ అధికారికంగా ఆగిపోయింది. ఇప్పుడు కంపెనీ CBU మార్గం ద్వారా కొత్త జనరేషన్ సిఆర్-విని దేశానికి తీసుకురావాలని భావిస్తోంది. ఈసారి అద్భుతమైన స్ట్రాంగ్ హైబ్రిడ్ పవర్‌ట్రెయిన్‌తో ఇది మార్కెట్లోకి అడుగుపెట్టే అవకాశం ఉంది.

పవర్ఫుల్ ఇంజిన్, మోడ్రన్ ఫీచర్లు

ఈ కొత్త ఎస్‌యూవీలో 2.0-లీటర్ ఫోర్-సిలిండర్ పెట్రోల్ ఇంజిన్ తో పాటు అత్యాధునిక టూ-మోటర్ ఈ-హైబ్రిడ్ సిస్టమ్ లభించనుంది. ఇది సుమారు 204 bhp పవర్, 334 Nm టార్క్‌ను ఉత్పత్తి చేసే సామర్థ్యం కలిగి ఉంటుంది. ఇక లోపలి భాగంలో 15-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, డిజిటల్ ఇన్‌స్ట్రుమెంట్ క్లస్టర్, పనోరమిక్ సన్ రూఫ్ వంటి మోడర్న్ ఫీచర్లు ఉంటాయి. సేఫ్టీ కోసం లెవెల్-2 ఏడీఏఎస్ టెక్నాలజీతో పాటు 10 ఎయిర్‌బ్యాగ్‌ల రక్షణ లభించే అవకాశం ఉంది.

ప్రీమియం ధరలో లగ్జరీ ఎస్‌యూవీ

ప్రస్తుతం భారత మార్కెట్లో హోండా ఎలివేట్, జెడ్ఆర్-వి వంటి కార్లు అందుబాటులో ఉన్నాయి. సిఆర్-వి రాకతో కంపెనీ స్థానం మరింత బలపడుతుంది. పూర్తిగా విదేశాల నుంచి దిగుమతి చేసుకుని విక్రయించనుండటం వల్ల దీని ధర కొంత ప్రీమియంగా ఉండే అవకాశం ఉంది. లగ్జరీ ఫీచర్లు, శక్తివంతమైన పనితీరు కోరుకునే కస్టమర్లకు ఈ ఎస్‍యూవీ అద్భుతమైన ఎంపికగా నిలుస్తుంది. రాబోయే రోజుల్లో ఈ కారు విడుదలకు సంబంధించి మరిన్ని అధికారిక ప్రకటనలు వెలువడే అవకాశం ఉంది.