New Maruti Brezza Facelift: కొత్త బ్రెజ్జా ఎంట్రీ.. లుక్స్‌తో పాటు ఇంజన్‌లోనూ ట్విస్ట్.!

New Maruti Brezza Facelift: భారతీయ ఆటోమొబైల్ మార్కెట్లో 4 మీటర్ల లోపు (సబ్-4 మీటర్) ఎస్‌యూవీ విభాగంలో మారుతి సుజుకి బ్రెజ్జా అత్యంత ప్రజాదరణ పొందిన మోడల్‌గా దూసుకుపోతోంది. అద్భుతమైన అమ్మకాలు, నమ్మకమైన పర్ఫార్మెన్స్‌తో ఎప్పటికప్పుడు వినియోగదారుల ఫేవరెట్ ఛాయిస్‌గా నిలుస్తోంది. అయితే, మారుతున్న పోటీకి అనుగుణంగా ఈ క్రేజీ ఎస్‌యూవీని సరికొత్త ఫేస్‌లిఫ్ట్ (Facelift) వెర్షన్‌లో తీసుకురావడానికి కంపెనీ వేగంగా అడుగులు వేస్తోంది. ఇటీవల ఢిల్లీ సమీపంలోని వెస్ట్రన్ పెరిఫెరల్ ఎక్స్‌ప్రెస్‌వేపై ఈ సరికొత్త బ్రెజ్జా టెస్ట్ మోడల్ మొదటిసారి రోడ్లపై టెస్టింగ్ చేస్తూ కెమెరాకు చిక్కింది. దాంతో అప్‌డేటెడ్ బ్రెజ్జా రాబోతోందనే వార్త కార్ల ప్రియుల్లో ఆసక్తిని రేకెత్తిస్తోంది.

ఇంజన్ మార్పులపై భారీగా అంచనాలు

రోడ్డుపై కనిపించిన టెస్ట్ కారుకు ఎమిషన్స్ టెస్టింగ్ (ఉద్గారాల పరీక్ష) కూడా నిర్వహిస్తున్నట్లు గుర్తించారు. సాధారణంగా కేవలం బాహ్య డిజైన్ మార్పుల (కాస్మెటిక్ అప్‌డేట్స్) కోసం ఇలాంటి ఎమిషన్ టెస్టులు చేయరు. కాబట్టి, ఈసారి కంపెనీ బ్రెజ్జా ఇంజన్ లైనప్‌లో చాలా కీలకమైన మార్పులు చేయడానికి సిద్ధమవుతోందని ఆటోమొబైల్ నిపుణులు భావిస్తున్నారు. అయితే.. 2020లో డీజిల్ ఇంజన్లను పూర్తిగా నిలిపివేసిన తర్వాత, ప్రస్తుతం మార్కెట్లో ఉన్న బ్రెజ్జా కేవలం 1.5-లీటర్ పెట్రోల్ ఇంజన్‌తో మాత్రమే విక్రయించబడుతోంది.

తగ్గనున్న ధర.. చిన్న ఇంజన్లతో సరికొత్త ప్రయోగం?

మీడియా నివేదికల ప్రకారం.. రాబోయే కొత్త బ్రెజ్జా ఫేస్‌లిఫ్ట్‌ను ఈసారి 1.2-లీటర్ నాచురల్లీ ఆస్పిరేటెడ్ పెట్రోల్ ఇంజన్, 1.0-లీటర్ టర్బోచార్జ్డ్ పెట్రోల్ ఇంజన్ ఆప్షన్లతో తీసుకువచ్చే అవకాశం ఉంది. ఈ రెండు ఇంజన్లు ఇప్పటికే మారుతి సుజుకికి చెందిన ఇతర మోడళ్లలో విజయవంతంగా నడుస్తున్నాయి. అయితే.. 4 మీటర్ల లోపు ఉండే కార్లలో చిన్న ఇంజన్లను వాడటం వల్ల ప్రభుత్వ నిబంధనల ప్రకారం పన్నులు (Tax) భారీగా తగ్గుతాయి. దీనివల్ల ఈ పాపులర్ ఎస్‌యూవీ ప్రారంభ ధర మరింత అందుబాటులోకి వచ్చి, కస్టమర్లను ఆకట్టుకునే అవకాశం ఉంది. అయితే, ప్రస్తుతం ఉన్న 1.5-లీటర్ ఇంజన్‌ను పూర్తిగా తీసేస్తారా.. దాంతో పాటు వీటిని అదనంగా ఇస్తారా అనే దానిపై కంపెనీ నుండి ఇంకా అధికారిక ప్రకటన రావాల్సి ఉంది.

సీఎన్‌జీ (CNG) మోడల్‌లో విప్లవాత్మక మార్పు.. భారీ బూట్ స్పేస్!

మారుతి సుజుకి బ్రెజ్జా సీఎన్‌జీ వేరియంట్ కొనేవారికి ఈ కొత్త మోడల్ ఒక పెద్ద వరంగా మారనుంది. సాధారణంగా సీఎన్‌జీ కార్లలో లగేజ్ పెట్టుకోవడానికి స్థలం (బూట్ స్పేస్) అస్సలు ఉండదు. అయితే ఈ సమస్యకు పరిష్కారంగా, కంపెనీ ఇప్పుడు సీఎన్‌జీ ట్యాంక్‌ను కారు లోపల కాకుండా కారు కింది భాగానికి (Underbody) మార్చేలా డిజైన్ చేస్తోంది. దీనివల్ల డిక్‌లో లగేజ్ స్పేస్ చాలా అద్భుతంగా పెరుగుతుంది. ఎక్కువ లగేజ్ పెట్టుకుని లాంగ్ జర్నీలు చేయాలనుకునే కస్టమర్లకు ఈ అప్‌డేట్ చాలా ప్లస్ పాయింట్ కానుంది.

అదరగొట్టే డిజైన్ , ‘అడాస్’ (ADAS) ఫీచర్లు

లుక్స్ పరంగా చూస్తే.. కొత్త బ్రెజ్జాలో సరికొత్త ఫ్రంట్ గ్రిల్ దర్శనమివ్వనుంది. మెయిన్ హెడ్‌ల్యాంప్ డిజైన్‌లో పెద్దగా మార్పులు లేకపోయినప్పటికీ, సరికొత్త ఫాగ్ ల్యాంప్స్ , సిల్వర్ స్కిడ్ ప్లేట్ కారుకు మరింత రగ్గడ్ లుక్‌ను ఇస్తాయి. అన్నింటికంటే ముఖ్యంగా, టెస్టింగ్ కారు ఫ్రంట్ బంపర్‌లో ఒక రాడార్ యూనిట్ కనిపించింది. అయితే.. దీన్ని బట్టి చూస్తే కొత్త బ్రెజ్జాలో అడ్వాన్స్‌డ్ డ్రైవర్ అసిస్టెన్స్ సిస్టమ్ (ADAS) వంటి గ్లోబల్ సేఫ్టీ ఫీచర్లు రాబోతున్నట్లు స్పష్టమవుతోంది. వీటితో పాటు సరికొత్త డిజైన్‌తో కూడిన 16-అంగుళాల అల్లాయ్ వీల్స్ కూడా ఈ ఎస్‌యూవీ అందాన్ని మరింత పెంచనున్నాయి. మార్కెట్లోకి ఈ కారు వస్తే కాంపాక్ట్ ఎస్‌యూవీ సెగ్మెంట్‌లో మారుతి సుజుకి హవా మరింత పెరగడం ఖాయంగా కనిపిస్తోంది.