లీటరుకు 34 కిమీల మైలేజ్.. రూ. 3.50 లక్షల బడ్జెట్.. మిడిల్ క్లాస్ డ్రీమ్ కార్ ఇదే!

Maruti Suzuki Alto K10: సొంత కారు అనేది ప్రతి మధ్యతరగతి కుటుంబానికి ఒక ఎమోషన్, ఒక జీవితకాల కల. ఆ కలను అత్యంత తక్కువ ఖర్చుతో, భారీ మైలేజ్‌తో నిజం చేస్తూ భారతీయ ఆటోమొబైల్ మార్కెట్లో సరికొత్త సంచలనం సృష్టించాయి మారుతి సుజుకి ఆల్టో K10, ఎస్-ప్రెస్సో. సరికొత్త అమ్మకాల రికార్డులతో ఈ రెండు కార్లు దూసుకుపోతున్నాయి.

సరికొత్త రికార్డు సృష్టించిన మే సేల్స్ రిపోర్ట్..

మన దేశంలో సాధారణ కుటుంబాల మొదటి ఛాయిస్ ఎప్పుడూ మారుతి సుజుకి వైపే ఉంటుంది. తాజాగా విడుదలైన మే 2026 కార్ల విక్రయాల గణాంకాలు ఈ విషయాన్ని మరోసారి నిరూపించాయి. దేశంలోనే అత్యంత చౌకైన మోడల్స్‌గా గుర్తింపు తెచ్చుకున్న ఆల్టో K10, ఎస్-ప్రెస్సో కార్లను కొనుగోలు చేసేందుకు గత నెలలో వినియోగదారులు ఎగబడ్డారు.

గత నెల మే 2026లో ఈ రెండు మోడల్స్ కలిసి ఏకంగా 16,275 యూనిట్ల నమోదు చేయడం విశేషం. గతేడాది ఇదే నెలలో (మే 2025) వీటి అమ్మకాలు కేవలం 6,776 యూనిట్లుగా మాత్రమే ఉండేవి. అంటే గతేడాదితో పోలిస్తే ఈసారి చిన్న కార్ల విక్రయాలు ఏకంగా రెండింతల కంటే ఎక్కువ పెరగడం ఆటోమొబైల్ రంగాన్ని సైతం ఆశ్చర్యపరిచింది. ఏప్రిల్ నెలలోనే 1.90 లక్షల కార్లను అమ్మి 40 శాతం వార్షిక వృద్ధిని సాధించిన మారుతి, మే నెలలోనూ అదే జోరును కొనసాగించింది.

మధ్యతరగతి రాకుమారుడు: సరికొత్త ఆల్టో K10..

సాధారణ కుటుంబాల అవసరాలను దృష్టిలో ఉంచుకుని రూపుదిద్దుకున్న ఆల్టో K10, ఇప్పుడు సరికొత్త మోడ్రన్ ఫీచర్లతో అలరిస్తోంది. ఇందులో 7 ఇంచుల స్మార్ట్‌ప్లే స్టూడియో టచ్‌స్క్రీన్ ఇన్ఫోటైన్‌మెంట్ సిస్టమ్, డిజిటల్ స్పీడోమీటర్, స్టీరింగ్ మౌంటెడ్ కంట్రోల్స్, కీ‌లెస్ ఎంట్రీ వంటి ఆధునిక వసతులు ఉన్నాయి. ప్రయాణికుల రక్షణకు పెద్దపీట వేస్తూ కంపెనీ ఇందులో స్టాండర్డ్‌గా 6 ఎయిర్‌బ్యాగ్‌లు, ఈబీడీతో కూడిన ఏబీఎస్ బ్రేకింగ్ సిస్టమ్, రివర్స్ పార్కింగ్ సెన్సార్లను అందించింది.

ఇక ఇంజన్ విషయానికి వస్తే, ఇందులో 1.0 లీటర్ నెక్స్ట్-జెన్ కె-సిరీస్ డ్యూయల్ జెట్ పెట్రోల్ ఇంజన్‌ను వాడారు. ఇది 66.6 బీహెచ్‌పీ పవర్, 89 ఎన్ఎమ్ టార్క్‌ను ప్రొడ్యూస్ చేస్తుంది. ఇది 5 స్పీడ్ మాన్యువల్, ఆటోమేటిక్ గేర్‌బాక్స్ ఆప్షన్లలో లభిస్తుంది. పెట్రోల్ వేరియంట్ లీటరుకు 24.39 కిలోమీటర్ల మైలేజ్ ఇస్తుండగా, సీఎన్‌జీ వేరియంట్ ఏకంగా కేజీకి 33.85 కిలోమీటర్ల మైలేజ్ ఇస్తూ జేబుకు అస్సలు భారం కావడం లేదు. దీని ఎక్స్-షోరూమ్ ధర కేవలం రూ. 3.99 లక్షల నుంచి ప్రారంభమై టాప్ మోడల్ రూ. 5.96 లక్షల వరకు ఉంటుంది.

మినీ ఎస్‌యూవీ ఫీలింగ్ ఇచ్చే ఎస్-ప్రెస్సో..

మారుతి సుజుకి నుంచి వచ్చిన మరో అద్భుతమైన బడ్జెట్ కారు ఎస్-ప్రెస్సో. ఎక్కువ గ్రౌండ్ క్లియరెన్స్, మస్కులర్ డిజైన్ కారణంగా ఇది రోడ్డుపై వెళ్తుంటే ఒక చిన్న మినీ ఎస్‌యూవీ కార్‌లో కూర్చున్న అనుభూతిని ఇస్తుంది. దీని ఇంటీరియర్ డిజైన్ చాలా విభిన్నంగా ఉంటుంది. సెంటర్ కన్సోల్‌లో అమర్చిన డిజిటల్ ఇన్‌స్ట్రుమెంట్ క్లస్టర్ కారుకు ప్రత్యేక లుక్‌ను తీసుకువచ్చింది. ఇందులోనూ టచ్‌స్క్రీన్ ఇన్ఫోటైన్‌మెంట్, పవర్ విండోస్, ఎలక్ట్రికల్లీ అడ్జస్టబుల్ ఓఆర్వీఎమ్ వంటి సౌకర్యాలు ఉన్నాయి.

ఎస్-ప్రెస్సోలో కూడా ఆల్టో తరహాలోనే 66.6 బీహెచ్‌పీ పవర్, 89 ఎన్ఎమ్ టార్క్‌ను జనరేట్ చేసే 1.0 లీటర్ పెట్రోల్ ఇంజన్‌ను అందించారు. సిటీ ట్రాఫిక్‌లో ఈ కారును నడపడం చాలా సులభం. మైలేజ్ పరంగా పెట్రోల్ మోడల్ లీటరుకు 24.12 నుంచి 25.30 కిలోమీటర్ల మైలేజ్ ఇస్తుండగా, సీఎన్‌జీ వేరియంట్ కేజీకి 32.73 కిలోమీటర్ల మైలేజ్ ఇస్తుంది. మార్కెట్లో దీని ప్రారంభ ఎక్స్-షోరూమ్ ధర కేవలం రూ. 3.50 లక్షలుగా మాత్రమే ఉంది, అలాగే టాప్ వేరియంట్ ధర రూ. 5.25 లక్షల వరకు ఉంటుంది.

భారీగా పెరుగుతున్న ఇంధన ధరలు, ఖర్చుల మధ్య సామాన్యుడికి తక్కువ ధరలో ఎక్కువ మైలేజ్ ఇచ్చే వాహనాలే శ్రీరామరక్ష. ఆ నమ్మకాన్ని మారుతి సుజుకి ఆల్టో K10, ఎస్-ప్రెస్సోలు మరోసారి నిలబెట్టుకున్నాయి. అందుకే మధ్యతరగతి కుటుంబాల గ్యారేజ్‌లో ఈ చిన్న కార్లు రారాజులుగా వెలుగుతున్నాయి.