Maruti: క్లచ్ టెన్షన్ లేదు, ఫుల్ మైలేజ్ గ్యారెంటీ.. మారుతి నుంచి అదిరిపోయే కారు లాంచ్

Maruti: భారతీయ ఆటోమొబైల్ మార్కెట్లో అత్యంత ఆదరణ పొందిన కార్లలో మారుతి సుజుకి డిజైర్ ఎప్పుడూ ముందుంటుంది. దేశంలోనే నంబర్-వన్ సెడాన్ కార్‌గా పేరుగాంచిన డిజైర్‌లో కంపెనీ తాజాగా ఒక సరికొత్త, అత్యంత ముఖ్యమైన వేరియంట్‌ను మార్కెట్లోకి తీసుకువచ్చింది. ఇప్పటివరకు మ్యాన్యువల్ గేర్‌బాక్స్‌తో మాత్రమే లభిస్తున్న CNG ఆప్షన్‌లో, ఇప్పుడు కంపెనీ ఆటోమేటిక్ టెక్నాలజీని జతచేసింది. దీనివల్ల డ్రైవింగ్ మరింత ఈజీగా మారడంతో పాటు వినియోగదారులకు అద్భుతమైన డ్రైవింగ్ అనుభూతి లభించనుంది.

ప్రస్తుతం కొత్తగా లాంచ్ చేసిన మారుతి డిజైర్ VXI వేరియంట్‌ను CNG AMT ఆప్షన్‌లో కొనుగోలు చేయవచ్చు. ఈ అద్భుతమైన కారు ఎక్స్ షోరూం ధరను రూ.8.53 లక్షలుగా నిర్ణయించారు. ముఖ్యంగా రోజువారీ ఆఫీస్ ప్రయాణాలు చేసేవారికి రద్దీగా ఉండే సిటీ ట్రాఫిక్‌లో తిరిగే వారికి ఈ ఆటోమేటిక్ CNG కారు ఒక గొప్ప వరమని చెప్పవచ్చు. ఇక మైలేజ్ విషయానికి వస్తే, కంపెనీ క్లెయిమ్ చేస్తున్నదాని ప్రకారం ఈ కారు కేవలం 1 కిలో CNGకి ఏకంగా 36.47 కిలోమీటర్ల మైలేజీని అందిస్తుంది. ఈ అసాధారణమైన మైలేజ్ గణాంకాలతో ఇది దేశంలోనే అత్యధిక మైలేజ్ ఇచ్చే CNG కార్ల జాబితాలో నిలుస్తోంది.

ఈ కారు టెక్నికల్ స్పెసిఫికేషన్స్ పరిశీలిస్తే, ఇందులో అత్యాధునిక 1.2-లీటర్ Z12-సిరీస్ త్రీ-సిలిండర్ ఇంజిన్‌ను అమర్చారు. ఇది S-CNG సిస్టమ్, 5-స్పీడ్ AMT ట్రాన్స్‌మిషన్‌తో వస్తుంది. పెట్రోల్ మోడ్‌లో ఈ ఇంజిన్ 82.93 PS పవర్‌ను, 112.4 Nm టార్గెట్‌ను ఉత్పత్తి చేస్తుంది. అలాగే CNG మోడ్‌లో 69.75 PS పవర్, 101.8 Nm టార్గెట్‌ను అందిస్తుంది. ఇందులో 37 లీటర్ల పెట్రోల్ ట్యాంక్ తో పాటు 55 లీటర్ల కెపాసిటీ గల CNG సిలిండర్‌ను పొందుపరిచారు. ఆటోమేటిక్ ట్రాన్స్‌మిషన్ ఉండటం వల్ల డ్రైవర్లు పదే పదే క్లచ్ తొక్కాల్సిన అవసరం ఉండదు, ఇది ప్రయాణాన్ని చాలా రిలాక్స్‌డ్‌గా మారుస్తుంది.

కారు ఫీచర్స్ విషయానికి వస్తే.. కంపెనీ ఇందులో ఎలాంటి మార్పులు చేయలేదు. పాత మోడళ్ల మాదిరిగానే 9-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, వైర్‌లెస్ ఆపిల్ కార్‌ప్లే, ఆండ్రాయిడ్ ఆటో, క్రూయిజ్ కంట్రోల్, సింగిల్-పాన్ సన్ రూఫ్ వంటి ప్రీమియం ఫీచర్లు ఉన్నాయి. ఇక సేఫ్టీ పరంగా చూస్తే, ఇందులో స్టాండర్డ్‌గా 6 ఎయిర్‌బ్యాగ్‌లు, 360-డిగ్రీ కెమెరా, ఎలక్ట్రానిక్ స్టెబిలిటీ కంట్రోల్ వంటి అత్యాధునిక ఫీచర్లు లభిస్తాయి. గ్లోబల్ NCAP క్రాష్ టెస్ట్‌లోనూ ఈ కారు 5-స్టార్ సేఫ్టీ రేటింగ్ సాధించడం విశేషం.