Maruti Brezza : సేఫ్టీలో మారుతి సుజుకి సరికొత్త రికార్డు.. లాంచ్‌కి ముందే 5 స్టార్ రేటింగ్ సాధించిన బ్రెజ్జా

Maruti Brezza : భారత ఆటోమొబైల్ రంగాన్ని శాసిస్తున్న కాంపాక్ట్ ఎస్‌యూవీ విభాగంలో మారుతి సుజుకి బ్రెజ్జా సరికొత్త సంచలనానికి తెరదీసింది. రాబోయే కాలంలో భారత మార్కెట్లో లాంచ్ కానున్న ఈ న్యూ జెనరేషన్ ఫేస్‌లిఫ్ట్ మోడల్, అధికారికంగా షోరూమ్‌లకు రాకముందే సరికొత్త రికార్డును నెలకొల్పింది. గతంలో బిల్డ్ క్వాలిటీ, భద్రత విషయంలో కొన్ని విమర్శలు ఎదుర్కొన్న మారుతి సుజుకి, ఈసారి కస్టమర్ల ప్రాణాలకు అత్యున్నత ప్రాధాన్యమిస్తూ ఈ కారును రూపకల్పన చేసింది. ఈ నేపథ్యంలో నిర్వహించిన క్రాష్ టెస్టింగ్‌లో భారత్ ఎన్‌సిఎపి నుంచి అడల్ట్, చైల్డ్ రెండు విభాగాల్లోనూ ఏకంగా 5-స్టార్ సేఫ్టీ రేటింగ్ సాధించి, దేశంలోనే అత్యంత సురక్షితమైన ఎస్‌యూవీలలో ఒకటిగా నిలిచింది.

కారు డిజైన్, బాహ్య రూపురేఖల విషయానికొస్తే పాత బ్రెజ్జాకు ఉన్న బలమైన గుర్తింపును అలాగే కాపాడుతూనే, నేటితరం కస్టమర్లను ఆకట్టుకునేలా అనేక స్పోర్టీ అప్‌డేట్స్ చేశారు. ఈ కొత్త ఫేస్‌లిఫ్ట్ మోడల్‌లో రీ-డిజైన్ చేసిన ఫ్రంట్ బంపర్, నయా డిజైన్‌తో కూడిన ఎల్‌ఈడీ హెడ్‌లాంప్స్, స్టైలిష్ ఫ్రంట్ గ్రిల్, సరికొత్తగా తీర్చిదిద్దిన అలాయ్ వీల్స్‌ను అందించారు. ఈ చిన్న చిన్న విజువల్ మార్పులు కారుకి మరింత బోల్డ్, మోడర్న్, రోడ్ ప్రెజెన్స్‌ను పెంచే రోబోస్టిక్ లుక్‌ను తీసుకొచ్చాయి.

కారు పవర్‌ట్రెయిన్, పర్ఫార్మెన్స్ విభాగంలో కూడా మారుతి సుజుకి కీలక మార్పులు చేసింది. ఇందులో మొదటిసారిగా 1.0-లీటర్ బూస్టర్‌జెట్ టర్బో-పెట్రోల్ ఇంజిన్‌ను పరిచయం చేసే అవకాశం కనిపిస్తోంది. ఇది మైలేజ్ మాత్రమే కాకుండా అద్భుతమైన పిక్-అప్, పవర్ అందిస్తుంది. దీనితో పాటు నమ్మకమైన రెగ్యులర్ 1.5-లీటర్ న్యాచురల్లీ ఆస్పిరేటెడ్ పెట్రోల్ ఇంజిన్ ఆప్షన్ కూడా కొనసాగుతుంది. అంతేకాకుండా, సిఎన్‌జి ప్రియుల కోసం ప్రత్యేకంగా అండర్‌బాడీ ట్యాంక్ టెక్నాలజీని అందిస్తున్నారు. దీనివల్ల సాధారణంగా సిఎన్‌జి కార్లలో డిక్కీలో స్థలం లేకపోవడం అనే ప్రధాన సమస్యకు పరిష్కారం లభించి, తగినంత బూట్ స్పేస్ కస్టమర్లకు లభిస్తుంది.

ఇంటీరియర్, హైటెక్ కేబిన్ ఫీచర్ల పరంగా ఈ కొత్త బ్రెజ్జా ఫేస్‌లిఫ్ట్ ప్రీమియం అనుభూతిని అందిస్తుంది. డ్రైవర్, ప్యాసింజర్ల ప్రయాణాన్ని మరింత సౌకర్యవంతంగా మార్చేందుకు వెంటిలేటెడ్, పవర్డ్ ఫ్రంట్ సీట్లు, రాత్రి వేళల్లో కేబిన్‌కు సరికొత్త శోభను ఇచ్చే అంబియంట్ లైటింగ్, వైర్‌లెస్ స్మార్ట్‌ఫోన్ ఛార్జింగ్ ప్యాడ్, కారును పార్కింగ్ చేయడం సులభతరం చేసే 360-డిగ్రీ కెమెరా వంటి ఆధునిక ఫీచర్లను ఇందులో సమకూర్చారు. ఈ భద్రతా ప్రమాణాలు, సరికొత్త ఇంజిన్ ఆప్షన్లు, అడ్వాన్స్‌డ్ ఫీచర్లు తోడవ్వడంతో రాబోయే బ్రెజ్జా కాంపాక్ట్ ఎస్‌యూవీ రేసులో తిరుగులేని శక్తిగా నిలవడం ఖాయంగా కనిపిస్తోంది.