Toyota: అద్భుతమైన ఫీచర్లు, భారీ రేంజ్‌.. టయోటా నుంచి తొలి 7-సీటర్ ఎలక్ట్రిక్ ఎస్యూవీ

Toyota: భారతీయ ఆటోమొబైల్ మార్కెట్లో ఎలక్ట్రిక్ వాహనాల హవా రోజురోజుకూ విపరీతంగా పెరుగుతోంది. ఈ నేపథ్యంలో ప్రముఖ జపాన్ ఆటోమొబైల్ దిగ్గజం టయోటా కంపెనీ భారతీయ మార్కెట్ కోసం ఒక సరికొత్త 7-సీటర్ ఎలక్ట్రిక్ ఎస్‌యూవీని తీసుకువచ్చేందుకు సన్నాహాలు చేస్తోంది. మారుతి సుజుకితో కుదుర్చుకున్న వ్యూహాత్మక భాగస్వామ్యంలో భాగంగా రాబోతున్న వైఎంసి మోడల్ ఆధారంగా ఈ కొత్త కారును టయోటా అభివృద్ధి చేస్తోంది. ఇది భారత మార్కెట్లో టయోటా బ్రాండ్ నుంచి రాబోతున్న మొట్టమొదటి 7-సీటర్ ఎలక్ట్రిక్ కారు కావడం విశేషం. కంపెనీ దీనికి సంబంధించిన అధికారిక లాంచ్ తేదీలను ఇంకా ప్రకటించనప్పటికీ, ఆటోమొబైల్ వర్గాల్లో దీనిపై భారీ అంచనాలు నెలకొన్నాయి.

ఈ నూతన ఎలక్ట్రిక్ ఎస్యూవీ డిజైన్ పరంగా టయోటా సిగ్నేచర్ స్టైల్‌ను కలిగి ఉంటుందని నిపుణులు భావిస్తున్నారు. కంపెనీకి చెందిన పాపులర్ మోడల్ అర్బన్ క్రూయిజర్ ఇబెల్లా డిజైన్ ఎలిమెంట్స్ ఇందులో స్పష్టంగా కనిపించే అవకాశం ఉంది. దీని పరిమాణం, ప్లాట్‌ఫారమ్ మారుతి YMC మాడల్‌కు చాలా దగ్గరగా ఉంటుంది. టయోటా ఈ కొత్త కారును మార్కెట్లో తన మోడళ్లయిన అర్బన్ క్రూయిజర్ హైరైడర్ అలాగే ఇన్నోవా కార్ల మధ్య సరిగ్గా పొజిషన్ చేసే అవకాశం ఉంది. చూడటానికి ఎంతో ఆకర్షణీయంగా, విశాలమైన ఇంటీరియర్‌తో ఈ కారు ఫ్యామిలీ ఆడియన్స్‌ను ఎంతగానో ఆకట్టుకోనుంది.

ఇక ఈ కారులో అందించబోయే ఫీచర్ల జాబితా చాలా పెద్దదనే చెప్పాలి. ఆధునిక టెక్నాలజీ ప్రియులను ఆకట్టుకునేలా ఇందులో డ్యూయల్ స్క్రీన్ సెటప్, పవర్ అడ్జస్టబుల్ మరియు వెంటిలేటెడ్ ఫ్రంట్ సీట్లు, 360-డిగ్రీ సరౌండ్ వ్యూ కెమెరా, వైర్‌లెస్ స్మార్ట్‌ఫోన్ ఛార్జర్, పెద్ద సన్‌రూఫ్, ప్రీమియం జెబీఎల్ సౌండ్ సిస్టమ్ వంటి అధునాతన హంగులు ఉంటాయి. అంతేకాకుండా డ్రైవింగ్ భద్రతను పూర్తిగా మెరుగుపరచడానికి లెవెల్-2 ADAS ఫీచర్‌ను కూడా చేర్చనున్నారు. మూడో వరుసలో ప్రయాణించే ప్రయాణీకుల సౌకర్యం కోసం ప్రత్యేకంగా ఏసీ వెంట్లు కూడా ఇవ్వనున్నారు.

బ్యాటరీ సామర్థ్యం, డ్రైవింగ్ రేంజ్ విషయానికి వస్తే.. ఇందులో శక్తివంతమైన 61kWh బ్యాటరీ ప్యాక్‌ను అమర్చే అవకాశం ఉంది. ఇదే బ్యాటరీని టయోటా ఇబెల్లాలో కూడా ఉపయోగిస్తుండగా, ఇది సుమారు 543 కిలోమీటర్ల వరకు రేంజ్‌ను ఇస్తుందని అంచనా. అయితే 7-సీటర్ కారు కావడం వల్ల దీని బరువు, సైజును బట్టి రేంజ్ కొద్దిగా మారే అవకాశం ఉంది. ఈ కారును 2027 సంవత్సరం మధ్యలో లేదా ఆ ఏడాది చివరి నాటికి మార్కెట్లో అధికారికంగా విడుదల చేసే అవకాశం ఉంది. దీని ప్రారంభ ధర సుమారు రూ.20 లక్షల నుంచి టాప్ వేరియంట్‌కు రూ.25 లక్షల వరకు ఉండొచ్చని అంచనా వేస్తున్నారు.