Fuel Surcharge Hike: ఇండిగో బాటలో ఎయిర్ ఇండియా, ఆకాశ ఎయిర్ విమాన ఇంధన సర్ఛార్జీలను పెంచాయి

Fuel Surcharge Hike: అంతర్జాతీయంగా విమాన ఇంధనం (ATF) ధరలు రికార్డు స్థాయిలో పెరగడంతో భారతీయ విమానయాన రంగం ప్రయాణికులపై భారాన్ని పెంచే దిశగా అడుగులు వేసింది. ప్రముఖ విమానయాన సంస్థ 'ఇండిగో' (IndiGo) ఇంధన సర్ఛార్జీలను పెంచుతున్నట్లు ప్రకటించిన కొన్ని రోజుల వ్యవధిలోనే.. ఎయిర్ ఇండియా, ఎయిర్ ఇండియా ఎక్స్‌ప్రెస్ మరియు ఆకాశ ఎయిర్ (Akasa Air) సంస్థలు కూడా దేశీయ, అంతర్జాతీయ మార్గాల్లో ఇంధన సర్ఛార్జీలను భారీగా పెంచుతున్నట్లు గురువారం ప్రకటించాయి. పశ్చిమాసియా యుద్ధ సవాళ్లు మరియు ముడి చమురు సరఫరా ఆటంకాల వల్ల ఢిల్లీలో ఏటీఎఫ్ ధర లీటరుకు రూ. 110 నుండి రూ. 137కి పెరిగింది. ఒక్క అక్టోబర్ నెలలోనే ఏటీఎఫ్ ధరల్లో 13 శాతం పెరుగుదల నమోదవడం గమనార్హం.

ఎయిర్ ఇండియా మరియు ఎయిర్ ఇండియా ఎక్స్‌ప్రెస్ సంస్థలు దూర ఆధారిత (Distance-based) విధానంలో ఈ సర్ఛార్జీలను అక్టోబర్ 9 నుండి అమలులోకి తీసుకువచ్చాయి. ఏప్రిల్‌లో రూ. 299 నుండి రూ. 899 వరకు ఉన్న సర్ఛార్జీలను ఇప్పుడు ఏకంగా రూ. 400 నుండి రూ. 1,200 వరకు పెంచాయి. అంటే విమాన దూర శ్రేణులను బట్టి 34 శాతం నుండి 60 శాతం వరకు సర్ఛార్జీల బాదుడు పెరిగింది. 500 కిలోమీటర్ల లోపు ప్రయాణానికి సర్ఛార్జీ రూ. 400 కాగా, 1,501 నుండి 2,000 కిలోమీటర్ల పరిధిలోని దూర ప్రాంత ప్రయాణాలకు అత్యధికంగా రూ. 1,200 వసూలు చేయనున్నారు. అంతర్జాతీయ మార్గాల్లో ఉత్తర అమెరికా, ఆస్ట్రేలియా విమానాలపై సర్ఛార్జ్ $215కి, యూరప్‌కి $135కి, మధ్యప్రాచ్య (పశ్చిమాసియా) దేశాలకు $55కి పెంచారు.

మరోవైపు ఆకాశ ఎయిర్ కూడా ఇదివరకు ఉన్న ప్రయాణ సమయ ఆధారిత విధానాన్ని స్వస్తి చెప్పి, దూర ఆధారిత ఇంధన సర్ఛార్జ్ విధానాన్ని అమల్లోకి తెచ్చింది. దేశీయ మార్గాల్లో 500 కిలోమీటర్ల వరకు రూ. 375, 501–1,000 కిలోమీటర్లకు రూ. 600, 1,001–1,500 కిలోమీటర్లకు రూ. 900 మరియు 1,501 కిలోమీటర్లు దాటితే రూ. 1,150 సర్‌ఛార్జ్‌గా వసూలు చేస్తోంది. అలాగే గల్ఫ్ మరియు ఆసియా దేశాలైన కువైట్, ఖతార్, సౌదీ అరేబియా, యూఏఈ, థాయ్‌లాండ్, వియత్నాం అంతర్జాతీయ మార్గాలకు ఏకరీతిగా రూ. 2,500 ఇంధన సర్ఛార్జ్‌ను నిర్ణయించింది. విమాన సంస్థల మొత్తం నిర్వహణ ఖర్చుల్లో ఇంధనం వాటా 40 శాతంగా ఉన్నందున ఈ భారాన్ని సర్దుబాటు చేసుకోవడం అనివార్యంగా మారిందని విమానయాన ప్రతినిధులు వెల్లడించారు.