పెట్రోల్ బంకుల్లో ‘జీరో’ చూసినా మోసపోతున్నారా..?‘జంప్ ట్రిక్’ వెనుక అసలు సీక్రెట్ ఇదే!

Petrol Pump Jump Trick Scam: పెట్రోల్ బంకుకు వెళ్లినప్పుడు మిషన్ మీద ‘సున్నా’ చూస్తే అంతా సవ్యంగా ఉందని మనం అనుకుంటాం. కానీ, ఇప్పుడు కేవలం జీరో చూడటం మాత్రమే సరిపోదు. అధునాతన సాంకేతికతను వాడుతూ వినియోగదారుల కళ్లుగప్పి తక్కువ ఇంధనాన్ని నింపుతూ పూర్తి డబ్బులు వసూలు చేసే కొత్త రకం మోసం (petrol pump fraud) మార్కెట్లోకి వచ్చింది. దీనినే ‘జంప్ ట్రిక్’ అని పిలుస్తున్నారు.

ఏమిటీ జంప్ ట్రిక్? దీని ద్వారా మోసం ఎలా జరుగుతుంది?

సాధారణంగా వాహనదారులు పెట్రోల్ కొట్టించేటప్పుడు రీడింగ్ సున్నా వద్ద ఉందో లేదో తనిఖీ చేస్తారు. అయితే, ఈ కొత్త మోసంలో మీరు జీరో చూసిన తర్వాత ఇంధనం నింపడం ప్రారంభించగానే, మీటరు రీడింగ్ ఒక్కసారిగా అసాధారణ రీతిలో పెరిగిపోతుంది. ఉదాహరణకు, పెట్రోల్ రావడం మొదలవ్వగానే మీటరు సున్నా నుంచి నేరుగా రూ. 15 లేదా రూ. 20 కి దూకుతుంది. ఈ స్వల్ప సమయంలోనే మీరు గమనించకుండానే కొంత ఇంధనాన్ని కోల్పోతారు. ఫలితంగా మీరు చెల్లించిన మొత్తానికి తక్కువ పెట్రోల్ లేదా డీజిల్ మీ వాహనంలోకి చేరుతుంది.

మిషన్లతో మాయాజాలం..

చాలా సందర్భాలలో పెట్రోల్ బంకుల్లోని యంత్రాల కాలిబ్రేషన్ లేదా సాఫ్ట్‌వేర్‌లో మార్పులు చేయడం ద్వారా ఈ అక్రమాలకు పాల్పడుతున్నారు. యంత్రం చూపించే రీడింగ్‌కు, బయటకు వచ్చే ఇంధన పరిమాణానికి మధ్య తేడా ఉండేలా దీనిని సెట్ చేస్తారు. ఇది ఎంత వేగంగా జరుగుతుందంటే, సామాన్య వినియోగదారుడు ఏదో చిన్న పొరపాటు అనుకుని వదిలేస్తాడు. కానీ రోజూ వందలాది వాహనాలపై ఇలా చేయడం ద్వారా బంకు యజమానులు భారీగా అక్రమ లాభాలు ఆర్జిస్తున్నారు.

సాధారణ రీడింగ్ అంటే ఎలా ఉండాలి?

పెట్రోల్ నింపేటప్పుడు పైపులో ఉండే ఒత్తిడి వల్ల ప్రారంభంలో రూ. 3 నుంచి రూ. 5 వరకు చిన్న మార్పు రావడం సహజం. కానీ, ఈ మార్పు అంతకు మించి ఎక్కువగా ఉంటే మాత్రం కచ్చితంగా అనుమానించాల్సిందే. మీటరు అంకెలు క్రమపద్ధతిలో కాకుండా గజిబిజిగా ముందుకు దూకుతుంటే అది మోసానికి సంకేతం. ముఖ్యంగా రద్దీగా ఉన్న సమయంలో వినియోగదారుల ఏకాగ్రత తక్కువగా ఉంటుందని భావించి ఇలాంటి ట్రిక్స్ ఎక్కువగా ప్రయోగిస్తుంటారు.

మోసపోకుండా ఉండాలంటే ఏం చేయాలి?

నిశితంగా గమనించండి: కేవలం సున్నా చూడటమే కాదు, ఇంధనం నింపడం ప్రారంభించిన మొదటి పది సెకన్ల పాటు మీటరు అంకెలను తీక్షణంగా చూడండి.

వెంటనే నిలదీయండి: ఒకవేళ అంకెలు ఒక్కసారిగా దూకినట్లు అనిపిస్తే వెంటనే అక్కడి సిబ్బందిని ప్రశ్నించండి.

పరీక్ష చేయించండి: అనుమానం ఉంటే బంకులో అందుబాటులో ఉండే మెజరింగ్ జార్ ద్వారా ఇంధనాన్ని కొలిచి చూపమని కోరే హక్కు మీకు ఉంటుంది.

ప్రతిసారీ అప్రమత్తంగా ఉండటం వల్ల మీ కష్టార్జితం వృథా కాకుండా కాపాడుకోవచ్చు. బంకు సిబ్బంది మాటల్లో పడకుండా మీ దృష్టి అంతా రీడింగ్ పైనే ఉండాలి.