JSW Electric SUV: థార్ రాక్స్ కు కాలం చెల్లినట్లేనా.. జేఎస్‌డబ్ల్యూ నుంచి కొత్త ఎలక్ట్రిక్ ఎస్‌యూవీ

JSW Electric SUV: భారతీయ ఆటోమొబైల్ మార్కెట్‌లోకి అడుగుపెట్టడానికి జేఎస్‌డబ్ల్యూ మోటార్స్ వేగంగా అడుగులు వేస్తోంది. ఇందులో భాగంగా కంపెనీ తన భాగస్వామ్య సంస్థ అయిన చెరీకి చెందిన iCaur V23 ఆధారంగా రూపొందించిన కొత్త ఎలక్ట్రిక్ ఎస్‌యూవీ డిజైన్‌ను తాజాగా భారతదేశంలో పేటెంట్ చేయించింది. జేఎస్‌డబ్ల్యూ బ్రాండ్ కింద భారత్‌లో విడుదల కానున్న ఈ కొత్త ఈవీ మోడల్, రోడ్లపై సంచలనం సృష్టించడానికి సిద్ధమవుతోంది. ముఖ్యంగా పవర్‌ఫుల్ ఆఫ్‌-రోడింగ్ ఎస్‌యూవీల మార్కెట్‌లో ఇది ప్రత్యర్థులకు గట్టి పోటీ ఇవ్వనుంది.

ఆకట్టుకునే బాక్సీ డిజైన్

ఈ కొత్త ఎస్‌యూవీ డిజైన్ గ్లోబల్ మోడల్ అయిన iCaur V23 మాదిరిగానే చాలా బాక్సీగా, రగ్గడ్‌గా ఉంటుంది. ఇందులో రౌండ్ ఎల్ఈడీ హెడ్‌లైట్లు, డీఆర్‌ఎల్‌లు ఇవ్వగా, క్లోజ్డ్ గ్రిల్ డిజైన్‌లో కొన్ని మార్పులు చేశారు. సైడ్ ప్రొఫైల్‌లో ఫ్లేర్డ్ వీల్ ఆర్చెస్, సైడ్ స్టెప్స్, కొత్త డిజైన్ గల అలాయ్ వీల్స్ అమర్చారు. అంతేకాకుండా గ్లోబల్ మోడల్‌లో లేని పనోరమిక్ సన్‌రూఫ్ ఫీచర్‌ను ఇండియన్ వర్షన్‌లో అందించేలా డిజైన్ చేశారు. వెనుక వైపు స్లిమ్ ఎల్ఈడీ టెయిల్‌లైట్లు, టెయిల్‌గేట్‌పై స్టోరేజ్ బాక్స్ ఇవ్వడం దీని లుక్‌ను మరింత పెంచుతుంది.

అత్యాధునిక 5-సీటర్ కేబిన్

ఈ ఎస్‌యూవీ ఇంటీరియర్ కూడా చాలా మోడ్రన్‌గా, మినిమల్ డిజైన్‌తో రానుంది. ఇందులో 5-సీటర్ లేఅవుట్‌తో కూడిన డ్యాష్‌బోర్డ్ ఉంటుంది. ప్రత్యేకంగా ఇందులో ట్రెడిషనల్ డ్రైవర్ డిస్‌ప్లే ఉండదు, బదులుగా అన్ని ముఖ్యమైన సమాచారం కోసం పెద్దదైన 15.4-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్‌ను ఇస్తారు. అలాగే 3-స్పోక్ స్టెరింగ్ వీల్, రొటరీ కంట్రోల్స్ వంటి ఫీచర్లు ఉంటాయి. భారతీయ మార్కెట్ రుచికి తగినట్లుగా కేబిన్ థీమ్, సీట్ అప్హోల్స్ట్రీలో తగిన మార్పులు చేసే అవకాశం ఉంది.

పవర్ఫుల్ బ్యాటరీ, ఏడబ్ల్యూడీ ఆప్షన్

అంతర్జాతీయ మార్కెట్లో ఈ కారు 59.93kWh, 81.76kWh అనే రెండు బ్యాటరీ ప్యాక్ ఆప్షన్లతో లభిస్తోంది. చిన్న బ్యాటరీ వెర్షన్‌లో వెనుక చక్రాల డ్రైవ్, పెద్ద బ్యాటరీ మోడల్‌లో డ్యూయల్-మోటార్ ఏడబ్ల్యూడీ సెటప్ ఉంటాయి. ఈ పెద్ద బ్యాటరీ మోడల్ కంబైండ్ పవర్ అవుట్‌పుట్ 208hp, 292Nm టార్గెట్‌ను అందిస్తుంది. భారత్‌లో వచ్చే మోడల్‌లో కూడా డ్యూయల్-మోటార్ AWD సెటప్ ఇచ్చే ఛాన్స్ ఉందని ఆటోమొబైల్ వర్గాలు భావిస్తున్నాయి.

మహీంద్రా థార్ రాక్స్‌కు గట్టి పోటీ

ఈ ఎలక్ట్రిక్ ఎస్‌యూవీని భారత్‌లో ఒక పవర్‌ఫుల్ ఎలక్ట్రిక్ ఆఫ్-రోడింగ్ ఎస్‌యూవీగా లాంచ్ చేయనున్నారు. మార్కెట్లో ఇది ప్రధానంగా మహీంద్రా థార్ రాక్స్, ఫోర్స్ గుర్ఖా 5-డోర్ వంటి పాపులర్ మోడళ్లకు గట్టి పోటీ ఇస్తుందని అంచనా వేస్తున్నారు. దీని ఎక్స్ షోరూం ధర సుమారు రూ.20 లక్షల వరకు ఉండవచ్చని తెలుస్తోంది. అయితే దీని అధికారిక లాంచ్ డేట్, పూర్తి ధరల వివరాలు త్వరలోనే వెలువడే అవకాశం ఉంది.