Renault Duster 2026: కేవలం 4 కార్లతోనే మార్కెట్‌ను షేక్ చేస్తున్న కంపెనీ.. అమ్మకాల్లో ఏకంగా 77 శాతం వృద్ధి..!

Renault Duster 2026: భారతదేశంలో రెనో సంస్థ తనదైన ముద్ర వేస్తోంది. ప్రస్తుతం ఈ కంపెనీ కేవలం ట్రైబర్, డస్టర్, కైగర్, క్విడ్ అనే నాలుగు మోడళ్లను మాత్రమే విక్రయిస్తోంది. మార్చి 2026 నెల నివేదికల ప్రకారం, కంపెనీ మొత్తం 5,046 యూనిట్లను విక్రయించింది. గత ఏడాది ఇదే నెలలో కేవలం 2,846 కార్లు మాత్రమే అమ్ముడయ్యాయి. అంటే వార్షిక ప్రాతిపదికన అమ్మకాలు 77 శాతం పెరిగాయి.

అగ్రస్థానంలో రెనో ట్రైబర్..

కుటుంబ సమేతంగా ప్రయాణించే వారికి ఇష్టమైన 'ట్రైబర్' ఈ జాబితాలో మొదటి స్థానంలో నిలిచింది. మార్చి నెలలో 2,011 మంది ఈ కారును కొనుగోలు చేశారు. గత ఏడాదితో పోలిస్తే దీని అమ్మకాల్లో 29 శాతం పెరుగుదల నమోదైంది. కంపెనీ మొత్తం విక్రయాల్లో ఈ ఒక్క కారు వాటానే 39 శాతంగా ఉండటం గమనార్హం.

కొత్త డస్టర్ ప్రభంజనం..

రెనో సంస్థకు అత్యంత ప్రజాదరణ తెచ్చిపెట్టిన 'డస్టర్' మోడల్ మళ్ళీ మార్కెట్లోకి అడుగుపెట్టింది. మార్చి 17న విడుదలైన ఈ కారు, నెల కూడా గడవకముందే 1,402 యూనిట్ల అమ్మకాలతో రెండో స్థానంలో నిలిచింది. చాలా కాలం విరామం తర్వాత వచ్చినప్పటికీ, వినియోగదారులు ఈ మోడల్‌పై చూపుతున్న ఆసక్తి ఆశ్చర్యకరంగా ఉంది.

కైగర్, క్విడ్ పరిస్థితి..

కాంపాక్ట్ ఎస్‌యూవీ విభాగంలో 'కైగర్' తన జోరును కొనసాగిస్తోంది. గత నెలలో 1,184 యూనిట్ల అమ్మకాలతో ఇది మూడో స్థానంలో ఉంది. ఈ మోడల్ ఏకంగా 55 శాతం వృద్ధిని సాధించడం విశేషం. అయితే, చిన్న కారు 'క్విడ్' అమ్మకాలు మాత్రం స్వల్పంగా తగ్గాయి. గత ఏడాది 532 కార్లు అమ్ముడవగా, ఈసారి కేవలం 449 యూనిట్లు మాత్రమే అమ్ముడయ్యాయి.

పరిమితమైన కార్ల శ్రేణి ఉన్నప్పటికీ, నాణ్యత, వినియోగదారుల అవసరాలకు తగ్గట్టుగా మార్పులు చేయడంతో రెనో ఇండియా మార్కెట్లో తన పట్టును నిరూపించుకుంటోంది. రానున్న రోజుల్లో కొత్త డస్టర్ మరిన్ని రికార్డులు సృష్టిస్తుందని పరిశ్రమ వర్గాలు అంచనా వేస్తున్నాయి.