EV Sales : ఈవీ మార్కెట్లో టాటా మోటార్స్ టాప్ గేర్.. మహీంద్రా, ఎంజీ కార్లు ఏ ప్లేసులో ఉన్నాయంటే ?

EV Sales : భారతదేశంలో ఎలక్ట్రిక్ వాహనాలకు రోజురోజుకూ ఆదరణ విపరీతంగా పెరుగుతోంది. పర్యావరణ స్పృహ పెరగడం, పెట్రోల్, డీజిల్ ధరల భారం వంటి కారణాల వల్ల వాహనదారులు ఈవీ కార్ల వైపు మొగ్గు చూపుతున్నారు. దీనివల్ల ప్రతి నెల దేశీయ ఈవీ సెగ్మెంట్ సరికొత్త రికార్డులను సృష్టిస్తోంది. తాజా ఆర్థిక సంవత్సరం 2026లో ఎలక్ట్రిక్ కార్ల అమ్మకాల్లో వార్షిక ప్రాతిపదికన ఏకంగా 83.63 శాతం అద్భుతమైన వృద్ధి నమోదైంది. గత ఏప్రిల్ నెలలో కూడా దేశవ్యాప్తంగా 23,506 ఈవీ కార్లు అమ్ముడై తమ జోరును చాటుకున్నాయి.

మే నెలలో సరికొత్త రికార్డులు సృష్టించిన ఈవీ సేల్స్

ప్రస్తుతం మే 2026 నెలకు సంబంధించిన అధికారిక ఈవీ విక్రయాల గణాంకాలు బయటకు వచ్చాయి. ఈ లెక్కలు చూస్తే భారత మార్కెట్లో ఎలక్ట్రిక్ కార్ల డిమాండ్ ఎంత బలంగా ఉందో స్పష్టమవుతోంది. మే నెలలో దేశవ్యాప్తంగా మొత్తం 26,682 ఎలక్ట్రిక్ కార్లు అమ్ముడయ్యాయి. గత ఏడాది మే 2025 లో అమ్ముడైన 14,725 యూనిట్లతో పోలిస్తే ఇది ఏకంగా 81.2 శాతం ఎక్కువ కావడం విశేషం. ఇక గత ఏప్రిల్ 2026 తో పోల్చి చూసినా కూడా ఈ అమ్మకాలు 2 శాతం మేర వృద్ధిని సాధించాయి.

ఈవీ మార్కెట్లో టాటా మోటార్స్ ఆధిపత్యం

ఈ విక్రయాల గణాంకాలను నిశితంగా పరిశీలిస్తే, టాటా మోటార్స్ ఇప్పటికీ భారత ఎలక్ట్రిక్ కార్ల రంగంలో నంబర్ వన్ స్థానాన్ని పదిలం చేసుకుంది. మే 2026 లో టాటా కంపెనీ ఏకంగా 10,340 ఎలక్ట్రిక్ కార్లను విక్రయించి, మొత్తం ఈవీ మార్కెట్లో 38.75 శాతం వాటాను తన సొంతం చేసుకుంది. గత ఏడాది ఇదే నెలలో టాటా కేవలం 5,083 కార్లను మాత్రమే అమ్మగలిగింది. అంటే గడిచిన ఏడాది కాలంలో టాటా ఈవీల అమ్మకాలు 103 శాతం కంటే ఎక్కువ పెరిగాయి. ఏప్రిల్ నెలతో పోల్చినా ఈ సేల్స్ 11 శాతం పెరగడం విశేషం.

రెండో స్థానంలో మహీంద్రా.. మూడో స్థానంలో జేఎస్‌డబ్ల్యూ ఎంజీ

టాటా మోటార్స్ తర్వాత ఈ రేసులో మహీంద్రా కంపెనీ రెండో స్థానంలో నిలిచింది. మహీంద్రా సంస్థ మే 2026 లో 6,210 ఎలక్ట్రిక్ కార్లను కస్టమర్లకు డెలివరీ చేసింది. గత ఏడాది ఇదే మే నెలలో మహీంద్రా కేవలం 2,891 యూనిట్లను మాత్రమే విక్రయించింది. దీనితో ఈ కంపెనీ వార్షికంగా 114.8 శాతం బలమైన వృద్ధిని నమోదు చేసింది. ఇక జేఎస్‌డబ్ల్యూ ఎంజీ మోటార్ 4,984 కార్ల అమ్మకాలతో మూడో స్థానాన్ని దక్కించుకుంది. అయితే ఎంజీ మోటార్స్ వార్షికంగా 8.37 శాతం వృద్ధిని చూసినప్పటికీ, ఏప్రిల్ నెలతో పోలిస్తే మాత్రం అమ్మకాల్లో 8 శాతం తగ్గుదల కనిపించింది.

రేసులోకి వస్తున్న మారుతి ఈ-విటారా, విదేశీ కార్లు

భారత మార్కెట్లో లభించే ఇతర బ్రాండ్ల ఎలక్ట్రిక్ కార్లకు కూడా క్రమంగా డిమాండ్ పెరుగుతోంది. మారుతి సుజుకికి చెందిన ఈ-విటారా మోడల్ నెమ్మదిగా కస్టమర్లను ఆకట్టుకుంటోంది. మే నెలలో దీనికి సంబంధించి 1,591 యూనిట్లు అమ్ముడయ్యాయి, ఇది ఏప్రిల్ కంటే 20 శాతం ఎక్కువ. వియత్నాంకు చెందిన ప్రముఖ కార్ల తయారీ సంస్థ విన్‌ఫాస్ట్ కూడా భారత్‌లో పుంజుకుంటోంది. మే నెలలో ఈ కంపెనీ 1,238 వాహనాలను విక్రయించింది. చైనాకు చెందిన గ్లోబల్ ఈవీ దిగ్గజం బీవైడీ కూడా మంచి వృద్ధిని సాధించింది. బీవైడీ కార్ల అమ్మకాలు వార్షికంగా 10.47 శాతం, నెలవారీగా 25.41 శాతం పెరగడం చూస్తుంటే భారతీయ కస్టమర్లు ప్రీమియం ఈవీలపై కూడా ఆసక్తి చూపిస్తున్నారని అర్థమవుతోంది.