200 కార్లే.. Skoda Slavia Monte Carlo కొత్త కలర్స్ అదిరిపోయాయి..!

Skoda Slavia Monte Carlo : ప్రీమియం సెడాన్ ప్రేమికులను ఆకట్టుకునేందుకు స్కోడా ఆటో ఇండియా తమ ఆకర్షణీయమైన 'స్లావియా మోంటే కార్లో' మోడల్‌లో రెండు సరికొత్త కలర్ ఆప్షన్లను మార్కెట్లోకి తీసుకొచ్చింది. ఈ సెడాన్ లైనప్‌కు మరింత ప్రత్యేకతను జోడిస్తూ షిమ్లా గ్రీన్ , స్టీల్ గ్రే రంగులను ప్రవేశపెట్టింది. ఈ రెండు కొత్త మోడళ్లు కూడా ఆకర్షణీయమైన డ్యూయల్-టోన్ ఫినిషింగ్‌తో లభించనున్నాయి.

కేవలం 200 యూనిట్లు మాత్రమే లభ్యం

ఈ కొత్త కలర్ ఎడిషన్ల ప్రత్యేకతను మరింత పెంచేందుకు కంపెనీ ఒక కీలక నిర్ణయం తీసుకుంది. భారత మార్కెట్లో ఈ సరికొత్త రంగుల్లో కేవలం 200 యూనిట్లను మాత్రమే విక్రయించనున్నట్లు ప్రకటించింది. అంతేకాకుండా ఈ కొత్త రంగులు స్లావియా మోంటే కార్లో వేరియంట్‌లోని ఆటోమేటిక్ వర్షన్లలో మాత్రమే వినియోగదారులకు అందుబాటులో ఉంటాయి. ఈ సందర్భంగా స్కోడా ఆటో ఇండియా బ్రాండ్ డైరెక్టర్ ఆశిష్ గుప్తా మాట్లాడుతూ, స్లావియా మోంటే కార్లో మోడల్‌కు దాని ప్రత్యేకమైన స్టైలింగ్, ప్రీమియం లుక్ , డ్రైవింగ్ డైనమిక్స్ కారణంగా మార్కెట్లో విశేష ఆదరణ లభించిందని తెలిపారు. ఈ కొత్త కలర్ ఆప్షన్లు మోంటే కార్లో శ్రేణికి మరింత విలక్షణతను తెచ్చిపెడతాయని ఆశాభావం వ్యక్తం చేశారు.

మార్పులు లేని ఇంజిన్ , ఫీచర్లు

బాహ్య రంగులు తప్పిస్తే, స్లావియా మోంటే కార్లో మోడల్‌లోని డిజైన్ , ఇంజిన్లలో ఎలాంటి మార్పులు చేయలేదు. ఇది మునుపటిలాగే సిగ్నేచర్ బ్లాక్డ్-అవుట్ ఎక్స్‌టీరియర్, బ్లాక్ అండ్ రెడ్ థీమ్ క్యాబిన్ , అత్యాధునిక ఫీచర్లతో లభిస్తుంది. ఈ సెడాన్ రెండు టర్బో-పెట్రోల్ ఇంజిన్ ఆప్షన్లతో, కేవలం ఆటోమేటిక్ ట్రాన్స్‌మిషన్‌తో మాత్రమే అందుబాటులో ఉంటుంది. ఇందులో మొదటిది 115bhp పవర్ , 178Nm టార్క్‌ను ఉత్పత్తి చేసే 1.0-లీటర్ TSI టర్బో-పెట్రోల్ ఇంజిన్ కాగా, ఇది 6-స్పీడ్ టార్క్ కన్వర్టర్ ఆటోమేటిక్ గేర్‌బాక్స్‌తో వస్తుంది. ఇక రెండవది 150bhp పవర్, 250Nm టార్క్‌ను అందించే 1.5-లీటర్ TSI టర్బో-పెట్రోల్ ఇంజిన్, ఇది 7-స్పీడ్ DSG ఆటోమేటిక్ గేర్‌బాక్స్‌తో జత చేయబడింది. ఈ 1.5-లీటర్ ఇంజిన్‌లో ఉన్న యాక్టివ్ సిలిండర్ టెక్నాలజీ (ACT) తక్కువ లోడ్‌లో ఉన్నప్పుడు రెండు సిలిండర్లను ఆటోమేటిక్‌గా ఆపివేసి, మైలేజ్‌ను పెంచడంలో ఎంతగానో దోహదపడుతుంది.

మోంటే కార్లో లెగసీ..

మోంటే కార్లో అనే పేరు స్కోడా మోటార్‌స్పోర్ట్ చరిత్ర , 1912 నాటి 'రాకీ మోంటే కార్లో' రేసింగ్ లీగ్‌తో ఉన్న సుదీర్ఘ అనుబంధం నుంచి వచ్చింది. ఇటీవల స్కోడా కంపెనీ భారతదేశంలో కోయంబత్తూర్ రేస్ ట్రాక్‌పై స్లావియా మోంటే కార్లో, కుషాక్ మోంటే కార్లో, కైలాక్, కోడియాక్ , ఆక్టేవియా ఆర్‌ఎస్ కార్లతో అతివేగంగా మల్టీ-కార్ రిలే పూర్తి చేసి ఇండియా బుక్ ఆఫ్ రికార్డ్స్, ఆసియా బుక్ ఆఫ్ రికార్డ్స్‌లో చోటు సంపాదించుకుంది. పరిమిత సంఖ్యలో తీసుకొచ్చిన ఈ డ్యూయల్-టోన్ మోంటే కార్లో కార్లు, ప్రత్యేకమైన స్పోర్టీ లుక్ కోరుకునే సెడాన్ ప్రియులను విశేషంగా ఆకట్టుకుంటాయని కంపెనీ భావిస్తోంది.