EV Cars : ఆలోచన మార్చుకుంటున్న కస్టమర్లు..కేవలం రెండు నెలల్లోనే 2.5 రెట్లు పెరిగిన బుకింగ్స్

EV Cars : అంతర్జాతీయంగా ముదురుతున్న పశ్చిమ ఆసియా సంక్షోభం, అమెరికా-ఇరాన్ యుద్ధ ఉద్రిక్తతలు భారత ఆటోమొబైల్ రంగాన్ని తీవ్రంగా ప్రభావితం చేస్తున్నాయి. ప్రపంచవ్యాప్తంగా ముడిచమురు ధరలు పెరగడంతో దేశంలో పెట్రోల్, డీజిల్ రేట్లు రోజూ ఆకాశాన్ని తాకుతున్నాయి. ఈ ఇంధన మంటల భారం తట్టుకోలేక భారతీయ వినియోగదారులు ఇప్పుడు భారీగా ఎలక్ట్రిక్ వాహనాల (EV) వైపు అడుగులు వేస్తున్నారు. దేశీయ దిగ్గజ ఆటోమొబైల్ సంస్థ టాటా మోటార్స్ ప్రకారం.. గత రెండు నెలల కాలంలోనే ఎలక్ట్రిక్ కార్ల డిమాండ్, బుకింగ్స్ ఏకంగా 2 నుంచి 2.5 రెట్లు పెరిగాయి. నిత్యం పెరిగే ఇంధన ఖర్చుల నుంచి ఉపశమనం పొందేందుకు జనం తక్కువ రన్నింగ్ కాస్ట్ ఉండే ఈవీ కార్లను కొనేందుకే క్యూ కడుతున్నారు.

మార్కెట్లో ఎలక్ట్రిక్ కార్లకు వస్తున్న విపరీతమైన క్రేజ్, డిమాండ్‌ను తట్టుకోవడానికి టాటా మోటార్స్ సరికొత్త వ్యూహంతో ముందుకు వెళ్తోంది. రాబోయే 3 నుంచి 4 నెలల కాలంలో తమ ఎలక్ట్రిక్ వాహనాల ఉత్పాదకతను ఏకంగా 50 శాతం వరకు పెంచాలని కంపెనీ పక్కా ప్లాన్ సిద్ధం చేసింది. ప్రస్తుతం టాటా మోటార్స్ సంస్థ నెలకు సగటున 10,000 ఈవీ కార్లను తయారు చేస్తుండగా, దీనిని త్వరలోనే ప్రతి నెలా 15,000 యూనిట్లకు పెంచేలా చర్యలు తీసుకుంటోంది. మార్కెట్లో ఇదే విధమైన జోరు కొనసాగితే, ప్రస్తుత ఆర్థిక సంవత్సరంలో ఏకంగా 1 లక్ష ఎలక్ట్రిక్ కార్లను విక్రయించి సరికొత్త రికార్డు సృష్టించాలని టాటా లక్ష్యంగా పెట్టుకుంది.

టాటా మోటార్స్ ప్యాసింజర్ వెహికల్స్ ఎండీ, సీఈఓ శైలేష్ చంద్ర మార్కెట్ పరిస్థితులపై స్పందిస్తూ ఆసక్తికర విషయాలు వెల్లడించారు. గత కొన్ని వారాలుగా ఈవీ కార్ల అమ్మకాల్లో అనూహ్యమైన మార్పులు వచ్చాయని ఆయన తెలిపారు. ఇప్పుడు దేశంలోని ప్రతి మధ్యతరగతి కుటుంబం తమ ఇంట్లో కనీసం ఒక్క ఎలక్ట్రిక్ కారునైనా ఉంచుకోవాలని బలంగా కోరుకుంటోందని చెప్పారు. కస్టమర్ల నుంచి వస్తున్న ఎంక్వైరీలు, బుకింగ్స్ గతంతో పోలిస్తే 2.5 రెట్లు పెరిగినప్పటికీ.. ప్రస్తుతం ఉన్న సప్లై చైన్ పరిమితుల వల్ల కస్టమర్ల డిమాండ్‌కు సరిపడా కార్లను వెంటనే డెలివరీ చేయలేకపోతున్నామని ఆయన స్పష్టం చేశారు.

దేశంలో ఇంధన ధరల బాదుడు ఏ రేంజ్‌లో ఉందో శైలేష్ చంద్ర ఉదాహరణలతో వివరించారు. కేవలం గత 10 రోజుల వ్యవధిలోనే పెట్రోల్, డీజిల్ ధరలను కంపెనీలు నాలుగు సార్లు పెంచాయని ఆయన గుర్తు చేశారు. లీటర్ పెట్రోల్‌పై రూ. 10 పెరిగితే.. నెలకు సగటున 100 లీటర్ల పెట్రోల్ వాడే ఒక సాధారణ వాహనదారుడి నెలవారీ బడ్జెట్ అదనంగా రూ.1,000 వరకు పెరిగిపోతుంది. ఈ అదనపు భారం ప్రభావం ముఖ్యంగా బడ్జెట్ లేదా ఎంట్రీ లెవెల్ కార్లను కొనుగోలు చేసే సామాన్య కస్టమర్లపైనే తీవ్రంగా పడుతోందని ఆయన ఆందోళన వ్యక్తం చేశారు.

ప్రస్తుత పరిస్థితుల్లో పెట్రోల్ రేట్లు గనుక ఇలాగే ఉంటే కస్టమర్లు తమ కారు కొనుగోలు ప్లాన్స్‌ను పూర్తిగా వాయిదా వేసుకోరని, కాకపోతే పెట్రోల్ మోడళ్లకు బదులుగా తక్కువ ఖర్చుతో కూడిన సీఎన్‌జీ (CNG) లేదా ఎంట్రీ లెవెల్ ఈవీ (EV) కార్లను ఎంచుకోవడానికి ప్రాధాన్యత ఇస్తారని శైలేష్ చంద్ర విశ్లేషించారు. ప్రతీ రూపాయి ఖర్చును జాగ్రత్తగా లెక్కేసుకునే మిడిల్ క్లాస్ కస్టమర్లు ఇప్పుడు పూర్తిగా ప్రత్యామ్నాయ ఇంధన వాహనాల వైపే మొగ్గు చూపుతున్నారని ఆయన అన్నారు.

కార్లకు డిమాండ్ భారీగా ఉన్నప్పటికీ, టాటా మోటార్స్ సంస్థకు సప్లై చైన్, విడిభాగాల లభ్యత ఇప్పుడు ఒక పెద్ద సవాలుగా మారింది. అవసరాన్ని బట్టి పెట్రోల్ కార్ల ప్రొడక్షన్ లైన్‌ను ఈవీ కార్ల వైపు మార్చగల సామర్థ్యం కంపెనీకి ఉన్నప్పటికీ.. విడిభాగాలు సరఫరా చేసే సప్లయర్లు తమ కెపాసిటీని పెంచుకోవడానికి మరికొంత సమయం, కొత్త పెట్టుబడులు మరియు ఆటోమేషన్ అవసరమవుతుందని కంపెనీ పేర్కొంది. ఇందువల్లే మార్కెట్లో విపరీతమైన డిమాండ్ ఉన్నప్పటికీ వెంటనే కార్లను డెలివరీ చేయలేకపోతున్నామని టాటా సంస్థ తెలిపింది. అయినప్పటికీ రాబోయే రోజుల్లో రన్నింగ్ కాస్ట్ తక్కువగా ఉండే ఈవీ, సీఎన్‌జీ మోడళ్లే భారత ఆటోమొబైల్ రంగాన్ని శాసించబోతున్నాయని నిపుణులు బలంగా నమ్ముతున్నారు.