తక్కువ ఈఎంఐ చూసి మోసపోకండి.. ఈ 7 తప్పులు చేస్తే జేబు ఖాళీ అవ్వడం ఖాయం!

Used Car Buying Tips: కొత్త కార్ల ధరలు పెరగడంతో చాలామంది సెకండ్ హ్యాండ్ కార్ల కొనుగోలు వైపు మొగ్గు చూపుతున్నారు. డీలర్‌షిప్‌ల వద్ద కొనేటప్పుడు సులభంగా అనిపించినా, సరైన అవగాహన లేకపోతే తీవ్రంగా నష్టపోయే ప్రమాదముంది. మొదటిసారి పాత కారు కొనేవారు బేరసారాల సమయంలో చేయకూడని ఏడు ప్రధాన తప్పులు, పాటించాల్సిన ముఖ్యమైన జాగ్రత్తల వివరాలు తెలుసుకుందాం.

పరిశీలించకుండా బేరసారాలు చేయొద్దు..

యూజ్డ్ కార్ డీలర్‌షిప్‌లలో వాహనం అసలు పరిస్థితిని క్షుణ్ణంగా తనిఖీ చేయకముందే ధరపై చర్చించడం మొదటి పెద్ద పొరపాటు. ఆన్‌లైన్ లేదా షోరూమ్‌లో కనిపించే ఆకర్షణీయమైన బోర్డు ధరను మాత్రమే చూడకూడదు. టైర్ల అరుగుదల, పెయింట్ ప్యాచ్‌లు, ఇంజిన్ ఆయిల్ లీకేజీలు, ఇంటీరియర్ డ్యామేజ్ వంటి లోపాలు ఉన్నాయో లేదో గుర్తించాలి. వాహనాన్ని స్వయంగా నడిపి చూసిన తర్వాతే వాటి ఆధారంగా ధర తగ్గించాలని కోరాలి. అలాగే పన్నులు, ఇన్సూరెన్స్, డాక్యుమెంటేషన్, వారంటీ లాంటి అదనపు ఛార్జీలతో కలిపి మొత్తం ఆన్-రోడ్ ఖర్చు ఎంతవుతుందో లిఖితపూర్వకంగా రాసి ఇవ్వాలని డీలర్‌ను డిమాండ్ చేయాలి.

ఈఎంఐ మాయలో పడకండి.. బడ్జెట్ చెప్పొద్దు..

డీలర్‌తో మాట్లాడేటప్పుడు మీ వద్ద ఉన్న మొత్తం బడ్జెట్‌ను ముందే బయటపెట్టకూడదు. బడ్జెట్ తెలిస్తే వాహనం అసలు విలువతో సంబంధం లేకుండా ఆ మొత్తానికి సరిపోయేలా ఒప్పించడానికి విక్రేతలు ప్రయత్నిస్తారు. నెలకు కట్టే ఈఎంఐ మాత్రమే తక్కువగా ఉంటే సరిపోదు. లోన్ మొత్తం, వడ్డీ రేటు, కాలపరిమితి ఆధారంగా చివరకు చెల్లించే మొత్తం రీపేమెంట్ మొత్తంపై స్పష్టత తెచ్చుకోవాలి. అదే మోడల్ కార్ల మార్కెట్ ధరలను పోల్చి చూసి నిర్ణయం తీసుకోవడం ఉత్తమం.

మెకానిక్ చెకప్, ఆర్టీవో పత్రాల పరిశీలన..

డీలర్ ఇచ్చే ఇన్‌స్పెక్షన్ రిపోర్ట్‌ను గుడ్డిగా నమ్మకుండా బయటి స్వతంత్ర మెకానిక్‌తో వాహనాన్ని తనిఖీ చేయించాలి. దీనివల్ల దాగి ఉన్న సాంకేతిక లోపాలు వెలుగులోకి వస్తాయి. రవాణా మంత్రిత్వ శాఖ మార్గదర్శకాల ప్రకారం యాజమాన్య బదిలీ కోసం ఫారమ్ 29, ఫారమ్ 30 సమర్పించాల్సి ఉంటుంది. వాహనంపై ఎలాంటి ఫైనాన్స్ బకాయిలు లేవని నిర్ధారించుకున్నాకే చెల్లింపులు చేయాలి.

పాత కారు కొనుగోలు చేసేటప్పుడు భావోద్వేగాలకు లోనుకాకుండా పూర్తి అవగాహనతో వ్యవహరించడం చాలా ముఖ్యం. వాహన నాణ్యత, సరైన పేపర్‌వర్క్, సమగ్ర వ్యయాన్ని ముందుగానే లెక్కించి అడుగు వేస్తేనే మంచి డీల్ కుదురుతుంది.