River Indie: ఎలక్ట్రిక్ స్కూటర్ మార్కెట్లో రివర్ ఇండి సునామీ.. రోజుకు 200 మందికి పైగా కొనుగోలు

River Indie: భారతీయ ఎలక్ట్రిక్ టూ వీలర్ మార్కెట్లో రివర్ ఇండి ఎలక్ట్రిక్ స్కూటర్ సరికొత్త సంచలనం సృష్టిస్తోంది. విభిన్నమైన డిజైన్, భారీ స్టోరేజ్ కెపాసిటీతో వస్తున్న ఈ స్కూటర్‌కు కస్టమర్ల నుంచి విపరీతమైన స్పందన లభిస్తోంది. ఇటీవల విడుదలైన సెప్టెంబర్ 2026 విక్రయాల గణాంకాలు అందరినీ ఆశ్చర్యపరుస్తున్నాయి. గత నెలలో ఈ ఈవీ ఏకంగా 6,057 యూనిట్ల అమ్మకాలను నమోదు చేసింది. దీనిద్వారా ప్రతిరోజూ సగటున 200 మందికి పైగా కొనుగోలుదారులు దీనిని సొంతం చేసుకుంటున్నట్లు స్పష్టమవుతోంది.

అమ్మకాల్లో 209 శాతం భారీ వృద్ధి

గత ఏడాది సెప్టెంబర్ 2025లో కేవలం 1,960 యూనిట్లు మాత్రమే అమ్ముడవగా, ఈసారి ఏకంగా 209 శాతం వృద్ధి నమోదైంది. మార్కెట్లో గట్టి పోటీ ఇస్తున్న ఇతర ప్రముఖ బ్రాండ్ల ఈవీలతో పోలిస్తే రివర్ ఇండి తనకంటూ ప్రత్యేక స్థానాన్ని ఏర్పరుచుకుంది. ఆకర్షణీయమైన లుక్‌తో పాటు రోజువారీ ప్రయాణాలకు అనుకూలంగా ఉండటమే ఈ భారీ అమ్మకాలకు ప్రధాన కారణమని ఆటోమొబైల్ నిపుణులు విశ్లేషిస్తున్నారు.

భారీ 55 లీటర్ల స్టోరేజ్ స్పేస్

ఈ ఎలక్ట్రిక్ స్కూటర్ ప్రత్యేకత దాని ప్రాక్టికల్ డిజైన్‌లో దాగి ఉంది. ఇందులో ఏకంగా 43 లీటర్ల అండర్-సీట్ స్టోరేజ్‌తో పాటు ముందు భాగంలో 12 లీటర్ల గ్లవ్ బాక్స్ ఇస్తున్నారు. మొత్తం కలిపి 55 లీటర్ల భారీ స్టోరేజ్ స్పేస్ లభిస్తోంది. దీనివల్ల ప్రయాణ సమయంలో లగేజీ లేదా సరుకులు సులభంగా సర్దుకోవచ్చు. అలాగే కచ్చా రోడ్లపై కూడా సులభంగా ప్రయాణించేందుకు వీలుగా ఇందులో 14 అంగుళాల పెద్ద అలాయ్ వీల్స్‌ను అమర్చారు.

163 కిమీ రేంజ్.. 90 కిమీ టాప్ స్పీడ్

ఈ స్కూటర్‌లో 4 kWh సామర్థ్యం గల శక్తివంతమైన లిథియం-అయన్ బ్యాటరీ ప్యాక్‌ను పొందుపరిచారు. ఇది ఒకసారి పూర్తి ఛార్జ్ చేస్తే ఏకంగా 163 కిలోమీటర్ల సర్టిఫైడ్ రేంజ్ అందిస్తుంది. సాధారణ రోడ్డు డ్రైవింగ్‌లో ఇది సులభంగా 120 కిలోమీటర్ల వరకు ప్రయాణిస్తుంది. ఇందులో ఎకో, రైడ్, రష్ అనే మూడు మోడ్స్ ఉన్నాయి. దీనికి జతగా లభించే 6.7 kW ఎలక్ట్రిక్ మోటార్ గరిష్టంగా గంటకు 90 కిలోమీటర్ల టాప్ స్పీడ్‌తో దూసుకెళ్లేలా చేస్తుంది. హోమ్ ఛార్జర్ ద్వారా జీరో నుంచి 80 శాతం ఛార్జ్ కావడానికి సుమారు 5 గంటల సమయం పడుతుంది.

ధర ఎంతంటే?

భారత మార్కెట్లో రివర్ ఇండి ఎక్స్ షోరూం ధర సుమారు రూ.1.46 లక్షల నుంచి ప్రారంభమవుతుంది. పెట్రోల్ ఖర్చులతో పోలిస్తే దీని రన్నింగ్ కాస్ట్ చాలా తక్కువగా ఉంటుంది. ఏథర్, టీవీఎస్, బాజాజ్ వంటి దిగ్గజ బ్రాండ్ల స్కూటర్లకు ఇది గట్టి పోటీ ఇస్తోంది. రోజువారీ ఆఫీస్ ప్రయాణాలతో పాటు లాంగ్ రైడ్స్ వెళ్లేవారికి ఈ ఈవీ అద్భుతమైన ఆప్షన్‌గా మారుతోంది.