సామాన్యుడి 'లగ్జరీ' కల.. 5-స్టార్ సేఫ్టీతో మారుతి సుజుకి డిజైర్ సరికొత్త రికార్డ్..!

Maruti Suzuki Dzire 2026 Price: ప్రస్తుతం ఆటోమొబైల్ మార్కెట్‌లో ఎస్‌యూవీల హవా నడుస్తున్నప్పటికీ, సెడాన్ విభాగంలో మారుతి సుజుకి డిజైర్ (Maruti Suzuki Dzire) తన తిరుగులేని ఆధిపత్యాన్ని చాటుకుంటోంది. కేవలం ఒక విభాగంలోనే కాకుండా, భారతదేశంలోనే అత్యధికంగా అమ్ముడవుతున్న కారుగా నిలిచి సరికొత్త చరిత్ర సృష్టించింది. ఏప్రిల్ 2026 అమ్మకాల గణాంకాలను పరిశీలిస్తే, డిజైర్ దరిదాపుల్లో కూడా ఏ ఇతర కారు లేకపోవడం విశేషం.

అమ్మకాల్లో అజేయమైన వృద్ధి..

గత ఏడాది ఏప్రిల్ (2025)లో 16,996 యూనిట్లు అమ్ముడవగా, ఈ ఏడాది ఏప్రిల్ 2026 నాటికి ఆ సంఖ్య 23,580 యూనిట్లకు చేరింది. అంటే సుమారు 38.70 శాతం వృద్ధిని నమోదు చేసి, కస్టమర్ల నమ్మకాన్ని మరోసారి నిరూపించుకుంది. ఇదే సమయంలో పోటీలో ఉన్న హ్యుందాయ్ ఆరా, హోండా అమేజ్ వంటి కార్లు అమ్మకాల్లో వెనుకబడిపోయాయి.

మైలేజ్ రాజు: లీటరుకు 33 కి.మీ పైమాటే..!

మధ్యతరగతి ప్రజలు కారు కొనేటప్పుడు ప్రధానంగా చూసేది మైలేజ్. డిజైర్ ఈ విషయంలో అగ్రస్థానంలో ఉంది. దీనిలోని 1.2-లీటర్ 3-సిలిండర్ పెట్రోల్ ఇంజిన్ శక్తివంతమైన పనితీరును ఇస్తుంది. ముఖ్యంగా దీని CNG వేరియంట్ కిలోకు 33.73 కిలోమీటర్ల అద్భుత మైలేజీని అందిస్తూ, సామాన్యుడి జేబుకు ఊరటనిస్తోంది.

సేఫ్టీలో '5-స్టార్' భరోసా..

మారుతి కార్లంటే భద్రత తక్కువ అనే పాత ఆలోచనను కొత్త డిజైర్ తుడిచిపెట్టేసింది. Global NCAP రేటింగ్‌లో ఈ కారు 5-స్టార్ సేఫ్టీ సాధించి అందరినీ ఆశ్చర్యపరిచింది.

6 ఎయిర్‌బ్యాగ్‌లు: అన్ని వేరియంట్లలో స్టాండర్డ్ ఫీచర్‌గా వస్తాయి.

ఈఎస్‌సీ సెన్సార్లు: ఎలక్ట్రానిక్ స్టెబిలిటీ కంట్రోల్, రియర్ పార్కింగ్ సెన్సార్లతో ప్రయాణం మరింత సురక్షితం.

ప్రీమియం ఫీచర్లు.. తక్కువ ధర..

కేవలం మైలేజ్, సేఫ్టీ మాత్రమే కాదు.. అధునాతన ఫీచర్లతో ఈ కారు లగ్జరీ లుక్‌ను ఇస్తుంది:

360-డిగ్రీ కెమెరా: ఈ సెగ్మెంట్‌లోనే మొదటిసారి.

ఎంటర్టైన్మెంట్: 9-అంగుళాల టచ్‌స్క్రీన్, వైర్‌లెస్ ఆపిల్ కార్ ప్లే, ఆండ్రాయిడ్ ఆటో.

సౌకర్యం: సింగిల్ పేన్ సన్‌రూఫ్, క్రూయిజ్ కంట్రోల్, షార్క్ ఫిన్ యాంటెన్నా.

ధర, వేరియంట్లు..

ఇన్ని హంగులు ఉన్నప్పటికీ, ఈ కారు ధరను మారుతి సుజుకి చాలా అందుబాటులో ఉంచింది. దీని ప్రారంభ ఎక్స్‌షోరూమ్ ధర రూ. 6.25 లక్షలు మాత్రమే. ఇది LXi, VXi, ZXi, ZXi Plus వంటి నాలుగు వేరియంట్లలో లభిస్తుంది.