VinFast: టాటా, మహీంద్రా ఈవీలకు గట్టి పోటీ.. రూ.10 లక్షల బడ్జెట్లో రెండు కార్లు తెస్తున్న విన్ ఫాస్ట్

VinFast: వియత్నాంకు చెందిన ప్రముఖ వాహన తయారీ సంస్థ విన్‌ఫాస్ట్ భారత ఆటోమొబైల్ మార్కెట్లో భారీ సంచలనానికి తెరలేపింది. ఇక్కడి కస్టమర్ల అభిరుచులకు అనుగుణంగా రూ.10 లక్షల కంటే తక్కువ ధరకు అందుబాటులోకి తెచ్చేలా వీఎఫ్ ఎక్స్, వీఎఫ్ వై పేర్లతో రెండు సరికొత్త ఎలక్ట్రిక్ కార్లను ప్రత్యేకంగా రూపకల్పన చేస్తోంది. గ్లోబల్ మార్కెట్‌లో మంచి ఆదరణ పొందిన వీఎఫ్ 3, వీఎఫ్ 6, వీఎఫ్ 7 మోడళ్లను నేరుగా భారతదేశంలో ఉత్పత్తి చేయాలనే మునుపటి ఆలోచనను విన్‌ఫాస్ట్ తాత్కాలికంగా పక్కన పెట్టింది. మన దేశంలో ఈ వాహనాల తయారీ వ్యయం విపరీతంగా పెరగడం, తద్వారా సామాన్యులకు తక్కువ ధరకు అందించడం కష్టంగా మారడమే దీనికి ప్రధాన కారణం. అందుకే వీఎఫ్ 6, వీఎఫ్ 7 మోడళ్లను విదేశాల నుంచి విడిభాగాల రూపంలో తెప్పించి ఇక్కడ అసెంబుల్ చేయాలని నిర్ణయించింది. దానికి బదులుగా, భారతీయ కుటుంబాల అవసరాలు, స్థానిక బడ్జెట్ పరిమితులను దృష్టిలో ఉంచుకుని వీఎఫ్ ఎక్స్, వీఎఫ్ వై అనే రెండు పూర్తి స్థాయి కొత్త కార్ల తయారీకి శ్రీకారం చుట్టింది.

మధ్యతరగతిని ఆకట్టుకునేలా వీఎఫ్ ఎక్స్ డిజైన్

ప్రస్తుతం ఆటోమొబైల్ వర్గాల్లో వీఎఫ్ ఎక్స్ మోడల్‌పైనే తీవ్రస్థాయిలో చర్చ నడుస్తోంది. ఈ కారు పరిమాణం పరంగా చిన్న కారు వీఎఫ్ 3 కంటే పెద్దదిగా, వీఎఫ్ 6 కంటే కాస్త చిన్నగా ఉండేలా రూపుదిద్దుకుంటోంది. మధ్యతరగతి కుటుంబాలకు తగినంత లగేజీ స్పేస్, విశాలమైన కేబిన్ అనుభూతిని అందిస్తూనే, కారు ధరను దాదాపు 12,000 డాలర్లు అంటే సుమారు రూ. 10 లక్షల లోపే ఉంచాలని కంపెనీ లక్ష్యంగా పెట్టుకుంది. అంతర్జాతీయ ప్రమాణాలకు ఏమాత్రం తగ్గకుండా, భారత రోడ్లకు తగినట్లుగా దీని డిజైన్ ఉండబోతోంది.

తమిళనాడు వేదికగా తయారీ

కార్ల తయారీ వ్యయాన్ని వీలైనంతగా తగ్గించడానికి విన్‌ఫాస్ట్ స్థానిక విడిభాగాల సరఫరాదారులతో విస్తృతంగా చర్చలు జరుపుతోంది. ఇప్పటివరకు భారతదేశానికి చెందిన 300 కంటే ఎక్కువ స్పేర్-పార్ట్స్ సప్లయర్లతో కంపెనీ సమావేశమైంది. తమిళనాడులోని తూత్తుకుడి వేదికగా ఏర్పాటు అవుతున్న బృహత్తర తయారీ ప్లాంట్‌లో ఈ కార్ల ఉత్పత్తి జరగనుంది. ఈ ప్లాంట్ నిర్మాణం కోసం కంపెనీ దాదాపు 2 బిలియన్ డాలర్ల (సుమారు రూ.16,000 కోట్లు) భారీ పెట్టుబడిని కేటాయించింది.

దేశీయ ఈవీ దిగ్గజాలకు సవాల్

ప్రస్తుతం భారతీయ బడ్జెట్ ఈవీ విభాగంలో టాటా మోటార్స్ తిరుగులేని ఆధిక్యంలో కొనసాగుతోంది. మహీంద్రా, మారుతి సుజుకి, హ్యుందాయ్ వంటి దిగ్గజ సంస్థలు కూడా తక్కువ ధరలో ఈవీ వాహనాలను తీసుకురావడానికి తీవ్రంగా శ్రమిస్తున్నాయి. ఈ తరుణంలో విన్‌ఫాస్ట్ రూ.10 లక్షల పరిధిలో వీఎఫ్ ఎక్స్, వీఎఫ్ వై మోడళ్లను మార్కెట్లోకి తెస్తే, పోటీ తీవ్రతరం కావడంతో పాటు వినియోగదారులకు నాణ్యమైన ఎలక్ట్రిక్ ఆప్షన్లు లభిస్తాయి.