Maruti Suzuki: ఆటోమొబైల్ మార్కెట్లో కొత్త చరిత్ర.. 15 లక్షల మంది మనసు దోచుకున్న మారుతి కారు

Maruti Suzuki: భారతీయ ఆటోమొబైల్ మార్కెట్‌లో రికార్డుల మీద రికార్డులు సృష్టిస్తున్న మారుతి సుజుకీ సంస్థ మరో గొప్ప మైలురాయిని సాధించింది. దేశంలోనే అత్యంత ప్రజాదరణ పొందిన కాంపాక్ట్ ఎస్‌యూవీ మోడల్ మారుతి బ్రెజ్జా ఏకంగా 15 లక్షలకు పైగా కార్లను విక్రయించి సరికొత్త చరిత్ర సృష్టించింది. మార్కెట్లోకి వచ్చిననాటి నుంచి ఇప్పటివరకు ఈ కారు దేశంలోని లక్షలాది మంది కుటుంబాలకు మొదటి ఎంపికగా నిలుస్తూ వస్తోంది. ఇటీవల కంపెనీ ఈ కారును మరింత అధునాతన హంగులతో అప్‌డేట్ చేసి మార్కెట్లోకి తీసుకురాగా, విడుదలైన అతి తక్కువ సమయంలోనే ఏకంగా లక్షకు పైగా బుకింగ్స్‌ను సొంతం చేసుకుని తన సత్తా ఏంటో నిరూపించుకుంది.

డిఫరెంట్ ఇంజన్ ఆప్షన్లు

కస్టమర్ల అవసరాలకు తగినట్లుగా మారుతి బ్రెజాలో శక్తివంతమైన ఇంజన్ ఆప్షన్లను అందించారు. ఇందులో మొదటిది 1.0 లీటర్ టర్బో-పెట్రోల్ ఇంజన్ కాగా, రెండోది 1.5 లీటర్ ఫోర్-సిలిండర్ పెట్రోల్ ఇంజన్. ముఖ్యంగా 1.5 లీటర్ ఇంజన్ ఆప్షన్‌లో పెట్రోల్‌తో పాటు సీఎన్‌జీ వేరియంట్ కూడా అందుబాటులో ఉండటం విశేషం. పెట్రోల్ వెర్షన్ సుమారు 17 నుంచి 20 కిలోమీటర్ల మైలేజ్ ఇస్తుండగా, సీఎన్‌జీ మోడల్ అయితే లీటరుకు లేదా కేజీకి 25 కిలోమీటర్లకు పైగా మైలేజ్ అందించి ఇంధన ఖర్చులను భారీగా తగ్గిస్తుంది.

మోడ్రన్ ఫీచర్లు అలాగే టాప్ క్లాస్ సేఫ్టీ

ఈ ఆధునిక ఎస్‌యూవీలో కస్టమర్లను ఆకట్టుకునేలా బోలెడన్ని ఫీచర్లను అమర్చారు. 9 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, వైర్‌లెస్ ఆండ్రాయిడ్ ఆటో, యాపిల్ కార్‌ప్లే, 360-డిగ్రీ కెమెరా, హెడ్-అప్ డిస్‌ప్లే, సన్‌రూఫ్ వంటి హంగులు ఉన్నాయి. ముఖ్యంగా సీఎన్‌జీ మోడళ్లలో అండర్-బాడీ ట్యాగ్ డిజైన్ ఉండటం వల్ల లగేజ్ పెట్టుకోవడానికి అనుకూలంగా పెద్ద బూట్ స్పేస్ లభిస్తుంది. ప్రయాణికుల భద్రత కోసం ఆరు ఎయిర్ బ్యాగులు, ఈఎస్‌పి, హిల్ హోల్డ్ అసిస్ట్, టైర్ ప్రెషర్ మానిటరింగ్ సిస్టమ్ (TPMS) వంటి అధునాతన సేఫ్టీ ఫీచర్లు పొందుపరిచారు.

సరసమైన ధర,, గట్టి పోటీ

మారుతి సుజుకీ బ్రెజా ఎక్స్ షోరూమ్ ప్రారంభ ధర కేవలం రూ.7.50 లక్షల వద్ద మొదలై, టాప్ మోడల్ కొనుగోలుకు రూ.13.70 లక్షల వరకు ఉంటుంది. నాలుగు మీటర్ల కంటే తక్కువ పొడవు ఉండే ఈ కాంపాక్ట్ ఎస్‌యూవీ సెగ్మెంట్‌లో ఇది ఇతర ప్రముఖ కార్లైన టాటా నెక్సన్, హ్యుందాయ్ వెన్యూ, కియా సోనెట్, మహీంద్రా XUV 3XO, స్కోడా కైలాక్ అలాగే నిసాన్ మాగ్నెట్ వంటి మోడళ్లకు గట్టి పోటీ ఇస్తోంది. దేశంలోని ఎంతోమంది యువత, ఆఫీస్ ఉద్యోగులు తమ కలల కారుగా బ్రెజాను ఎంచుకోవడానికి దీని స్టైలిష్ లుక్ ప్రధాన కారణం.