Bajaj Pulsar: సరికొత్త అవతారంలో బజాజ్ పల్సర్.. సూపర్ ఫీచర్లతో అదిరిపోయే ఎంట్రీ

Bajaj Pulsar: బజాజ్ ఆటో తన పాపులర్ పల్సర్ NS200 బైక్‌ను కొత్త సాంకేతిక సదుపాయాలతో అప్‌డేట్ చేసింది. 5 ఇంచుల కలర్ డిస్‌ప్లే, గూగుల్ మ్యాప్స్, రైడింగ్ మోడ్‌లు, ట్రాక్షన్ కంట్రోల్ వంటి ఫీచర్లను జోడించింది. ఇంజిన్ కెపాసిటీ అదే 199.5 సీసీగా ఉన్నప్పటికీ శక్తి పెరిగింది. ఢిల్లీలో ఈ కొత్త మోడల్ ఎక్స్‌షోరూమ్ ధర రూ.1,60,374గా నిర్ణయించారు. పాత డిస్‌ప్లే స్థానంలో 5 ఇంచుల కలర్ టీఎఫ్‌టీ స్క్రీన్ అందించారు. ఇందులో గూగుల్ మ్యాప్స్‌ను అనుసంధానించుకోవచ్చు. దీంతో ప్రయాణంలో వెళ్లాల్సిన దారి వివరాలను బైక్ డిస్‌ప్లేపైనే చూసే సౌకర్యం లభిస్తుంది. ఎలక్ట్రానిక్ థ్రాటిల్ టెక్నాలజీతో పాటు రైడింగ్ మోడ్‌లను కూడా అందించారు. స్పోర్ట్స్ షిఫ్టర్ సాయంతో క్లచ్‌ను ప్రతిసారీ ఉపయోగించకుండా గేర్లు మార్చుకోవచ్చు. ఈ మార్పులు బైక్ వినియోగాన్ని మరింత సులభతరం చేయనున్నాయి.

199.5 సీసీ ఇంజిన్.. పెరిగిన శక్తి

కొత్త పల్సర్ NS200లో సింగిల్ సిలిండర్, నాలుగు వాల్వులతో కూడిన లిక్విడ్ కూల్డ్ ఇంజిన్‌ను కొనసాగించారు. 199.5 సీసీ కెపాసిటీ గల ఈ ఇంజిన్ ఇప్పుడు 25.5 బీహెచ్‌పీ పవర్ ఉత్పత్తి చేస్తుంది. పాత మోడల్‌లో ఇది 24.5 బీహెచ్‌పీగా ఉండేది. గరిష్ఠ టార్క్ 18.7 ఎన్ఎం కాగా, ఆరు గేర్ల గేర్‌బాక్స్‌ను కొనసాగించారు. బైక్‌కు బలాన్ని అందించే పెరిమీటర్ ఫ్రేమ్‌లో మార్పులు చేయలేదు.

ట్రాక్షన్ కంట్రోల్‌తో అదనపు భద్రత

ఈ అప్‌డేట్‌లో ట్రాక్షన్ కంట్రోల్ కీలకమైనది. రోడ్డు మీద టైర్లకు పట్టుతగ్గినప్పుడు వాటి జారుడును నియంత్రించడంలో ఇది సహాయపడుతుంది. ముందు భాగంలో ఉన్న 33 మిల్లీమీటర్ల అప్‌సైడ్ డౌన్ ఫోర్కుల స్థానంలో 37 మిల్లీమీటర్ల ఫోర్కులను అమర్చారు. వెనుక భాగంలో 130/70-R17 రేడియల్ టైర్ ఇచ్చారు. వీటితో పాటు పానిక్ బ్రేక్ అలర్ట్, హజార్డ్ స్విచ్, సర్దుబాటు చేసుకునే లివర్లు, యూఎస్‌బీ టైప్-సీ ఛార్జింగ్ పోర్టు ఉన్నాయి.

ధర ఎంత? ఏ బైకులతో పోటీ?

కొత్త బజాజ్ పల్సర్ NS200 ధర ఢిల్లీలో రూ.1,60,374 ఎక్స్‌షోరూమ్. పాత 33 మిల్లీమీటర్ల ఫోర్కుల వేరియంట్‌తో పోలిస్తే అప్‌డేట్ చేసిన మోడల్ ధర సుమారు రూ.11,000 ఎక్కువ. టీవీఎస్ అపాచీ RTR 200 4V ఈ బైక్‌కు ప్రధాన ప్రత్యర్థిగా ఉంది. కొత్త మోడల్ ఎబోనీ బ్లాక్, రేసింగ్ రెడ్, నార్డో గ్రే, పెర్ల్ మెటాలిక్ వైట్ రంగుల్లో అందుబాటులోకి వస్తుంది. కొనుగోలు చేసేవారు తమ నగరంలో ఆన్‌రోడ్ ధర, బీమా, రిజిస్ట్రేషన్ ఖర్చులను కూడా పరిశీలించాలి.